އިންޑިއާއިން ރިކޯޑު އަދަދެއްގެ މީހުން ކޮވިޑަށް ޕޮޒިޓިވްވެއްޖެ

އިންޑިއާއިން ބުރާސްފަތި ދުވަހު ރިކޯޑު އަދަދަކަށް މީހުން ކޮވިޑަށް ޕޮޒިޓިވްވެފައިވާ ކަމަށް އެގައުމުގެ ސިއްހަތާއި ބެހޭ ވުޒާރާއިން ބުނެފިއެވެ.

އިންޑިއާގެ ސިއްހަތާއި ބެހޭ ވުޒާރާއިން އެންމެ ފަހުން ނެރުނު ތަފާސްހިސާބުތައް ދައްކާ ގޮތުން އެގައުމުން ބުރާސްފަތި ދުވަހު 314،835 (ތިންލައްކަ ސާދަހާސް އަށްސަތޭކަ ތިރީސް ފަހެއް) މީހުން މީހުން ކޮވިޑަށް ޕޮޒިޓިވް ވެފައެވެ. މިއީ އެގައުމުން އެއް ދުވަހާ އެންމެ ގިނަ މީހުން ޕޮޒިޓިވްވި ދުވަހެވެ. އަދި މިއީ މިބަލީގައި ގައުމަކުން އެންމެ ގިނަ މީހުން އެއް ދުވަހާ ޕޮޒިޓިވްވި ކަމަށް ރިޕޯޓް ކުރި ދުވަސް ވެސް މެއެވެ.

އިންޑިއާގެ ސިއްހީ މާހިރުން ވަނީ މިބަލީގައި އެޑްމިޓް ކުރަން ޖެހޭ މީހުންގެ އަދަދު އެތައް ގުނައެއް އިތުރުވެފައިވުމުން ހޮސްޕިޓަލްތައް ފުރި އޮކްސިޖަން ލިބުމުގައި ދަތިވެފައިވާ ކަމަށް ބުނެފައެވެ. ބައްޔަށް ޕޮޒިޓިވްވާ މީހުންގެ އަދަދު ކޮންޓްރޯލް ނުކުރެވޭނަމަ ބަލީގައި ފަރުވާ ނުލިބި ގިނަ މީހުން މަރުވެދާނެ ކަމުގެ ބިރު އޮތް ކަމަށްވެސް ސިއްހީ މާހިރުން އަންނަނީ ބުނަމުންނެވެ. މީގެ އިތުރުން ހޮސްޕިޓަލްތައް ފުރެމުން އަންނާތީ ބައެއް މީހުން ގޭގައި ކަރަންޓީނުވުމަށް ފޮނުވާލަން ޖެހޭ ކަމަށް ސިއްހަތާއި ބެހޭ ވުޒާރާއިން ވަނީ ބުނެފައެވެ.

މީޑިއާ ރިޕޯޓްތައް ބުނާ ގޮތުން އިންޑިއާގައި ބަލި އެންމެ ބޮޑަށް ފެތުރިފައިވާ އެއް ސިޓީ ކަމަށްވާ ނިއުދިއްލީގެ ހޮސްޕިޓަލްތައް ވަނީ ފުރިފައެވެ. މިހާރު ހޮސްޕިޓަލްތަކުން އޮކްސިޖަން ހުސްވަމުން އަންނަ ކަމަށާއި ކުރިޔަށް އޮތް ހަފުތާއެއްގެ ތެރޭގައި ހޮސްޕިޓަލްތަކުން އޮކްސިޖަން ހުސްވާނެ ކަމަށް ލަފާ ކުރެވޭ ކަމަށް ރިޕޯޓްތައް ބުނެއެވެ.

އިންޑިއާއިން ކޮވިޑަށް މީހުން ޕޮޒިޓިވްވާ އަދަދު ދުވަހެއް ދުވަހަކަށް މަތިވުމާއި ގުޅިގެން އެގައުމުން އަންނަނީ ބަލިން ރައްކާތެރިވުމަށް އަޅާފައިވާ ފިޔަވަޅުތައް ހަރުކަށިކުރަން ފަށާފައެވެ.