"ޖަމިއްޔާތަކުގެ ސަބަބުން ރައްޔިތުންގެ ޚިޔާލާއި ބަސް ހޯދަން ކައުންސިލަށް ފަސޭހަވޭ"
ޖަމިއްޔާތަކަކީ ވަރަށް މުހިންމު ގާނޫނީ ޝަޚުސެއްކަން މޭޔަރު ފާހަގަކުރެއްވި
"ވާއު" ޖަމިއްޔާއިން ކައުންސިލާއެކު ބޭއްވި ބައްދަލުވުމުގެ ތެރެއިން
އަންހެނުންގެ ތަރައްގީއަށް މަސައްކަތް ކުރާ ޖަމިއްޔާއެއް ކަމަށްވާ ވިމެން އޮފް ވިލް (ވާއު) އިން އައްޑޫ ސިޓީ ކައުންސިލާ ބައްދަލުކޮށްފިއެވެ.
މި ބައްދަލުވުމަކީ އެ ޖަމިއްޔާ ރަޖިސްޓްރީވުމާ ގުޅިގެން ކައުންސިލަށް ތަޢާރަފުވުމުގެ ގޮތުން ބޭއްވި ބައްދަލުވުމެކެވެ.
އައްޑޫ ސިޓީ ކައުންސިލްގެ އިދާރާގައި ބޭއްވި މި ބައްދަލުވުމުގައި ވާހަކަފުޅުދައްކަވަމުން ޖަމިއްޔާތަކަކީ ވަރަށް މުހިންމު ގާނޫނީ ޝަޚުސެއްކަން ފާހަގަކުރައްވައި މޭޔަރު އަބްދުﷲ ސާދިގު ވިދާޅުވީ، އެކި ކަންކަމުގައި ރައްޔިތުންގެ ހައްގުގައި ވަކާލާތުކުރުމުގައި ޖަމިއްޔާތައް ވަރަށް މުހިންމު ރޯލެއް އަދާކުރާ ކަމަށެވެ. ޖަމިއްޔާތައް އުފެދުމަކީ މުޖުތަމައަށް ލިބޭ ކުރިއެރުމެއް ކަމަށާއި، ޖަމިއްޔާތަކުގެ ސަބަބުން އެކި ކަންކަމުގައި ރައްޔިތުންގެ ޚިޔާލާއި ބަސް ހޯދުމުގައި ކައުންސިލްގެ މަސައްކަތް ފަސޭހަވެގެންދާ ކަމުގައި މޭޔަރު ވިދާޅުވިއެވެ.
މީގެ އިތުރުން ޖަމިއްޔާތައް އުފެއްދުމަކީވެސް ކުޑަ މިންވަރެއްގެ ކަމެއް ނޫން ކަމަށާއި ޖަމިއްޔާތައް ހިންގުމަކީ ވަރަށް ބުރަށް ކަމެއް ކަމަށް ސާދިގު ވިދާޅުވިއެވެ. އެންމެ މުހިންމު އެއް ކަމަކީ އެކަށީގެންވާ ދެމެހެއްޓެނިވި ރަގަޅު ގޮތެއްގައި ޖަމިއްޔާ ހިންގުން ކަމަށް ވެސް ވިދާޅުވިއެވެ.
މި ބައްދަލުވުމުގައި ވިމެން އޮފް ވިލްގެ ފަރާތުން ހާމަކުރި ގޮތުގައި އެ ޖަމިއްޔާގެ މައިގަނޑު މަގުސަދަކީ އެކި ގޮތްގޮތުން އަންހެނުން ބާރުވެރިކޮށް ދިރިއުޅުމުގައި އަންހެނުންނަށް ދިމާވާ މައްސަލަތައް ހައްލުކުރުމަށް އެހީތެރިވުމެވެ. މުޖުތަމައުގެ އާންމު ހާލަތު އިތުރަށް ރަގަޅުކޮށް ސަގާފީ ހޭލުންތެރިކަން އިތުރުކޮށް، އަންހެނުން ބާރުވެރިކުރުވުމަށް ޕްރޮގްރާމްތައް ހިންގައި، މިފަދަ ޕްރޮގްރާމްތަކަށް އެކަށީގެންވާ މާހައުލެއް ބިނާކުރުންވެސް ޖަމިއްޔާގެ މަގުސަދުތަކުގެ ތެރޭގައި ހިމެނޭ ކަމަށް ބުންޏެވެ.
