ގަތަރަށް ރާއްޖެއިން ކަނޑައަޅާ ނޮން ރެޒިޑެންޓް ސަފީރު އައްޔަން ކުރުމަށް ފޮނުވާފައިވާ މައްސަލަ ކޮމިޓީއަށް
21 އެޕްރީލު 2021 | ބުދަ 08:19ނޮން ރެޒިޑެންޓް ސަފީރުކަމަށް އުމަރު އަބްދުއްރައްޒާގު އައްޔަންކުރަން މީގެ ކުރިންވެސް މަޖިލީހުން ރުހުން ދިން
ރައްޔިތުންގެ މަޖިލީހުގެ ޖަލްސާއެއް ކުރިއަށް ދަނީ
ގަތަރަށް ރާއްޖެއިން ކަނޑައަޅާ ނޮން ރެޒިޑެންޓް ސަފީރު ހަމަޖެއްސުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުވާފައިވާ މައްސަލަ ދިރާސާ ކުރުމަށް ޚާރިޖީ ގުޅުންތަކުގެ ކޮމިޓީއަށް ފޮނުވައިފިއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް މަޖިލީހަށް ފޮނުއްވާފައިވާ ސިޓީގައި ވަނީ ސްރީލަންކާއަށް ރާއްޖެއިން ކަނޑައަޅާފައިވާ ސަފީރު ހ. ހިކިފިނިފެންމާގެ، އުމަރު އަބްދުއްރައްޒާގު ގަތަރަށް ރާއްޖެއިން ކަނޑައަޅާ ނޮން ރެޒިޑެންޓް ސަފީރުގެ މަގާމަށް ހަމަޖެއްސުމަށް ގަސްތުކުރައްވާ ކަމަށެވެ. އަދި މިކަމާމެދު މަޖިލީހުގެ މަޝްވަރާ ހޯއްދަވައި، މަޖިލީހުން ނިންމެވި ގޮތް އަންގަވައި ދެއްވުމަށް އެދޭ ކަމަށެވެ.
ރައީސް ވަނީ މީގެ ކުރިން ވެސް އެކި ގައުމުތަަކަށް ނޮން ރެޒިޑެންޓް ސަފީރުން އައްޔަން ކުރުމަށް ގަސްތުކުރެއްވި ބޭފުޅުންނާއި މެދު މަޖިލީހުގެ މަޝްވަރާ ހޯއްދަވާފައެވެ. މި މައްސަލަތައް ދިރާސާ ކުރުމަށް ފަހު މަޖިލީހުން ވަނީ ފަލަސްތީނުގެ އިތުރުން 13 ގައުމަކަށް ނޮން ރެސިޑެންޓް ސަފީރުން އައްޔަން ކުރުމަށް ރުހުން ދީފައެވެ.
އަދި އުމަރު އަބްދުއްރައްޒާގު، އޮސްޓްރޭލިއާ އަދި ސައުތު އެފްރިކާއަށް ދިވެހިރާއްޖެއިން ކަނޑައަޅާ ނޮން ރެޒިޑެންޓް ސަފީރު ކަމަށް ހަމަޖެއްސުމަށް 39 މެންބަރުންގެ ވޯޓާއިއެކު މަޖިލީހުން ރުހުން ދީފައިވެއެވެ.
