ވެލެންސިއާއާ ދެމެދު އޮތް ފަރަގަށް ބެލުން މުހިންމެއް ނޫން: ވިޑަކޮވިޗް

ދިރާގު ދިވެހި ޕްރިމިއާ ލީގުގެ ދެވަނައިގައި އޮތް ކުލަބު ވެލެންސިއާ އާއި އެއްވަނައިގައި އޮތް އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ދެމެދު އޮތް ފަރަގު ބެލުން މުހިންމު ނޫން ކަމަށް މާޒިޔާގެ ކޯޗު ރިސްޓޯ ވިޑަކޮވިޗް ބުނެފިއެވެ.

ލީގުގެ ދެވަނަ ބުރުގެ މެޗުތައް ނިމުމަކާ ގާތްވެފައިވާއިރު، ލީގު ތާވަލުގެ އެއްވަނައިގައި އޮތް މާޒިޔާއާ ދެވަނައިގައި އޮތް ވެލެންސިއާ ދެމެދު އޮތީ ހަތަރު ޕޮއިންޓުގެ ފަރަގެކެވެ. އެއްވަނައިގައި ކުޅުނު 12 މެޗުން ލިބުނު 28 ޕޮއިންޓާއެކު މާޒިޔާ އޮތްއިރު، ދެވަނައިގައި އޮތް ވެލެންސިއާއަށް ކުޅުނު 12 މެޗުން 24 ޕޮއިންޓް ވަނީ ލިބިފައެވެ.

ލީގުގައި ބުދަ ދުވަހުގެރޭ ކުލަބު ގްރީން ސްޓްރީޓްސްއާ ދެކޮޅަށް ކުޅޭ މެޗުގެ ކުރިން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ވިޑަކޮވިޗް ބުނީ މާޒިޔާއިން މިވަގުތު ވިސްނާނީ ހަމައެކަނި ގްރީން ސްޓްރީޓްސް މެޗަށް ކަމަށެވެ. އަދި ވެލެންސިއާއާ ދެމެދު އޮތް ފަރަގު މި ވަގުތައް މުހިންމު ނޫން ކަމަށާއި، މުހިންމީ ކުރިއަށް އޮތް ގްރީން ސްޓްރީޓްސް މެޗުން ތިން ޕޮއިންޓް ހޯދުން ކަމަށްވެސް ވިޑަކޮވިޗް ބުންޏެވެ.

މީގެ ކުރިން މި ސީޒަނުގެ ފުރަތަމަ ބުރުގައި މުޙައްމަދު ނިޒާމް (ނިޒާމްބެ) ގެ އިރުޝާދުގެ ދަށުން މާޒިޔާއިން ވަނީ 7-1 ގެ ތަފާތު ބޮޑު ނަތީޖާއަކުން ގްރީން ސްޓްރީޓްސް ބަލިކޮށްފައެވެ. އެކަމާ ގުޅޭ ގޮތުން ވިޑަކޮވިޗް ބުނީ އެއީ މާޒީ ކަމަށާއި މިހާރު ގްރީން ސްޓްރީޓްސްއަކީ ކުރިއަށްވުރެ އެތަށް ގޮތަކުން ވަރުގަދަ ޓީމެއް ކަމަށެވެ. އަދި ގްރީން ސްޓްރީޓްސްއަކީ މާޒިޔާ ކަހަލަ ބޯޅަ ހިފަހައްޓައިގެން ކުޅޭ ޓީމެއް ކަމަށްވެސް ވިޑަކޮވިޗް ވަނީ ބުނެފައެވެ.

މާޒިޔާ މެޗުގެ ކުރިން ގްރީން ސްޓްރީޓްސްގެ ކޯޗު އަލީ ނިސްތާރު މުޙައްމަދު ބުނީ، މި މެޗަށް ނުކުންނާނީ މިދިޔަ މެޗުން ލިބުނި ފިލާވަޅުތައް ދަސްކޮށްގެން ކަމަށެވެ. އެގޮތުން އެންމެ ފަހުން ގްރީން ސްޓްރީޓްސްއިން ކުޅުނު މެޗުގައި ކުލަބު އީގަލްސްއާ 1-1 ގެ ނަތީޖާއަކުން އެއްވަރުވެފައި ވާއިރު، އެ މެޗާ އަޅާ ބަލާއިރު މާޒިޔާ މެޗަށް ކުރިމަތިލާނީ މި މެޗުގައި ޓެކްޓިކަލް ޑިސިޕްލިން ހިފެހެއްޓުމަށް ކަމަށްވެސް ބުންޏެވެ.

ނިސްތާރު ބުނީ މާޒިޔާއަކީ ބަލިކުރެވޭނެ ވަރުގެ ޓީމެއް ކަމަށާއި، އެކަމަށް ގްރީން ސްޓްރީޓްސްއިން އޮތީ ތައްޔާރަށް ކަމަށެވެ. އަދި މި މެޗާ ކުރިމަތިލާއިރު ޕްރެޝަރު އޮތީ މާޒިޔާއަށް ކަމަށާއި، އެހެންކަމުން މި މެޗަށް އެޓީމުންވެސް ވަރަށް ރަނގަޅަށް ތައްޔާރުވާނެ ކަމަށްވެސް ނިސްތާރު ވަނީ ބުނެފައެވެ.

ލީގުގެ ދެވަނަ ބުރުގައި މާޒިޔާއާ ދެކޮޅަށް ގްރީން ސްޓްރީޓްސް ނުކުންނައިރު، އެ ޓީމު އޮތީ ތާވަލުގެ ތިންވަނައިގައި ކުޅުނު 13 މެޗުން ލިބުނު 19 ޕޮއިންޓާއެކުއެވެ. ދިރާގު ދިވެހި ޕްރިމިއާ ލީގުގައި މާޒިޔާ އާއި ގްރީން ސްޓްރީޓްސް ބައްދަލުކުރާ މެޗު ފަށާނީ ބުދަ ދުވަހުގެރޭ 22:00 ގައެވެ.