ސުޕަ ލީގުން އިނގިރޭސި ކުލަބުތައް ވަކިވެއްޖެ

ޔޫރަޕުގެ ނަން މަޝްހޫރު ކުލަބުތަކެއް ގުޅިގެން އުފެއްދި ޔޫރަޕިއަން ސުޕަ ލީގުން ވަކިވާން އިނގިރޭސި ހަ ކުލަބުންވެސް ނިންމައިފިއެވެ.

އާދީއްތަ ދުވަހުގެރޭ ސުޕަ ލީގު ރަސްމީކޮށް އިއުލާންކޮށްފައިވަނީ ފައުންޑާ 12 ކުލަބަކާއެކުއެވެ. އެގޮތުން އެ މުބާރާތުގެ ފައުންޑާ ކުލަބުތަކުގެ ތެރޭގައި ހިމެނުނީ އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑާއި، ލިވަޕޫލާއި، ޗެލްސީ އާއި، މެންޗެސްޓާ ސިޓީ އާއި، އާސެނަލް އަދި ޓޮޓެންހަމާއި ސްޕެނިޝް ލީގުގެ ރެއާލް މެޑްރިޑާއި، ބާސެލޯނާ އަދި އެތުލެޓިކޯ މެޑްރިޑުގެ އިތުރުން އިޓާލިއަން ލީގުގެ އިންޓަ މިލާނާއި، އޭސީ މިލާން އަދި ޔުވެންޓަސްއެވެ.

ސުޕަ ލީގު އިއުލާންކޮށްފައިވަނީ ޔުއެފާ އާއި ފީފާއިން އެކަމާ ދެކޮޅަށް ތަކުރާރުކޮށް އިންޒާރު ދެމުން އަންނަނިކޮށެވެ. އެގޮތުން މިދިޔަ ޖެނުއަރީ މަހު ފީފާއިން ވަނީ ސުޕަ ލީގުގައި ބައިވެރިވާ ކޮންމެ ކުލަބެއް އަދި ކޮންމެ ކުޅުންތެރިއަކުވެސް ފީފާއިން ނޫނީ އެހެން ފެޑެރޭޝަންތަކުން ރާވާ ހިންގާ އެއްވެސް މުބާރާތެއްގައި ބައިވެރިނުވެވޭނެ ކަމަށް ބުނެ އިންޒާރެއް ދީފައެވެ. އެކަމަކު އެ އިންޒާރުތަކަށް ބެލުމެއް ނެތި ސުޕަ ލީގު ތައާރަފުކުރިއިރު، އެ މުބާރާތުގައި ކުޅޭ ކުޅުންތެރިންނަށް ގައުމީ ޓީމުގެ މެޗުތަކުގައި ނުކުޅެވޭނެ ކަމަށް ހޯމަ ދުވަހުގެރޭ ޔުއެފާގެ ރައީސް އަލެކްސަންޑަ ކެފެރިން ވަނީ ވިދާޅުވެފައެވެ.

އެއާއެކު ކުލަބުތަކުގެ ކުޅުންތެރިންނާއި ކޯޗުންވެސް ސުޕަ ލީގާ ދެކޮޅަށް ވާހަކަދައްކާފައިވާއިރު، އަންގާރަ ދުވަހުގެރޭ ސުޕަ ލީގުގައި ހިމެނުނު އިނގިރޭސި ހަ ކުލަބުންވެސް ވަނީ މި މުބާރާތުން ވަކިވިކަން ރަސްމީކޮށް އިއުލާންކޮށްފައެވެ.

އެއާއެކު ސުޕަ ލީގު ކާމިޔާބުނުވާނެ ކަމަށް ބެލެވިފައިވާއިރު، މީގެ ކުރިން މި ލީގުގައި ނުހިމެނޭ ބައެއް ކުލަބުތަކުންވެސް ވަނީ ސުޕަ ލީގާ ދެކޮޅަށް ވާހަކަދައްކާފައެވެ. އެގޮތުން ޖަރުމަނުގެ ގަދަ ދެ ބާރު ކަމަށްވާ ބަޔާން މިއުނިކާއި، ބޮރޫޝިއާ ޑޯޓްމުންޑް އަދި ފްރާންސްގެ ޗެމްޕިއަން ޕީއެސްޖީންވެސް ވަނީ ސުޕަ ލީގުގައި ނުކުޅޭނެ ކަމަށް ބުނެފައެވެ.

ސުޕަ ލީގު އިއުލާންކުރުމާއެކު ފުޓްބޯޅަ ސަޕޯޓަރުން ނުރުހުން ފާޅުކުރަން ފެށިއިރު، މި ލީގުގައި ހިމެނޭ ކުލަބުތަކުގެ ސަޕޯޓަރުން ވަނީ މުޒާހަރާވެސް ކޮށްފައެވެ. ޔޫރަޕުގެ ނަން މަޝްހޫރު ކުލަބުތަކެއް ހިމަނައިގެން ސުޕަ ލީގު އުފެއްދުމުގެ ބޭނުމަކީ އެ ކުލަބުތަކުގެ މާލީ ހާލަތު ރަނގަޅު ކުރުމެވެ. މި ލީގުގެ ޗެއާމަނަކީ ރެއާލް މެޑްރިޑުގެ ރައީސް ފްލޮރެންޓީނޯ ޕެރޭޒެވެ. އަދި ވައިސް ޗެއާމަނުންނަކީ ލިވަޕޫލުގެ ވެރިޔާ ޖޯން ހެންރީ އާއި މެންޗެސްޓާ ޔުނައިޓެޑުގެ ޖޯލް ގްލޭޒާއެވެ.

ރިޕޯޓުތައް ބުނާ ގޮތުން ސުޕަ ލީގު ފަށަން ފުރަތަމަ ޚަރަދުކުރަން ނިންމީ އެމެރިކާގެ އިންވެސްޓްމަންޓް ބޭންކް ޖޭޕީ މޯގަންއިންނެވެ. އެގޮތުން ލީގު ފެށުމަށް ކޮންމެ ކުލަބަކަށް 3.5 ބިލިޔަން ޔޫރޯ ލިބިގެންދާނެއެވެ. އަދި ލީގު ކާމިޔާބުކުރާ ޓީމަކަށް 400 މިލިޔަން ޔޫރޯ ލިބިގެންދާނެ ކަމަށްވެސް ރިޕޯޓުތައް ބުނެއެވެ. މިއީ ޗެމްޕިއަންސް ލީގު ކާމިޔާބުކުރާ ޓީމަކަށްވެސް ލިބޭ ފައިސާގެ އިނާމަށްވުރެ ހަތަރު ގުނަ އިތުރު އަދަދެކެވެ.

ސުޕަ ލީގާއެކު ޔުއެފާއިން ހަރުކަށި ފިޔަވަޅުތަކެއް އަޅަން ނިންމިއިރު، ހޯމަ ދުވަހުގެރޭ އެ އިދާރާއިން ވަނީ ޔޫރަޕުގެ އެންމެ ޝަރަފުވެރި ކުލަބު ފުޓްބޯޅަ މުބާރާތް ކަމަށްވާ ޔުއެފާ ޗެމްޕިއަންސް ލީގުގެ އައު ފޯމެޓް ފާސްކޮށްފައެވެ. ޔުއެފާއިން އިއުލާންކުރި ޗެމްޕިއަންސް ލީގުގެ އައު ފޯމެޓުގައިވާ ގޮތުން ގްރޫޕް ސްޓޭޖުގައި 32 ޓީމުގެ ބަދަލުގައި 36 ޓީމު ވާދަކުރާނެއެވެ. އަދި ގްރޫޕް ސްޓޭޖުގައި ކޮންމެ ޓީމަކަށް 10 މެޗު ކުޅެން ލިބޭނެއެވެ.