ވަނުއަޓޫއަށް ލައްގާފައިއޮތް، ގޮތް ނޭނގޭ މީހާ ކޮވިޑަށް ޕޮޒިޓިވް

ކޮވިޑަށް ޕޮޒިޓިވް މީހެއްގެ ހަށިގަނޑު، ޕެސިފިކް ކަނޑުގެ ދެކުނުގައި އޮންނަ ޖަޒީރާ ގައުމެއް ކަމަށްވާ ވަނުއަޓޫ އަށް ލައްގައިފިއެވެ.

ފިލިޕީންސްގެ މަސްވެރިއެއްގެ ހަށިގަނޑު ވަނުއަޓޫގެ ވެރިކަންކުރާ އެފާޓޭގެ ޕޯޓް ވިލާއާ މާ ދުރުނޫން ހިސާބެއްގެ އައްސޭރިފަށުން ފެނިފައިވަނީ އޭޕްރީލް މަހުގެ 11 ވަނަ ދުވަހުއެވެ. އެމީހާގެ ހަށިގަނޑު ފެނުމާއެކު ސަރަހައްދުގައި ހުރި މޯޗަރީއަކަށް ގެންގޮސް، ޓެސްޓްތަކެއް ހަދާފައިވެއެވެ.

ފެނިފައިވާ ހަށިގަނޑު ކޮވިޑަށް ޕޮޒިޓިވް ވުމާ ގުޅިގެން، ވަނުއަޓޫގެ ބޮޑުވަޒީރު ބޮބް ލައުމެން ވަނީ، މައިރަށް އެފާޓޭގެ ބޭރުގެ ދަތުރުތައް ތިންދުވަސް ވަންދެން ބަންދުކުރައްވައި، އެކަން އިއުލާންކުރައްވާފައެވެ. އަދި ކޮވިޑަށް ޓެސްޓްކުރުމަށް އެ ހިސާބުގެ ރައްޔިތުންނަށް އިލްތިމާސްކުރައްވާފައިވެއެވެ.

މަރުވެފައި އޮތް މީހާގެ ހަށިގަނޑުން ވައިރަސް ފެތުރިފައިވާ މިންވަރު ދެނެގަތުމަށްޓަކައި، ކަމާގުޅުންހުރި އިދާރާތަކުން ވަނީ ކޮންޓެކްޓް ޓްރޭސިންގެ މަސައްކަތް ފަށާފައެވެ. އެގޮތުން ކުރެވުނު މަސައްކަތުން 16 މީހަކު މިހާރު ކަރަންޓީނުކޮށްފައި ވާކަމަށް އެގައުމުގެ ޑިރެކްޓަރ ޖެނެރަލް އޮފް ހެލްތު ރަސެލް ޓަމާޓާ އާ ހަވާލާދީ ބައެއް މީޑިއާތަކުން ބުނެއެވެ.

ކަރަންޓީނު ކުރި މީހުންގެ ތެރޭގައި ގިނައިން ހިމެނެނީ، މަސްވެރިޔާގެ ހަށިގަނޑު ލައްގާފައި އޮތް ސަރަހައްދުގައި ހަރަކާތްތެރިވި ފުލުހުން ކަމަށް ރިޕޯޓުތައް ބުނެއެވެ.

ތިންލައްކައެއްހާ މީހުންގެ އާބާދީއެއް އޮންނަ ވަނުއަޓޫއިން ކޮވިޑް ކޭސްތައް ފެނިފައިވަނީ ވަރަށް މަދުންނެވެ. އެ ގޮތުން ކޮވިޑް ޕެންޑަމިކް ފެށުނުފަހުން އެގައުމުން މިހާތަނަށް ފެނިފައިވަނީ އެންމެ ތިން ޕޮޒިޓިވް ކޭހެވެ. އެގޮތުން ފުރަތަމަ ކޭސް ނޮވެމްބަރުމަހު ފެނުނުއިރު އަނެއް ދެ ކޭސް ފެނިފައިވަނީ މާޗްމަހުއެވެ.