ޑރ. މުއިއްޒުގެ ސަރުކާރުން ބޭނުން ނުވާ ވަރަށް ސިޔާސީ މަގާމު އުފައްދައިފި ކަމަށް ހުޅުމާލެ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު ވިދާޅުވެއްޖެއެވެ.
ބުދަ ދުވަހު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫފުން ރައްޔިތުންގެ މަޖިލިސް ކުރާ ގޭގައި ބޭއްވި ނޫސްވެރިންގެ ބައްދަލުވުމުއްގައި ޑރ.ޝަމްހީދު ވިދާޅުވީ، ވަޒީފާތައް މަދުކޮށްގެން ނޫނީ ރާއްޖޭގެ މާލީ ހާލަތު ރަނގަޅު ނުކުރެވޭނެ ކަމަށެވެ.
ރައްޔިތުންގެ މަޖިލީހުގައި އިދިކޮޅު އެމްޑީޕީ ތަމްސީލް ކުރައްވާ، ޑރ. ޝަމްހީދު ފާހަގަ ކުރެއްވި ގޮތުގައި ބޭރުގެ ފަރާތްތަކުން މާލީ އެހީތެރިކަން ރާއްޖެއިން ހޯދަން ބޭނުން ނަމަ ފުރަތަމަ ކަމަކަށް ސަރުކާރުން ޚަރަދު ކުޑަކުރުމުގައި ސީރިއަސް ކަން ދައްކަންޖެހޭނެ ކަމަށެވެ.
"ވަޒީފާތައް މަދުކޮށްގެން ނޫނީ ބައިނަލް އަގްވާމީ މާލީ އިދާރާ ތަކަށް ކޮންވިންސް ކޮށްނުދެވޭނެ، ދިވެހިރާއްޖެ އަށް ބޭނުންވާ މާލީ އެހީތެރިކަން ހޯދަން،" ޑރ. ޝަމްހީދު ވިދާޅުވިއެވެ.
ދިވެހި ރާއްޖެއަށް ސަލާމަތް ވެވެން އޮތީ ޚަރަދު ކުޑަކުރުމަށް ވަރަށް ބޮޑެތި ފިޔަވަޅު ތަކެއް އަޅައިގެން ކަމުގައި ޑރ. ޝަމްހީދު ފާހަގަ ކުރެއްވިއެވެ.
އޭނާ ވިދާޅުވީ ޚަރަދު ކުޑަކުރަން ފިޔަވަޅު އަޅާ އިރު އެންމެ ބޮޑު އެއްޗެއް ހޭދަ ވަނީ ހިންގުމުގެ ޚަރަދުގެ ގޮތުގައި ކަމަށާއި، އޭގެ ބޮޑު ބައެއް ދަނީ ވަޒިފާ ތަކަށް މުސާރާ ދިނުމަށް ކަމަށެވެ.
ޑރ. ޝަމްހީދު ވިދާޅުވީ މި އަހަރުގެ ޖޫން މަހާ ހަމައަށް އައި އިރު ދައުލަތުގެ ޚަރަދު 500-700 މިލިއަން ރުފިޔާ މިދިޔަ އަހަރުގެ މި މުއްދަތައް ވުރެ އިތުރަށް ކުރެވިފައިވާކަން ފާހަގަ ކުރެވޭ ކަމަށެވެ.
ޑރ. ޝަމްހީދު ވިދާޅުވީ، ޑރ. މުއިއްޒުގެ ސަރުކާރުގައި ސިޔާސީ ވަޒީފާ ތަކުގެ އަދަދު 2000ށް އަރާނެ ކަމަށް ލަފާ ކުރެވޭއިރު، އެ ވަޒީފާ ތަކުގެ މަހު މުސާރައަށް 100 މިލިއަން ރުފިޔާ ހޭދަވާނެ ކަމަށް ލަފާ ކުރެއްވޭ ކަމުގައެވެ.
2025 ނުވަތަ 2026ގައި ރާއްޖެ ބަނގުރޫޓްވާ ވާހަކަ ދައްކާ އިރު މާލީ އިދާރާ ތަކުން ދޭ ލަފާގެ މަތިން އެކަމަށް ސަމާލުކަން ދީގެން ފިޔަވަޅު އަޅަން އެމްޑީޕީގެ ޕާލިމެންޓަރީ ގްރޫޕުން ދޭން ޖެހޭ އެހީތެރިކަން ދޭނެ ކަމަށްވެސް ޑރ. ޝަމްހީދު ވިދާޅުވިއެވެ.
މި ނޫސްވެރިންގެ ބައްދަލުވުމުގައި ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ފާހަގަ ކުރެއްވި ގޮތުގައި، ގޭގައި ކަމެއް ނުކޮށް ބައިތިއްބައިގެން މުސާރައިގެ ގޮތުގައި ބައި މިލިއަނަށް ވުރެ ގިނަ ރުފިޔާ މި ސަރުކާރުން ވަނީ ހޭދަ ކޮށްފައެވެ.
"މަސައްކަތަކާ ނުލާ ޓެކްސްޕޭޔަރ ފައިސާ އިން އެބޭފުޅުންނަށް ޚަރަދު ކުރަމުން އެ ގެންދަނި،" މީކާއީލް ވިދާޅުވިއެވެ.
