ކޮވިޑުގެ ކޭސްތައް ގިނަވެ، އިންޑިއާ ޔޫކޭގެ ރެޑް ލިސްޓަށް

އަވައްޓެރި އިންޑިއާގައި ކޮވިޑް-19 ގެ ކޭސްތައް ގިނަވެ، އިނގިރޭސިވިލާތުން ދަތުރުފަތުރުގެ ސަމާލުގެ ގޮތުގައި ކަނޑައަޅާ "ރެޑް ލިސްޓް" ގައި އިންޑިއާ ހިމެނިއްޖެއެވެ.

ބީބީސީގައި ރިޕޯޓް ކޮށްފައިވާ ގޮތުން 23 އޭޕްރީލް ވާ ހުކުރު ދުވަހުން ފެށިގެން އިންޑިއާ، ޔޫކޭގެ ރެޑް ލިސްޓުގައި ހިމެނިގެންދާނެއެވެ. އެގޮތުން ފާއިތުވި 10 ދުވަސް ތެރޭގައި އިންޑިއާއަށް ދަތުރުކޮށްފައިވާ މީހެއްނަމަ އެ ޤައުމަށް އެތެރެވުން މަނާވާނެ ކަމަށް ބީބީސީގައި ރިޕޯޓް ކޮށްފައިވެއެވެ. އެހެންނަމަވެސް، ޔޫކޭ އަދި އައިރިޝް ޕާސްޕޯޓެއް އޮތް މީހެއް ނަމަ އެ ޤައުމަށް އެތެރެވުމުގެ ހުއްދަ ދޭނެއެވެ. އަދި އެފަދަ މީހުންވެސް ސަރުކާރުން ކަނޑައަޅާ ތަނެއްގައި 10 ދުވަހުގެ ކަރަންޓީން މުއްދަތެއް ފުރިހަމަ ކުރަން ޖެހެއެވެ.

ރިޕޯޓުތައް ބުނާގޮތުން އިންޑިއާއިން ފެނިފައިވާ ކޮވިޑް ވޭރިއަންޓުގެ 100ށް ވުރެ ގިނަ ކޭސް ޔޫކޭއިން މިހާތަނަށް ރިޕޯޓް ކޮށްފައިވެއެވެ. އެކަމުގެ ސަބަބުން އެ ޤައުމުގައި ކޮވިޑް-19 އަށް ޓެސްޓު ކުރުމުގެ ކަންކަންވެސް މިހާރު ވަނީ އިތުރަށް ވަރުގަދަކޮށްފައެވެ. ސިއްޙީ މާހިރުންނާ ޙަވާލާދީ ބީބީސީގައި ރިޕޯޓު ކޮށްފައިވާ ގޮތުން އިންޑިއާއިން ފެނިފައިވާ ވޭރިއަންޓުގައި ކަންބޮޑުވާން ޖެހޭ ފަދަ ކަންކަން ފާހަގަ ކުރެވިފައިވާއިރު، ސައިންސްވެރިން ދަނީ މިހާރު އެކަންކަން އިތުރަށް ދިރާސާ ކުރަމުންނެވެ.

މިހިނގާ އޭޕްރީލް މަހުގެ 15 ވަނަ ދުވަހުން ފެށިގެން އިންޑިއާއިން ދަނީ ރެކޯޑު އަދަދުތަކުން ކޭސްތައް ރިޕޯޓު ކުރެވެމުންނެވެ. އެގޮތުން ދުވާލެއްގެ މައްޗަށް ދެލައްކައަށްވުރެ ގިނަ ކޭސް ރިޕޯޓު ކުރެވެމުންދާއިރު، ބައެއް މައި ސްޓޭޓުތަކުގައި ގެންދަނީ ލޮކްޑައުންގެ ފިޔަވަޅުތައްވެސް ތަންފީޒު ކުރަމުންނެވެ.