އިންޑިއާ ސިފައިން އައްޑަނައަކަށް އިންސާނަކު ބޭނުންކުރި ކަމަށް ބުނާ މައްސަލައެއް ބަލަނީ

ކަޝްމީރުގައި ހިނގި ހަމަނުޖެހުމެއްގައި ސިފައިންނާ ދިމާލަށް ގާއުކުމުން ރައްކާތެރިވުމަށް ސިފައިން ބޭނުންކުރި ޖިޕެއްގެ ކުރީގައި އިންސާނަކު ބަނދެގެން އައްޑަނައެއްގެ ގޮތުގައި ބޭނުންކުރިކަމުގެ ވާހަކައެއް ފެންމަތިވުމުން އިންޑިއާ އަސްކަރިއްޔާއިން އެ މައްސަލަ ތަހުގީގުކުރަން ފަށައިފިއެވެ.

މައްސަލަ ތަހުގީގުކުރަން ފަށާފައި މިވަނީ މި ހާދިސާގެ ވީޑިއޯ ކްލިޕެއް ސޯޝަލް މީޑިއާގައި ހުކުރު ދުވަހު ފުޅާދާއިރާއެއްގައި ދައުރުވާން ފެށުމުންނެވެ.

ކާކުކަން ނޭނގޭ ފިރެހެނަކު ޖިޕުގައި ބަނދެފައި އޮތް މަންޒަރު ފެންނަ މި ވީޑިއޯ ކްލިޕްގެ ދިގުމިނަކީ 11 ސިކުންތެވެ. މިވީޑއޯގައި ފެންނަނީ މިދިއަ އާދީއްތަ ދުވަހު ކަޝްމީރުގެ އިންޑިއާއާ ވީފަޅިން ބުދްގަމް ޑިސްޓްރިކްޓްގައި ހިނގި އަށްމީހުން މަރުވި ހަމަނުޖެހުމުގައި ސިފައިން ބޭނުންކުރި އުޅަނދުތަކުގެ ކުރީގައި އޮތް ޖިޕުގައި އޭނާ ބަނދެފައި އޮއްވައެވެ.

އަސްކަރިއްޔާގެ ތަރުޖަމާނު ކާނަލް ރާޖޭޝް ކާލިއަ ވިދާޅުވީ"ވީޑިއޯގައި ހިމެނޭ ކޮންޓެންޓް ވެރިފައި ކުރެވިފައިވާ ކަމަށާއި އަދި ތަހުގީގުކޮށްފައިވާކަމަށެވެ."

އިންޑިއާއިން ވެރިކަންކުރާ ކަޝްމީރު ފަޅީގައި އޭޕްރީލް މަހުގެ 9 ވަނަ ދުވަހު ބޭއްވި ބައި-އިލެކްޝަންގެ ވޯޓުގެ ހަމަނުޖެހުންތަކުގައި ހަ މީހުން މަރުވެ 100 އަށް ވުރެ ގިނަ މީހުން ޒަހަމްވެފައިވާ ކަމަށް ރިޕޯޓުތައް ބުނެ އެވެ.

އިންޑިއާގެ ގާނޫނު ހަދާ މަޖިލީހުގައި އިންޑިއާއިން ވެރިކަންކުރާ ކަޝްމީރު ފަޅީގެ ވެރިރަށް ސްރީނަގަރު ތަމްސީލުކުރާ ގޮނޑިއަށް މެމްބަރަކު އިންތިޚާބު ކުރުމަށް ބޭއްވި ބައި-އިލެކްޝަންގައި ސްރީނަގަރާ ކައިރީގައިހުރި ވޯޓުލާ މަރުކަޒުތަކުގެ ތެރެއަށް މީހުން ވަދެ ހިންގި ހަމަނުޖެހުންތައް ހުއްޓުވުމަށްޓަކައި ސަލާމަތީ ބާރުތަކުން ބަޑިޖަހައިފައިވާއިރު، އާންމުން މުޒާހަރާ ކުރަމުން ދިޔައީ އިންޑިއާ އިން ވެރިކަން ކުރާ ކަޝްމީރު ފަޅީގައި ކުރާ ވެރިކަމާ ދެކޮޅަށެވެ.

ވަކިވެގަތުމަށް މަސައްކަތް ކުރާ ހަނގުރާމަވެރިން ވަނީ ވޯޓް ބޯއިކޮޓް ކުރުމަށް ވެސް ގޮވާލާފައެވެ.