މި އަހަރު އިންޑިއާގައި ބޭއްވުމަށް ހަމަޖެހިފައިވާ އައިސީސީޓީ 20 ވޯލްޑްކަޕްގައި ކުޅޭ ޕާކިސްތާނުގެ ކްރިކެޓް ޓީމަށް އިންޑިއާއަށް ދަތުރުކުރުމުގައި ވިސާ ލިބުމުގެ ދަތިތަކެއް ނުވާނެ ކަމަށް އިންޑިއާއިން ބުނެފިއެވެ.
އިންޑިއާގެ ކުޅިވަރާއި ބެހޭ ވުޒާރާއިން ބުނީ ޕާކިސްތާނުގެ ކުޅިވަރާއި ބެހޭ ވުޒާރާއާ މަޝްވަރާ ކުރުމަށްފަހު އައިސީސީޓީ 20 ވޯލްޑްކަޕްގައި ބައިވެރިވާ ޕާކިސްތާނުގެ ޓީމަށް ވިސާ ލިބުމުގައި ހުރި ދަތިތައް ހައްލު ކޮށްދެއްވާނެ ކަމަށާއި، އެކަން އިންޑިއާގެ ހާރިޖީ ވުޒާރާއިން ކުރަމުން އަންނަ ކަމަށެވެ.
އިންޑިއާގެ ކުޅިވަރާއި ބެހޭ ވުޒާރާއިން އިތުރަށް ބުނީ ޕާކިސްތާނު ޓީމުގެ ކުޅުންތެރިންނާއި އޮފިޝަލުންނަށް ވިސާ ލިބުމުގެ ދަތިކަން ހައްލުކޮށްފައިވީ ނަމަވެސް މުބާރާތް ބެލުމަށް އިންޑިއާއަށްދާ ޕާކިސްތާނު ރައްޔިތުންނަށް އަދިވެސް ވިސާގެ ދަތިކަމާއި ކުރިމަތިވާނެ ކަމަށާއި، އެހެންނަމަވެސް މުބާރާތް ފެށުމުގެ ކުރިން އެކަން ހައްލު ކުރުމަށް މަޝްވަރާ ކުރަމުން އަންނަ ކަމަށެވެ.
އިންޑިއާއިން ޕާކިސްތާނުގެ ކްރިކެޓް ޓީމަށް ވިސާ ލިބުމުގެ ދަތިކަން ހައްލުކޮށްފައިވާއިރު، މިއަހަރުގެ މުބާރާތް ވެގެންދާނީ އިންޑިއާގެ ފަސްގަނޑުގައި ޕާކިސްތާނުގެ ޓީމަކުން މި ފަހުގެ ތާރީހުގައި ކުޅޭނެ ފުރަތަމަ މުބާރާތަށެވެ. ފާއިތުވެދިޔަ 8 އަހަރު ސިޔާސީ ހޫނުކަމުގެ ސަބަބުން އިންޑިއާގައި ބާއްވާ މުބާރާތެއްގައި ޕާކިސްތާނުން ބައިވެރިވެފައެއް ނުވެއެވެ.
މިއަހަރުގެ މުބާރާތުގެ މެޗުތައް އިންޑިއާގެ ހަތް ސަރަހައްދެއްގައި ކުޅެވިގެންދާނެއެވެ. އެއީ ދެއްލީ، މުމްބާއީ، ޗެންނާއީ، ކޮލްކަޓާ، ބެންގަލޯ، ހައިދަރުއާބާދް އަދި ދަރަމްސާލާއެވެ.
