ކ. މާލެ
|
19 އޭޕްރިލް 2021 | ހޯމަ 03:00
އެޓަލާންޓާ އާއި ޔުވެންޓަސް ބައްދަލުކުރި މެޗުގެ ތެރެއިން: މި މެޗުން އެޓަލާންޓާ މޮޅުވީ 1-0 ން
އެޓަލާންޓާ އާއި ޔުވެންޓަސް ބައްދަލުކުރި މެޗުގެ ތެރެއިން: މި މެޗުން އެޓަލާންޓާ މޮޅުވީ 1-0 ން
ގެޓީ އިމޭޖަސް
އިޓާލިއަން ލީގު
ޔުވެންޓަސް ބަލިވިއިރު، އިންޓަ އެއްވަރު
 
ޔުވެންޓަސް ބަލިވީ އެޓަލާންޓާ އަތުން 1-0 ގެ ނަތީޖާއަކުން
 
އިންޓަ އާއި ނާޕޮލީ އެއްވަރުވީ 1-1 ގެ ނަތީޖާއަކުން

އިޓާލިއަން ލީގުގައި ހޮނިހިރު ދުވަހުގެރޭ އެޓަލަންޓާ އަތުން އެންމެ ފަހުގެ ޗެމްޕިއަން ޔުވެންޓަސް ބަލިވިއިރު، ނާޕޮލީ އާއި ތާވަލު އެއްވަނައިގައި އޮތް އިންޓަ މިލާން އެއްވަރުވެއްޖެއެވެ.

ރަށުން ބޭރުގައި ކުޅުނު މެޗުން ޔުވެންޓަސް ބަލިވީ އެޓަލާންޓާ އަތުން 1-0 ގެ ނަތީޖާއަކުންނެވެ.

މި މެޗުގައި އަނިޔާގެ ސަބަބުން ޔުވެންޓަސްއަށް ކުޅެމުން އަންނަ ޕޯޗުގަލުގެ ތަރި ކްރިސްޓިއާނޯ ރޮނާލްޑޯ ކުޅެފައެއް ނުވެއެވެ. މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މެޗުގެ ކުރީކޮޅު ލީޑު ނަގަން އެޓަލާންޓާގެ މަޓެއޯ ޕެސީނާއަށް ވަނީ ހުސް ފުރުޞަތެއް ލިބި ބޭކާރުވެފައެވެ.

އޭގެ ފަހުން މި މެޗުގައި ޔުވެންޓަސްގެ އަލްވާރޯ މޮރާޓާއަށްވެސް ވަނީ ލަނޑެއް ޖެހުމަށް ރަނގަޅު ދެ ފުރުޞަތެއް ލިބިފައެވެ. އެކަމަކު އެ ދެ ފުރުޞަތުގެ ބޭނުންވެސް މޮރާޓާއަށް ހިފިފައެއް ނުވެއެވެ. އަދި ދެވަނަ ހާފުގައި ހިލޭ ޖެހުމަކުން އެޓަލާންޓާގެ ރުސްލާން މަލިނޮވްސްކީ ނުރައްކާތެރި ހަމަލާއެއް އުފެއްދިއިރު، އެ ހަމަލާ ޔުވެންޓަސްގެ ގޯލްކީޕަރު ވޮސިއެޗް ޝެޒްނީ ވަނީ ހުށިޔާރުކަމާއެކު ދިފާޢުކޮށްފައެވެ. އެކަމަކު މެޗު ނިމެން ތިން މިނެޓަށް ވެފައި ވަނިކޮށް އޭރިއާ ބޭރުން ފޮނުވާލި ހަމަލާއަކުން މަލިނޮވްސްކީ ވަނީ އެޓަލާންޓާއަށް ލީޑު ނަގައިދީފައެވެ.

ނާޕޮލީ އާއި އިންޓަ ބައްދަލުކުރި މެޗުގެ ތެރެއިން: މި މެޗު އެއްވަރުވީ 1-1 ން - ގެޓީ އިމޭޖަސް

ލީގުގައި ހޮނިހިރު ދުވަހުގެރޭ ކުޅުނު މެޗުން ޔުވެންޓަސް ބަލިވިއިރު، އެއްވަނައިގައި އޮތް އިންޓަ މިލާން އެއްވަރުވީ ނާޕޮލީއާ ވާދަކޮށް 1-1 ގެ ނަތީޖާއަކުންނެވެ.

ނާޕޮލީގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީވެސް އެ ޓީމުންނެވެ. އެގޮތުން މެޗުގެ 36 ވަނަ މިނެޓުގައި ނާޕޮލީން ލީޑު ނެގިއިރު، މިއީ އިންޓަގެ ސާމިރު ހަންޑަނޮވިޗް އަތުން ބައިކޮޅަށް ވަން ލަނޑެކެވެ. އެކަމަކު ދެވަނަ ހާފު ފަށައިގެން 10 ވަނަ މިނެޓުގައި ކްރިސްޓިއަން އެރިކްސަން ވަނީ ލަނޑެއް ޖަހައި، އިންޓައަށް ނަތީޖާ އެއްވަރުކޮށްދީފައެވެ.

މި ނަތީޖާތަކާއެކު ތާވަލުގެ އެއްވަނައިގައި އިންޓަ އޮތީ ކުޅުނު 31 މެޗުން ލިބުނު 75 ޕޮއިންޓާއެކުއެވެ. ދެވަނައިގައި އޮތް އޭސީ މިލާނަށް 31 މެޗުން 66 ޕޮއިންޓް ލިބިފައިވާއިރު، ތިންވަނައިގައި އޮތް އެޓަލާންޓާއަށް 31 މެޗުން ވަނީ 64 ޕޮއިންޓް ލިބިފައެވެ. އަދި ތާވަލުގެ ހަތަރުވަނައަށް ޔުވެންޓަސް ވެއްޓުނުއިރު، އެ ޓީމަށް 31 މެޗުން ލިބިފައިވަނީ 62 ޕޮއިންޓެވެ. މީގެ އިތުރުން އިންޓައާ އެއްވަރުކުރި ނާޕޮލީ އޮތީ ތާވަލުގެ ފަސްވަނައިގައި 31 މެޗުން 60 ޕޮއިންޓާއެކުއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް