ފައިނަލުގެ ފަހު ޖާގަ ލެސްޓާއަށް

ސައުތެމްޓަން ބަލިކޮށް އިނގިރޭސި އެފްއޭ ކަޕުގެ ފައިނަލުގެ ފަހު ޖާގަ ލެސްޓާ ސިޓީން ހޯދައިފިއެވެ.

އާދީއްތަ ދުވަހުގެރޭ ކުޅުނު ސެމީ ފައިނަލް ދެވަނަ މެޗުން ލެސްޓާ މޮޅުވީ 1-0 ގެ ނަތީޖާއަކުންނެވެ.

ވެމްބްލީ ސްޓޭޑިއަމުގައި ކުޅުނު މެޗުގައި ސައުތެމްޓަނަށް ލެސްޓާ ގޯލާ އަމާޒުކޮށް ހަމަލާއެއް ފޮނުވާލެވިފައި ނުވާއިރު، ލެސްޓާއިން ވަނީ ގިނަ ހަމަލާތަކެއް އުފައްދާފައެވެ. މި މެޗުގެ ފުރަތަމަ ހާފުގައި ލަނޑެއް ފެނިފައި ނުވި ނަމަވެސް، މި ހާފުގައި ލީޑު ނަގަން ލެސްޓާގެ ޖެމީ ވާޑިއަށް ވަނީ ރަނގަޅު ފުރުޞަތެއް ލިބި ބޭކާރުވެފައެވެ. އެގޮތުން އޭރިއާ ތެރެއިން އޭނާ ފޮނުވާލި ހަމަލާ ދިޔައީ ގޯލު ދަނޑި ކައިރިން ބޭރަށެވެ.

މި މެޗުގައި ފެނިގެންދިޔަ ހަމައެކަނި ލަނޑު ލެސްޓާއިން ކާމިޔާބުކޮށްފައިވަނީ ދެވަނަ ހާފު ފަށައިގެން 10 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ކެލެޗީ އިހެނާޗޯއެވެ. އޭގެ ފަހުން ނަތީޖާ އެއްވަރުކުރަން ސައުތެމްޓަނުގެ އިބްރާހީމާ ޑިއާލޯއަށް ރަނގަޅު ފުރުޞަތެއް ލިބުނު ނަމަވެސް، އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ.

މި މޮޅާއެކު މުބާރާތުގެ ފައިނަލަށް ލެސްޓާ ދަތުރުކުރިއިރު، މިއީ 1969 ވަނަ އަހަރަށްފަހު މުބާރާތުގެ ފައިނަލުން ލެސްޓާ ޖާގަ ހޯދި ފުރަތަމަ ފަހަރެވެ.

މި ފަހަރުގެ ފައިނަލުގައި ލެސްޓާ ވާދަކުރަން ޖެހޭނީ ޗެލްސީއާއެވެ. މުބާރާތުގެ ފައިނަލުން ޗެލްސީ ޖާގަ ހޯދާފައިވަނީ ސެމީގެ ފުރަތަމަ މެޗުގައި މެންޗެސްޓާ ސިޓީ އަތުން 1-0 ގެ ނަތީޖާއަކުން މޮޅުވެގެންނެވެ. އެހެންކަމުން ފައިނަލުގައި ޗެލްސީ އާއި ލެސްޓާ ބައްދަލުކުރާއިރު، އެ މެޗު ކުޅޭނީ މެއި މަހުގެ 15 ވަނަ ދުވަހު ވެމްބްލީ ސްޓޭޑިއަމުގައެވެ.