ހަ ވޯޓު ފޮއްޓެއް އަލުން ގުނުމަށް އެމްޑީޕީން ހުށަހަޅައިފި
މިފަހަރުގެ އިންތިޚާބުގައި އާދަޔާ ޚިލާފަށް ބާތިލު ވޯޓު ގިނަކަން ހަސަން ލަތީފް ފާހަގަކުރެއްވި
އެމްޑީޕީގެ ޗެއާޕާސަން ހަސަން ލަތީފް ނޫސްވެރިންގެ ބައްދަލުވުމުގައި ވާހަކަފުޅު ދައްކަވަނީ | ރާއްޖެއެމްވީ
ލޯކަލްކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބާއި ގުޅިގެން، ހަ ވޯޓު ފޮއްޓެއްގެ މައްސަލަ އެމްޑީޕީގެ ފަރާތުން އިލެކްޝަންސް ކޮމިޝަނަށް ހުށަހަޅާފައި ވާކަމަށް، ޕާޓީގެ ޗެއާ ޕާސަން ހަސަން ލަތީފް ވިދާޅުވެއްޖެއެވެ.
އެމްޑީޕީ އޮފީހުގައި ބުދަ ދުވަހުގެ މެންދުރުފަހު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ހަސަން ލަތީފް ވިދާޅުވީ، މާލޭ ސިޓީގެ ޖުމްލަ ހަ ދާއިރާއެއްގެ ވޯޓުފޮށި އަލުން ގުނުމަށް މިހާރު ހުށަހަޅާފައި ވާކަމަށެވެ.
އެމްޑީޕީން ޝަކުވާ ހުށަހެޅި ފޮށިތަކުގެ ތެރޭގައި ހިމެނެނީ، T03 (މެދުހެންވޭރު ދާއިރާ)، T04 (ހެންވޭރު ދެކުނު ދާއިރާ) ، T05 (ހެންވޭރު ހުޅަނދު ދާއިރާ) ، T10 (މައްޗަންގޯޅި އުތުރު ދާއިރާ)، T14 (މާފަންނު އުތުރު ދާއިރާ) ، T16 (މާފަންނު ހުޅަނގު ދާއިރާ) އެވެ.
އެ ފޮށިތަކުގެ އިތުރުން، ބާތިލް ވޯޓާއި ގުޅޭ ގޮތުން ދިރާސާތަކެއްކޮށް ޖުމްލަ ހުށަހެޅުމެއް ހުށަހަޅާފައި ވާކަމަށް ހަސަން ލަތީފް ވިދާޅުވިއެވެ. އެގޮތުން، އިންތިޚާބު ކާމިޔާބުކުރި ކެންޑިޑޭޓާއި އެމްޑީޕީގެ ކެންޑިޑޭޓާ ދެމެދު ހުރި ވޯޓުގެ ފަރަގަށް ވުރެ، ބާތިލު ވޯޓުގެ އަދަދު އިތުރުކަން ފާހަގަކުރެވިފައިވާކަމަށް ވިދާޅުވިއެެވެ.
ފާއިތުވި އަހަރުތަކުގެ އިންތިޚާބުތަކާއި މި އިންތިޚާބުގެ ބާތިލް ވޯޓުގެ ބައެއް ތަފާސްހިސާބުތަކަށް އަލިއަޅުއްވާލައްވައި ހަސަން ލަތީފް ވިދާޅުވީ، މިއަހަރުގެ އިންތިޚާބުގައި އާދަޔާ ޚިލާފަށް ބާތިލް ވޯޓު ނިސްބަތުން އިތުރުވެފައި ވާކަމަށެވެ. އަދި ގިނަ ވޯޓުތަކެއް ވޯޓު ކަރުދާހުގައި ހުރިއިރު، ކެންޑިޑޭޓްގެ ހައްގު ގެއްލޭގޮތަށް، މުޅި ކަރުދާސް ބާތިލު ކޮށްފައިވާކަން ފާހަގަކުރެއްވިއެވެ.
ނިމިދިޔަ އިންތިޚާބުގެ ވޯޓުލުން ޖުމްލަގޮތެއްގައި އަމާންކޮށް ކުރިއަށްދިޔަ ކަމުގައި ވިޔަސް، އިންތިޚާބުގެ ގިނަ މައްސަލަތަކެއް ވާދަވެރި ސިޔާސީ ޕާޓީތަކުން ފާހަގަކޮށްފައި ވެއެވެ. ހަމައެހެންމެ، އިންތިޚާބުގެ ނަތީޖާ ޝީޓްތަކެއްގެ މައްސަލަ ބެލުމަށް އިލެކްޝަންސް ކޮމިޝަނުން އަންގާރަދުވަހު ކުރި މަސައްކަތަށް ހުރަސްއެޅޭނެހެން އިދިކޮޅު ޕީޕީއެމުން ހަމަނުޖެހުމެއްވެސް ހިންގާފައިވެއެވެ.
