މި ރަމަޟާން މަހަކީ ހަޔާތުގެ އެންމެ ފަހު ރަމަޟާން މަސް ކަމަށް ބަލައިގެން، ހަގީގީ މާނައިގައި މާތްﷲ ގެ އަޅަަކަށްވުމަށް ހުކުރު ޚުތުބާގައި ގޮވާލައިފިއެވެ.
'މިއީ ތިބާގެ ފަހު ރަމަޟާން މަސްކަމަށް ވެސް ވެދާނެ'' މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ މި ރަމަޟާން މަހަކީ ހަޔާތުގެ އެންމެ ފަހު ރަމަޟާން މަހަށް ވެދާނެތީ ހެޔޮ އަމަލުތައް ކުރުމަށް އަވަސްވެގަންނާށެވެ. އެގޮތުން ނަމާދުތަކަށް ރައްކާތެރިވުމާއި ދީނުގައި މަނާ ކުރައްވާފައިވާ އެއްވެސް ކަމަކާ ގާތް ނުވުމަށް ނަސޭހަތްތެރިވެ ޚުތުބާގައި ބުނީ އެފަދަ މީހަކީ ބޮޑު ބަދު ނަސީބުވެރިޔެއް ކަމަށެވެ. އަދި މާތްﷲ ވަޙީކުރައްވާފައިވާ ޤުދުސީ ޙަދީޘް ފުޅުގައި ވަޙީކުރައްވާފައިވެއެވެ. އާދަމުގެ ދަރިޔާގެ ކޮންމެ އަމަލެއް ވަނީ އޭނާއަށެވެ. ރޯދަ މެނުވީއެވެ. ފަހެ ހަމަކަށަވަރުން ރޯދަވަނީ ތިމަން ﷲ އަށެވެ. އެކަމަށް ޖަޒާ ދެއްވަނީ ތިމަން ﷲ އެވެ. ޝައްކެތްނެތް ގޮތުގައި ރޯދަވެރިޔާ ރޯދައަށް ހުންނައިރު އެ ހުންނަނީ މަތިވެރި އަޅުކަމެއްގައި ކަމަށާއި ރޯދަ ވީއްލުމަށް ދާންދެން މަލާއިކަތުންގެ ހެޔޮ ދުޢާ ރޯދަވެރިޔާއަށް ލިބިލިބި ހުންނާނެ ކަމަށް ޚުތުބާގައި ބުންޏެވެ.
ރޯދަވެރިޔާގެ ދުޢާ އަކީ ﷲ ތަޢާލާގެ ޙަޟްރަތުގައި ޤަބޫލުވެވިގެންވާ ދުޢާއެއް ކަމަށާއި ވަކިން ޚާއްސަގޮތެއްގައި ރޯދަވީއްލުމަށް ތައްޔާރުވެފައިވާ ވަގުތު ކުރާ ދުޢާ ޤަބޫލުވެވިގެންވާނެ ކަމަށް ހުކުރު ޚުތުބާގައި ބުންޏެވެ. އަދި ރަމަޟާން މަހަކީ މަދު ދުވަސްކޮޅެއްކަން ފާހަގަކޮށް ޚުތުބާގައި ބުނީ މި މަހު ކުރެވުނު ހެޔޮކަމަކުން މެނުވީ ފަހުން ފައިދާއެއް ނުކުރާނެ ކަމަށެވެ. މިދިޔަ އަހަރުގެ ރަމަޟާން މަސް އަހަރުމެންނާ ބައްދަލު ކުރިއިރު ދުނިޔެގައި ތިބި އެތައް އަޚުންނަކާއި އުޚްތުންނެއް މި ރަމަޟާން މަހާ ބައްދަލުވިއިރު ވަކިވެ ގޮސްފައިވާ ކަމަށާއި މި ރަމަޟާން މަހާ ބައްދަލުވުމަކީ ކުރިއަށް އޮތް ރަމަޟާން މަހާ ބައްދަލުވާނެކަން ޔަޤީންވާ ކަމެއް ނޫން ކަމަށް ޚުތުބާގައި ބުންޏެވެ.
ޚުތުބާގައި އިތުރަށް ބުނީ މިއީ އަޅުގަނޑުމެންގެ ތެރެއިން ބައެއް މީހުންގެ އެންމެ ފަހު ރަމަޟާން މަސް ކަމަށް ވެދާނެ ކަމަށެވެ. އެހެންކަމުން މި މަހަށް ޤަދަރުކޮށް، އިހްތިރާމްކޮށް، އަޅުކަމުގެ މަހެއްގެ ގޮތުގައި ބަލައިގަތުމަށެވެ. އަދި ޙަޤީޤަތަކީ މިއީ ކަމުގައި ވިޔަސް ބައެއް މީހުންގެ ހާލާމެދު ހިތާމަކުރަން ޖެހޭ ކަމަށެވެ. އަދި އެބައިމީހުން ވަނީ އާޚިރަތާ މެދު ޣާފިލުވެފައިވާ ކަމަށެވެ. ރަމަޟާން މަހަކީ ކިހާ މަތިވެރިވެ މަހެއްކަން އެބައިމީހުން ނުދަންނަ ކަމަށާއި ބައެއް މީހުންނަށް ހީވެފައި އޮންނަނީ މިއީ ހަމައެކަނި ތަފާތު ކެއުންތަކާއި ބުއިންތަކުގެ މަހެއް ކަމަށް ވެސް ޚުތުބާގައި ބުންޏެވެ. އަދި މިއީ ކުޅިވަރާއި މަޖަލުގެ މަހެއް ކަމަށް ވެސް އެމީހުން ދެކޭ ކަމަށާއި ރޭގަނޑު ހޭލާ ހުރެފައި ދުވާލު ހަތަރުދަމު ނިދަން އޮންނަ މަހެއް ކަމަށެވެ. އެފަދަ މީހުންނަށް ރޯދައިގެ މަޤްސަދު އޮޅިފައިވާކަން ފާހަގަކޮށް ޚުތުބާގައި ބުނީ ނަތީޖާއެއްގެ ގޮތުން ރޯދަމަހު ޒުވާބު ކުރުމާއި އަރާރުން ވުން ގިނަވެ، ކާބޯތަކެތި އިސްރާފު ކުރުމާއި ވަގުތު ބޭކާރު ކުރުން އިތުރުވެފައިވާ ކަމަށެވެ.
ދުނިޔޭގެ ދިރިއުޅުމަކީ ވަގުތީކަމެއްކަން ހަނދާންކޮށް މާދަމާވެސް ލޯ މަރާލަން ޖެހިދާނެ ކަން ދެނެ، ތައުބާވެ އިސްތިޣްފާރު ކުރުމަށް ޚުތުބާގައި ވަނީ ގޮވާލާފައެވެ. މި ބަރަކާތްތެރި ދުވަސްކޮޅުގެ ހެޔޮކަން ލިބި، މި ރަނުގެ ފުރުސަތުގެ ބޭނުން ހިފުމަށް ޚުތުބާގައި ވަނީ ނަސޭހަތްތެރިވެފައެވެ.
