ހޮނިިހިރު ދުވަހު ކުރިއަށްގެންދިޔަ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ބައި-އިލެކްޝަންގައި ޕީޕީއެމުން ވާދަކުރި 3 ގޮނޑި އެ ޕާޓީން ކާމިޔާބުކޮށްފިއެވެ.
ބައި-އިލެކްޝަން ކުރިއަށްގެންދިޔައީ 5 ރަށެއްގައެވެ. ބައި އިލެކްޝަން ކުރިއަށް ގެންދިޔައީ ނ. ކެނދިކުޅުދޫއާއި، ނ. މަގޫދޫއާއި، ހދ. ނޮޅިވަރަމާއި، ކ. ދިއްފުށި އަދި އއ. ފެރިދޫގައެވެ. މީގެ ތެރެއިން މަގޫދޫގައި ކުރިއަށްގެންދިޔައީ އިންތިޚާބުގެ 3 ވަނަ ބުރެކެވެ. އެއީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިިޚާބުގެ ބައި އިލެކްޝަންގައި ވާދަކުރި ދެ ކެންޑިޑޭޓެއްގެ ވޯޓު އެއްވަރުވުމާ ގުޅިގެންނެވެ.
މި އިންތިޚާބުގައި ޕީޕީއެމްގެ ކެންޑިޑޭޓުން ވާދަކުރީ ހދ. ނޮޅިވަރަމާއި، ނ. މަގޫދޫގެ އިތުރުން ކ. ދިއްފުށީ އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށެވެ. މި ތިންގޮނޑި އިދިކޮޅު ޕީޕީއެމްގެ ކެންޑިޑޭޓުން ކާމިޔާބު ކޮށްފައި ވާއިރު ނ. ކެނދިކުޅުދޫ ކޮމިޓީއަށް އިންތިޚާބު ކުރަންޖެހޭ 2 ގޮނޑިއަށް އިންތިޚާބުވެފައި ވަނީ އެމްޑީޕީގެ ދެ ކެންޑިޑޭޓުންނެވެ. އއ. ފެރިދޫ އަންހެނުންގެ ކޮމިޓީއަށް 4 މެމްބަރުން އިންތިޚާބު ކުރަންޖެހޭއިރު އެރަށުގެ ބައި-އިލެކްޝަންގައި ވާދަކޮށްފައި ވަނީ ހަމައެކަނި އަމިއްލަގޮތުން ވާދަކުރި މެމްބަރުންނެވެ.
އިންތިޚާބުގައި ވޯޓުލުމުގެ ހައްގު ލިބިފައިވަނީ 4937 މީހަކަށެވެ. މި އިންތިޚާބުގައި 12 ވޯޓު ފޮށްޓެއް ބަހައްޓާފައިވެއެވެ. އޭގެ ތެރެއިން ވޯޓުލީ 11 ވޯޓުފޮއްޓަކަށެވެ. އެއް ވޯޓު ފޮއްޓަށް އެއްވެސް މީހަކު ވޯޓުލާފައެއް ނުވެއެވެ.
މި ބައި އިލެކްޝަންގެ ދާއިމީ ނަތީޖާ އިއުލާން ކުރާނީ މި މަހުގެ 10 ވަނަ ދުވަހުއެވެ.
އަންހެނުންގެ ކޮމިޓީގެ އިތުރު 3 ދާއިރާއެއްގެ އިންތިޚާބު ސެޕްޓެމްބަރުގައި ބޭއްވުމަށް ވެސް ވަނީ ނިންމާފައެވެ. މީގެތެރޭގައި ހިމެނޭނީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި، އިންތިޚާބު ނުކުރެވޭ އެއް ދާއިރާއާއި އިންތިޚާބުވި ފަހުން މަގާމުން އިސްތިއުފާދިން 2 ދާއިރާއެއްގެ ބައި އިލެކްޝަނެވެ. އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ތެރެއިން ސެޕްޓެމްބަރު މަހުގެ 11 ވަނަ ދުވަހު އިންތިޚާބު ބޭއްވުމަށް ނިންމާފައިވަނީ ހދ. ނޭކުރެންދޫ، ނ. ކެނދިކުޅުދޫ އަދި ރ. މަޑުއްވަރީގައެވެ.
އަންހެނުންގެ ތަރައްޤީއަށް މަސައްކަތްކުތްކުރާ ކޮމިޓީތަކުގެ އިންތިޚާބާއި ކައުންސިލް އިންތިޚާބު ފުރަތަމަ ބާއްވާފައިވަނީ މި އަހަރުގެ އޭޕްރީލް 10 ގައެވެ.
