ކަނޑުމަގުން ރާއްޖެއަށް އެތެރެކުރި 130 ކިލޯގެ މަސްތުވާތަކެތީގެ މައްސަލައިގައި އިސްކޮށް އުޅުނުކަމަށް ތުހުމަތުކުރެވޭ، ޕީއެންސީގެ ކައުންސިލް މެމްބަރު، ޝަހީބް އިބްރާހީމް، ލައިޓްހައުސް، ގއ. ވިލިނގިލި, ބަންދުގެ މުއްދަތު ދެމެހެއްޓުމަށް ކްރިމިނަލް ކޯޓުން ނިންމައިފިއެވެ.

މި މައްސަލައިގައި ބުރާސްފަތި ދުވަހު ބާއްވާފައިވަނީ، ބަންދު މުރާޖައާކުރުމަށް ބޭއްވުނު އަޑުއެހުމެކެވެ.

ކްރިމިނަލް ކޯޓުން އޮންލައިންކޮށް ބޭއްވި އަޑުއެހުމުގައި، ދައުލަތުން ބުނީ، ޝަހީބް ބަންދުގައި ބެހެއްޓުމަށް ނިންމި ހާލަތު ދެމިއޮތް ކަމަށާއި، ބަދަލު ގެންނަން ޖެހޭ ހާލަތެއް އޮތްކަމަށް ނުފެންނަ ކަމަށެވެ. އަދި އޭނާ ބަންދުގައި ބަހައްޓާފައިވަނީ، ބަންދުން ދޫކޮށްލައިފިނަމަ މުޖުތަމައަށް ނުރައްކާވެދާނެތީ ކަމަށާއި، މައްސަލައިގެ ހެކީންނަށް ނުފޫޒު ފޯރުވުމުގެ ފުރުސަތު އޮތުމުންކަމަށް ދައުލަތުން ފާހަގަކުރިއެވެ.

މި މައްސަލައިގެ ޝަރީޢަތުގެ އަޑުއެހުމުގައި ވާހަކަދައްކަމުން، ޝަހީބު ބުނީ ނާރުގެ ޑޮކްޓަރަކަށް ދެއްކުމުން އެމްއާރްއައިއެއް ހަދާފައިވާކަމަށާއި، އޭނާގެ މައިބަދައިގެ ޑިސްކު ގުޑާފައިވާކަން ރިޕޯޓުން އެނގެން ހުރިކަމަށެވެ. އެހެންކަމުން، ކަސްރަތުކުރުމަށް  ޑޮކްޓަރު ލަފާދިން ކަމަށް ޝަހީބު ބުންޏެވެ. ޝަހީބު ބުނީ، މަހެއްހާ ދުވަސްފަހުން ކަށީގެ ޑޮކްޓަރަކަށް ދެއްކި ކަމަށާއި، ފިޒިއޯތެރެޕީ ދިނުމަށާއި މިހާރު ނިދަމުންދާ އަށީގެ ބަދަލުގައި ގޮދަޑިއެއްގައި ނިދުމަށް ލަފާދިން ކަމަށެވެ. އެކަމަކު، ޑޮކްޓަރުންގެ ލަފާގެ މަތިން ލިބެންޖެހޭ ފަރުވާ ލިބެމުން ނުދާކަމަށާއި، ކަރެކްޝަނުން އެއްވެސް ކަމަކަށް އަޅާނުލާ ކަމަށް ޝަހީބު ބުންޏެވެ.

ޝަހީބުގެ ފަރާތުން ދިފާއީ ވަކީލުވެސް ވަނީ އޭނާގެ ސިއްހީ ހާލަތު ބަޔާންކޮށް އޭނާއަށް ލިބެންވާ ފަރުވާ އެކަށީގެންވާ ގޮތެއްގައި ލިބެމުން ނުދާކަން ފާހަގަކޮށްފައެވެ. ދިފާއުން ބުނީ، ޝަހީބުއަށް ބޭނުންވާ ފަރުވާ ލިބެމުން ނުދާތީ އެކަމާ ގުޅޭގޮތުން ޝަކުވާ ހުށަހެޅުމުން، މާލޭ ޖަލުން މާފުށީ ޖަލަށް ބަދަލުކޮށްފައިވާކަމަށެވެ. އަދި އެކަން އެގޮތަށް ކުރީ، އޭނާއަށް ފަރުވާދެވޭނެ މަގު ބަންދު ކުރުމަށް ކަމަށް ދިފާއުން ތުހުމަތުކުރިއެވެ. އަދި ޝަހީބުގެ ބޭސްފަރުވާގެ ކަންކަން އެންމެ ރަނގަޅަށް ކުރިއަށް ގެންދެވޭނީ ގެއަށް ބަދަލުކޮށްގެން ކަމަށް ދިފާއީ ވަކީލު ވިދާޅުވިއެވެ.

މިކަމާ ގުޅިގެން ދައުލަތުން ވަނީ، ޖެނުއަރީ ތިންވަނަ ދުވަހުން ފެށިގެން އެކިފަހަރުމަތިން ޝަހީބް ޑޮކްޓަރަށް ދައްކާފައިވާ ތާރީޚްތައް ކިޔައިދީފައެވެ. ތަފާތު ހަ ފަހަރެއްގެ މަތިން ޑޮކްޓަރަށް ދައްކާފައިވާކަން ފާހަގަކޮށް، ޑޮކްޓަރުންގެ އިރުޝާދުގެ ދަށުން ދޭންޖެހޭ ބޭސްތައް ނަގާފައި ވާކަމަށް ދައުލަތުން ބުންޏެވެ. އަދި ކަސްރަތު ނުކުރެވޭ ކަމަށް ބުނެ ޝަހީބު ފާހަގަކުރި ނުކުތާއަށް ދައުލަތުން ބުނީ، ކުރަންޖެހެނީ ކޮންކަހަލަ ކަސްރަތެއްކަމެއް ސާފުކޮށްދީފައި ނުވާކަމަށެވެ.

މައްސަލައިގައި ދެފަރާތުން ދެކެވުނު ވާހަކަތަކަށް ރިއާޔަތްކޮށް، ޝަރީއަތުން ބުނީ، ހަ ފަހަރެއްގެ މަތިން ޝަހީބު ޑޮކްޓަރަށް ދެއްކުނުކަން ދައުލަތާއި ދިފާއުގެ ވާހަކައިން ފާހަގަކުރެވުނު ކަމަށާއި، އެހެންކަމުން ފަރުވާގެ ކަންކަން ކުރިއަށް ގެންގޮސްފައިވާކަން އޭގެން އެނގޭކަމަށެވެ. އަދި ފިޒިއޯތެރެޕީއާއި ނިދާ ތަންމަތި ބަދަލުކުރުމަށް ޑޮކްޓަރުން އެދިފައިވޭތޯ ކަށަވަރުކުރުމަށްފަހު އެކަންކަން ހަމަޖެއްސުމަށް ދައުލަތަށް ފުރުސަތު ދީފައިވެއެވެ.

މީގެ އިތުރުން، ޝަރީއަތް އަވަސްކުރުމަށްޓަކައި މައްސަލައިގައި ދައުވާ ލިބޭ އެހެން މީހުންނާ އެއްތަނެއްގައި ބެހެއްޓުމުގެ ގޮތުން، ޝަހީބް މާލޭ ޖަލަށް ބަދަލުކުރުމަށް ޝަރީއަތުން ދައުލަތަށް އަންގާފައިވެއެވެ. ޖުމްލަ ހަ މީހެއްގެ މައްޗަށް މި މައްސަލައިގައި ދައުވާ ކުރާއިރު، ޝަހީބުގެ އަޑުއެހުން ދެން ބޭއްވޭނީ މައްސަލައިގައި ދައުވާ ލިބޭ އަޙްމަދު މޫސާއާ އެކުގައި ކަމަށް މައްސަލަ ބެއްލެވި ގާޒީ ވިދާޅުވިއެވެ.

މި މައްސަލައިގައި ދެން ބޭއްވޭނީ އިބްތިދާއީ އަޑުއެހުމެވެ. އެ އަޑުއެހުން ތާވަލުކޮށްފައިވަނީ، އަންނަ މަހުގެ 6 ވަނަ ދުވަހުގެ 9:30 އަށެވެ.

ކަނޑުމަގުން ރާއްޖެއަށް އެތެރެކުރި 130 ކިލޯގެ މަސްތުވާތަކެއްޗާއެކު 7 މީހަކު ފުލުހުން ހައްޔަރުކުރީ 2020 އޮކްޓޯބަރު 12 ވަނަ ދުވަހުއެވެ. ޝަހީބް އިބްރާހީމާއި، އަހްމަދު މޫސާގެ އިތުރުން މި މައްސަލާގައި ކްރިމިނަލް ކޯޓުގައި ދައުވާކޮށްފައިވަނީ، ގއ. ވިލިނގިލި، ދުންފިނިގެ، އަސީލް މާހިރު އާއި ޅ. ހިންނަވަރު، ސެލް، އަނަސް ހުސައިންގެ އިތުރުން، ބަންގްލަދޭޝް ދެ މީހެއް ކަމަށްވާ މުހައްމަދު ރިޔާދު އާއި އިޤްބާލްގެ މައްޗަށެވެ.