"3ވީ" ޕްރޮގްރާމް ފެށުމަށް ތައްޔާރުވަމުން އަންނަނީ - މައުސޫމް
ޕްރޮގްރާމް ފެށުމަށް ރާވާފައިވަނީ މިހާރު ރާއްޖޭގައި ދިރިއުޅޭ އާބާދީއަށް ވެކްސިން ދިނުމަށްފަހު
ޓޫރިޒަމް މިނިސްޓަރ ކޮމްސެކްގައި ދެއްވި ތަގުރީރު
ރާއްޖެއަށް ޒިޔާރަތްކުރާ ފަތުރުވެރިންނަށް ވެކްސިންދިނުމުގެ ޕްރޮގްރާމެއް ފެށުމަށް ތައްޔާރުވަމުން އަންނަ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ސީއެންބީސީއަށް ދެއްވި ބަސްދީގަތުމެއްގައި މިނިސްޓަރ ވިދާޅުވީ، ރާއްޖެއަށް ޒިޔާރަތްކުރާ ފަތުރުވެރިން އިތުރުކުރުމަށް ކުރިއަށްގެންދަން ރާވާފައިވާ "3ވީ" ޕްރޮގްރާމްގެ ސަބަބުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެގެންދާނެ ކަމަށެވެ.
"ވިޒިޓް، ވެކްސިނޭޓް، ވެކޭޝަން" މި ޕްރޮގްރާމް ފެށުމަށް ރާވާފައިވަނީ މިހާރު ރާއްޖޭގައި ދިރިއުޅޭ އާބާދީއަށް ވެކްސިން ދިނުމަށްފަހު ކަމަށެވެ. މިހާރު ރާއްޖެއަށް އަންނަ ފަތުރުވެރިން ނެގެޓިވް ނަތީޖާއާއެކު އައުމުގެ ހުއްދަ ދީފައި އޮތްނަމަވެސް ކުރިއަށް އޮތް ހަފްތާއެއްހާ ދުވަހުގެ ތެރޭގައި ވެކްސިންގެ ޑޯޒް ފުރިހަމަ ކޮށްގެން ރާއްޖެއަށް އަންނަ ފަތުުރުވެރިންނަށް ހުއްދަދެއްވާނެ ކަމަށް ވިދާޅުވިއެވެ.
މިނިސްޓަރ ވިދާޅުވީ، ފަތުރުވެރިކަމުގެ ދާއިރާގައި ހަރަކާތްތެރިވާ 90 އިންސައްތަ މުވައްޒަފުން ވެކްސިން ފުރަތަމަ ޑޯޒް ފުރިހަމަ ކޮށްފައިވާ ކަމަށާއި، ރާއްޖެ އަންނަ ފަތުރުވެރިންނަށް ވެކްސިން ދިނުމުގެ މައިގަނޑު މަގްސަދަކީ، މި ހާލަތުގައި ރާއްޖެއަށް ނާދެވިފައި ތިބި ފަތުރުވެރިންނަށް އެ ފުރުސަތު ދިނުން ކަމުގައެވެ. އެހެންނަަވެސް ވަކި ތާރީޚެއް ކަނޑައަޅަން އެނގޭނީ ރާއްޖެއަށް ވެކްސިން ލިބެމުން އަންނަ މިންވަރަށް ބައްލަވާފައިކަމަށް މިނިސްޓަރ ވިދާޅުވިއެވެ.
މިއަހަރު ފެށުނު ފަހުން ރާއްޖެއަށް އަންނަ ފަތުރުވެރިންގެ އަދަދު އަންނަނީ އިތުރުވަމުންނެވެ. ޖެނުއަރީ މަހު ރާއްޖެ އައިސްފައި ވަނީ 92,103 ފަތުުރުވެރިންނެވެ. އަދި ފެބްރުއަރީ މަހު ރާއްޖެ އައިސްފައި ވަނީ 96,882 ފަތުރުވެރިންނެވެ. މާރޗް މަހު ޖުމުލަ 109،585 (އެއްލައްކަ ނުވަހާސް ފައްސަތޭކަ އައްޑިހަ ފަހެއް) ފަތުރުވެރިން ރާއްޖެއަށް ޒިޔާރަށްކުރި ކަމަށް ތަފާސް ހިސާބުތަކުން ދައްކައެވެ. މިއީ 13 އިންސައްތައިގެ ކުރިއެރުމެކެވެ.
