ޗައިނާއިން ކޮވިޑް ވެކްސިންގެ ދެ ޑޯޒަށް ތަފާތު ދެ ވެކްސިނެއް ބޭނުން ކުރުމުގެ ވިސްނުން!

ކޮވިޑް-19 އަށް ޖަހަމުން އަންނަ ވެކްސިންތަކުގެ ތެރެއިން ތަފާތު ދެ ވެކްސިނަކުން ވެކްސިންގެ ދެ ޑޯޒް ޖެހުމަށް ޗައިނާއިން ވިސްނަން ފަށައިފިއެވެ.

ޗައިނާގެ ސެންޓަރ ފޮރ ޑިޒީސް ކޮންޓްރޯލް އެންޑް ޕްރިވެންޝަން ގެ ޑައިރެކްޓަރ، ގައޯ ފޫ، ވަނީ ކޮވިޑް-19ށް އުފައްދާފައިވާ ވެކްސިންތަކުގެ ތެރެއިން އެކި ވެކްސިނުން އަސަރުކުރާވަރު ތަފާތުވުމުން، ވެކްސިނުން ކުރާ އަސަރު އިތުރުކުރުމަށް ވެކްސިންގެ ދެ ޑޯޒް ތަފާތު ދެ ވެކްސިނުން ދިނުމަށް ވިސްނަމުންދާ ކަމަށް ވިދާޅުވެފައެވެ. އެގޮތުން ވެކްސިންގެ ދެ ޑޯޒް ތަފާތު ދެ ވެކްސިނަކުން ޖެހުމުގެ ވިސްނުން ޗައިނާއިން ގެންގުޅޭއިރު، މިގޮތަށް ޖަހާނީ ހަމައެކަނި ޗައިނާގެ ވެކްސިންތޯ ނުވަތަ އެހެން ގައުމުތަކުން އުފައްދާފައިވާ ވެކްސިން ވެސް މިގޮތަށް ޖަހާނެތޯ އެގައުމުން އަދި ހާމައެއް ނުކުރެއެވެ.

ގައޯ ފޫ ވިދާޅުވާގޮތުން ތަފާތު ވެކްސިންތައް ޖެހުމުން ވެކްސިނުން މީހާއަށް އަސަރުކުރާވަރު އިތުރުވުމަކީ އެކަށީގެންވާ ކަމެކެވެ. އަދި މިގޮތަށް ވިސްނަމުންދާއިރު، ވެކްސިންގެ ޑޯޒްތަކުގެ މިނާއި ޑޯޒްތައް ޖަހާނެ ދުރުމިނަށް ބަދަލުގެނަސް އެންމެ ބޮޑަށް ވެކްސިންގެ އަސަރު ކުރާނެ ގޮތަށް ވެކްސިން ދިނުމަށް މަސައްކަތްކުރަމުން އަންނަ ކަމަށް އޭނާ ވިދާޅުވިއެވެ.

މިހާތަނަށް ހާމަކޮށްފައިވާ މައުލޫމާތުތައް ދާއްކާގޮތުން ޗައިނާގެ ވެކްސިންތަކަށް ވުރެ އެހެނިހެން ގައުމުތަކުން އުފައްދާފައިވާ ވެކްސިންތަކުން އަސަރު ކުރާ ވަރު އިތުރެވެ. އެހެން ނަމަވެސް ޗައިނާގެ ވެކްސިންތަކަކީ އެހެން ގައުމުތަކުގެ ވެކްސިންތަކަށް ވުރެ ރައްކާކޮށްފައިވާ ބަހައްޓަން ފަސޭހަ ވެކްސިންތަކެކެވެ.