ޓްރެފިކްކުރުމާއި ނާޖާއިޒް ފައިދާ ނެގުން މާނަކުރުން ފުޅާކޮށް ބިލް ފާސްކޮށްފި
ބިލް ފާސްކޮށްފައިވަނީ 57 މެމްބަރުން ވޯޓުން
ރައްޔިތުންގެ މަޖިލީހުގެ ޖަލްސާގެ ތެރެއިން
ޓްރެފިކް ކުރުމާ ނާޖާއިޒް ފައިދާ ނެގުމުގެ މާނަފުޅާކޮށް މީހުން ޓްރެފިކް ކުރުން ހުއްޓުވުމުގެ ގާނޫނަށް އިސްލާހު ގެނައުމުގެ ބިލް ރައްޔިތުންގެ މަޖިލީހުން ފާސްކޮށްފިއެވެ.
މިބިލް ސަލާމަތީ ޚިދުމަތްތަކާއި ބެހޭ ކޮމިޓީން ދިރާސާކޮށް ނިންމި ގޮތަށް ފާސްކުރުމަށް ބުދަ ދުވަހުގެ ޖަލްސާގައި ނެގުނު ވޯޓުގައި ބައިވެރިވެވަޑައިގެންނެވި 57 މެމްބަރުން ވަނީ ބިލް ފާސްކުރުމަށް ވޯޓު ދެއްވާފައެވެ. ސަރުކާރުގެ ފަރާތުން މިބިލް ހުށަހަޅުއްވާފައިވަނީ ހިންނަވަރު ދާއިރާގެ މެމްބަރ ޖީހާން މަހުމޫދެވެ.
ރައްޔިތުންގެ މަޖިލީހުން މިބިލް ފާސްކޮށްފައިވާ ގޮތަށް ބަލާއިރު މީހުން ޓްރެފިކް ކުރުން ކަމުގައި ބެލެވޭނީ މީހަކާމެދު ބާރުގެ ބޭނުންކޮށްގެން ނުވަތަ ބާރުގެ ބޭނުންކުރާނެ ކަމުގެ ބިރުދައްކައިގެން ނުވަތަ އޮޅުވާލައިގެން ނުވަތަ މަކަރު ހަދައިގެން ނުވަތަ އިތުބާރުކުރެވޭ މަގާމެއްގެ ބޭނުންކޮށްގެން ނުވަތަ މީހަކަށް ކުރިމަތިވެފައިވާ ނިކަމެތިކަމެއް ނުވަތަ ނުކުޅެދުންތެރިކަމެއްގެ ބޭނުން ހިފައިގެން ނުވަތަ ފައިސާ ނުވަތަ އެނޫންވެސް މަންފާއެއް ދީގެން ނުވަތަ ގާނޫނާއި ޚިލާފު މަޖުބޫރުކަމެއް ކުރިމަތިކުރުވައިގެން އޭނާއާ މެދު ކަންތައްތަކެއް ކުރުމެވެ.
އޭގެތެރޭގައި ހިމެނެނީ ބޭރު ގައުމަކުން ރާއްޖެއަށް ގެނައުން ނުވަތަ ބަދަލުކުރުން ނުވަތަ ރާއްޖެއިން ބޭރު ގައުމަކަށް ފޮނުވަން ނުވަތަ ބަދަލުކުރުމާއި ރާއްޖޭގެ އެއް ތަނުން އަނެއްތަނަށް ގެންދިޔުން ނުވަތަ ބަދަލުކުރުމެވެ.
މީގެއިތުރުން މީހަކާ ހަވާލުވުން ނުވަތަ އޭނާގެ ބެލުމުގެ ދަށުގައި ބެހެއްޓުންވެސް ހިމެނެނީ އެފަދަ އަމަލެއްގެ ގޮތުގައެވެ. މަސައްކަތަކަށް ނުވަތަ ވަޒީފާއަކަށް ރެކްރޫޓްކުރުންވެސް އޭގެތެރޭގައި ހިމެނެއެވެ. އަދި އެކަންކުރީ އެމީހާއާމެދު އެކްސްޕްލޮއިޓޭޝަންގެ އަމަލެއް ހިންގުމުގެ މަގްސަދުކަމުގައިވުންވެސް އޭގެތެރޭގައި ހިމެނެއެވެ.
އެކްސްޕްލޮއިޓޭޝަންގެ އަމަލެއް ހިންގުންކަމުގައި ބިލްގައި ބުނެފައިވާ ކަންތައްތަކުގެ ތެރޭގައި މަސައްކަތެއް ކުރުމަށް ނުވަތަ ޚިދުމަތެއް ފޯރުކޮށްދިނުމަށް މީހަކަށް ލާޒިމްކުރުން ހިމެނެއެވެ. އަދި އޭނާ ލައްވާ އެ މަސައްކަތް ކުރުވަނީ ނުވަތަ އެޚިދުމަތެއް ފޯރުކުރުވަނީ ވަކި ކަމަކަށް ޝަރުތުކުރުވުމަށް ފަހުގައި ކަމަށްވުމާއި އޭނާއަށް ކުރިމަތިކުރުވާފައިވާ ގާނޫނާ ޚިލާފު މަޖުބޫރުވުމެއްގެ ސަބަބުން އޭނާއަށް އެހާލަތު ނުވަތަ އެ ޝަރުތު ބަދަލުކުރުމުގެ މިނިވަންކަން ނެތުންވެސް ހިމެނެއެވެ.
މިބިލްގައި ކުޑަކުދިން ޓްރެފިކްކުރުން ކަމުގައި ވަކިކަންތައްތަކެއް ހިމަނާފައިވެއެވެ. އޭގެތެރޭގައި ބޭރު ގައުމަކުން ރާއްޖެއަށް ގެނައުން ނުވަތަ ބަދަލުކުރުން ނުވަތަ ރާއްޖެއިން ބޭރު ގައުމަކަށް ފޮނުވުން ނުވަތަ ބަދަލުކުރުން ހިމެނެއެވެ. ރާއްޖޭގެ އެއް ތަނުން އަނެއް ތަނަށް ގެންދިޔުން ނުވަތަ ބަދަލުކުރުން ހިމެނޭއިރު ކުއްޖަކާ ހަވާލުވުން ނުވަތަ އޭނާގެ ބެލުމުގެ ދަށުގައި އެފަދަ ކުއްޖެއް ބެހެއްޓުންވެސް ހިމެނެނީ ކުޑަކުދިން ޓްރެފިކް ކުރުން ކަމުގައެވެ.
ވަޒީފާއަކަށް ނުވަތަ މަސައްކަތަކަށް ރެކްރޫޓްކުރުވުންވެސް ހިމެނެނީ އެފަދަ އަމަލެއްގެ ގޮތުގައެވެ.
