އެމްޑީޕީން އީސީއަށް އެއްވެސް އިރަކު ނުފޫޒު ފޯރުވާފައެއްނުވާނެ: އެމްޑީޕީ
14 އެޕްރީލު 2021 | ބުދަ 11:45އީސީއަށް ނުފޫޒުފޯރުވައިގެން ކުރާނެކަމެއް ނޯންނާނެ
އެމްޑީޕީގެ ޗެއަރޕާސަން ހަސަން ލަތީފް
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ން އިލެކްޝަންސް ކޮމިޝަން(އީސީ)އަށް އެއްވެސް އިރަކު ނުފޫޒު ފޯރުވާފައިނުވާނެ ކަމަށާއި ނުފޫޒުނުވެސް ފޯރުވާނެކަމަށް އެޕާޓީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.
ނިމިގެންދިޔަ ލޯކަލް ކައުންސިލް އިންތިޚާބުގެ ނަތީޖާއާ ގުޅިގެން އެމްޑީޕީން އީސީއަށް ހުށަހެޅި ޝަކުވާތަކަށްފަހު އެޕާޓީގެ އޮފީހުގައި ވަނީ ނޫސްވެރިންގެ ބައްދަލުވުމެއް ބާއްވާފައެވެ. މިބައްދަލުވުމުގައި އެމްޑީޕީން އީސީއަށް ނުފޫޒުފޯރުވަން މަސައްކަތްކުރާކަމަށް އިދިކޮޅުން ވާހަކަދައްކާތީ އެކަމާއި ގުޅިގެން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ހަސަން ލަތީފް ވިދާޅުވީ އީސީއަށް ނުފޫޒު ފޯރުވައިގެން ކުރާނެ ކަމެއް ނޯންނާނެކަމަށެވެ. އަދި އީސީއަށް ޝަކުވާ ހުށަހަޅާފައިވަނީ ބައެއް ވޯޓު ފޮށިތަކުގައި ބާތިލް ވޯޓު ގިނަކަމުން ވޯޓު ބާތިލްކޮށްފައި ހުރީ ރަނގަޅަށްތޯ ޔަގީންކުރަން އެޕާޓީން ބޭނުންވާތީކަމަށެވެ. އަދި މިކަން ކުރަން ހުށަހަޅަނީވެސް ހާމަކަން ބޮޑުގޮތެއްގައި ކަމަށް ހަސަން ލަތީފް ވިދާޅުވިއެވެ.
އަދި މިކަމަކީ އެމްޑީޕީން އީސީއަށް އިތުބާރުނުކުރާތީ ކުރާކަމެއްވެސް ނޫންކަމަށް ހަސަން ލަތީފް ވިދާޅުވިއެވެ.
މީގެއިތުރުން އީސީގެ ކޮމްޕްލެއިންސް ބިޔުރޯގައި އެމްޑީޕީގެ ޓިކެޓްގައި މަޖިލީހަށް ވާދަކުރެއްވި ބޭފުޅަކު އިންނެވުމުން އެމްޑީޕީއަށް އީސީއަށް ނުފޫޒު ފޯރުވުމުގެ ފުރުސަތު ލިބިގެންނުދޭތޯ ނޫސްވެރިއަކު ދެންނެވި ސުވާލަށް ޖަވާބު ދެއްވަމުން ހަސަން ލަތީފް ވިދާޅުވީ ކޮމްޕްލެއިންސް ބިޔުރޯގައި އިންނަ އެންމެ މީހަކު ބޭނުންކޮށްގެން ނުފޫޒު ފޯރުވިދާނެކަމަށް ގަބޫލުނުކުރައްވާކަމަށެވެ.
މީގެއިތުރުން ވޯޓު އަލުން ގުނުމަށް ހުށަހެޅުމަކީ ހަމަނުޖެހުމަކަށް މަގުފަހިވާނެ ކަމެއްތޯ ނޫސްވެރިއަކު ކުރެއްވި ސުވާލަށް ޖަވާބު ދެއްވަމުން ހަސަން ލަތީފް ވިދާޅުވީ ވޯޓު އަލުން ގުނުމުން ހަމަނުޖެހުމެއް ހިނގައިގެން ނުވާނެކަމަށެވެ. އެކަން ކުރަން އެއްވެސް މީހަކު މަސައްކަތްކޮށްގެންވެސް ނުވާނެކަމަށް ހަސަން ލަތީފް ވިދާޅުވިއެވެ.
މީގެއިތުރުން އީސީގައި އަންގާރަ ދުވަހު ހިނގައިދިޔަ ކަންތައްތަކާ ގުޅޭގޮތުން ހަސަން ލަތީފް ވިދާޅުވީ ރައީސް ނަޝީދާއި އެމްޑީޕީގެ މެމްބަރުން ހިމެނޭގޮތަށް އެސަރަހައްދަށް ދިޔައީ އީސީގެ ތެރޭގައި އިދިކޮޅު ފަރާތްތަކުން ތިބުމުންކަމަށެވެ. އެއްވެސް ބަޔަކު އީސީއަށް ދަތިވާގޮތަށް އެއްވެސް ކަމެއް ކޮށްގެން ނުވާނެކަމަށް ހަސަން ލަތީފް ވިދާޅުވިއެވެ.
