ރާއްޖޭގެ ސިޔާސީ ޠަބީއަތް މިސްރާބު ޖަހާފައި ހުރީ ރަށްވެހި ފަތިހަކާ ދިމާލަށް: ރައީސް ނަޝީދު

ނިމިގެންދިޔަ ލޯކަލް ކައުންސިލް އިންތިޚާބުގެ ނަތީޖާއަށް ބަލާއިރު އެހެން އިންތިޚާބުތަކާއި މި އިންތިޚާބުގެ ނަތީޖާގައި މާބޮޑު ތަފާތެއް އައި ކަމަށް ނުފެންނަކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ކައުންސިލް އިންތިޚާބަށް ފަހު ކުރިޔަށްދާ ރައްޔިތުންގެ މަޖިލީހުގެ ފުރަތަމަ ޖަލްސާގައި އެ އިންތިޚާބާ ގުޅޭގޮތުން އެމަނިކުފާނު އެއްވެސް އެއްޗެއްް ވިދާޅުވެފައި ނުވާތީ އިދިކޮޅު ޕީއެންސީގެ މަޑުއްވަރީ ދާއިރާގެ މެންބަރު އާދަމް ޝަރީފް އެކަން ރައީސް ނަޝީދުގެ ސަމާލުކަމަށް ގެންނެވިއެވެ. އެކަމާ ގުޅިގެން ވާހަކަދައްކަވަމުން ރައީސް ނަޝީދު ވިދާޅުވީ އެއް ޕާޓީއެއްގެ ނަތީޖާ އެހާބޮޑަށް މޮޅުވެގެން ދާދިޔުން މަޖިލީހުގެ ރައީސްގެ ގޮތުން ފާހަގަކުރުން އެއީ ކޮންކަހަލަ ކަމަކަށް ވެދާނެތޯ ވިސްނަވާލެއްވުމުގެ ގޮތުން އެކަމާ ގުޅޭގޮތުން އެއްޗެއް ވިދާޅުނުވީ ކަމަށެވެ.

އެއަށްފަހު ނިމިގެންދިޔަ ލޯކަލް ކައުންސިލް އިންތިޚާބުގައި ނިކުތް ނަތީޖާ އާ ގުޅޭގޮތުން ވާހަކަދައްކަވަމުން ރައީސް ނަޝީދު ވިދާޅުވީ އެމްޑީޕީއަކީ އެންމެ ފުރަތަމަ ލާމަރުކަޒީ ނިޒާމު ފެށުނީއްސުރެ ވެސް ކައުންސިލް އިންތިޚާބުތަކުގައި ވާދަކުރަމުން އަންނަ ޕާޓީއެއް ކަމަށެވެ. އަދި ކޮންމެ އިންތިޚާބެއްގައި ވެސް އޭގެކުރީ އިންތިޚާބަށްވުރެ ބޮޑު ކާމިޔާބީއެއް އެމްޑީޕީން އަންނަނީ ހޯދަމުން ކަމަށް ނަޝީދު ވިދާޅުވިއެވެ.

އެހެންނަމަވެސް ކުރީގެ އިންތިޚާބުތަކުގެ ނަތީޖާ އާއި މިއިންތިޚާބުގެ ނަތީޖާއާ މާބޮޑު ތަފާތެއް އައި ކަމަކަށް ނުފެންނަކަމަށާއި ރާއްޖޭގެ ސިޔާސީ ޠަބީއަތް ހުރި ގޮތަށް މިސްރާބު ޖަހާފައި ހުރީ އޭގެ މަންޒިލަށް ކަމަށް ނަޝީދު ވިދާޅުވިއެވެ. އަދި އެއީ ލަފާކުރެވެނީ ރަށްވެހި ފަތިހަކަށް ކަމަށް ނަޝީދު ވިދާޅުވިއެވެ.

ނިމިގެންދިޔަ ކައުންސިލް އިންތިޚާބުގައި އެމްޑީޕީން ފާއިތުވި އިންތިޚާބުތަކުގައި ބޮޑު ކާމިޔާބީއެއް ހޯދަމުން އައި މާލެއިން ވަނީ މިފަހަރު ނާކާމިޔާބީ އާ ކުރިމަތިވެފައެވެ.

ކައުންސިލް އިންތިޚާބުގެ ވަގުތީ ނަތީޖާތައް އިލެކްޝަންސް ކޮމިޝަނުން ހާމަކުރަމުންދާއިރު އަންގާރަ ދުވަހު ނޫސްވެރިންނާ ބައްދަލުކުރައްވާ އީސީގެ ރައީސް އަހުމަދު ޝަރީފް ވިދާޅުވީ އިންތިޚާބުގެ ނަތީޖާގެ ޞައްހަކަން ކަށަވަރުކުރުމަށް 18 ފޮއްޓެއްގެ ނަތީޖާ ޝީޓް އަލުން ބަލަން ބޭނުންވާކަމަށެވެ. އެއީ އަދަދުތައް ދިމާނުވާތީވެ އެކަން ކަށަވަރުކުރުމަށްކަމަށް ޝަރީފް ވިދާޅުވިއެވެ.

އިންތިޚާބާ ގުޅޭގޮތުން ސިޔާސީ ޕާޓީތަކާއި އަމިއްލަ ފަރާތްތަކުން 80ށް ވުރެ ގިނަ ޝަކުވާ ހުށަހަޅާފައިވާއިރު އެޝަކުވާތަކުގެ ކަންކަން ބަލަމުން އަންނަ ކަމަށް ޝަރީފް ވިދާޅުވިއެވެ. ނަމަވެސް ވޯޓު އަލުން ގުނުން ފަދަ ޝަކުވާތައް ރަސްމީ ސިފައެއްގައި ބަލާނީ ވަގުތީ ނަތީޖާ އިއުލާންކުރުމަށްފަހު ކަމަށް ޝަރީފް ވިދާޅުވިއެވެ.