ރެއާލުގެ ރައީސަކަށް އަނެއްކާވެސް ޕެރޭޒް

ސްޕެއިނުގެ ގަދަބާރު ރެއާލް މެޑްރިޑުގެ ރައީސްގެ މަޤާމަށް އިތުރު ހަތަރު އަހަރަށް ފްލޮރެންޓީނޯ ޕެރޭޒް އިންތިޚާބުވެވަޑައިގެންފިއެވެ.

އުމުރުން 74 އަހަރުގެ ޕެރޭޒް އިތުރު ދައުރަކަށް ރައީސްގެ މަޤާމަށް އިންތިޚާބުވެވަޑައިގަތީ ކުރިއަށް އޮތް އިންތިޚާބުގައި ރައީސްގެ މަޤާމަށް ވާދަކުރައްވަން ކެންޑިޑެސީ ފޯމު ހުށަހެޅީ ޕެރޭޒް އެކަނި ކަމަށްވާތީއެވެ. އެހެންކަމުން އަންގާރަ ދުވަހު ރެއާލުން ވަނީ 2025 ވަނަ އަހަރުގެ ނިޔަލަށް ރެއާލުގެ ރައީސަކަށް ޕެރޭޒް އިންތިޚާބުވެވަޑައިގަތްކަން އިޢުލާން ކޮށްފައެވެ.

އެގޮތުން ރެއާލުން ނެރުނު ބަޔާނެއްގައި ބުނެފައިވަނީ އެ ކުލަބުގެ ރައީސްގެ މަޤާމަށް ޕެރޭޒްގެ އިތުރުން ޝަރުތު ހަމަވާ އެއްވެސް ކެންޑިޑޭޓަކު ކުރިމަތިލާފައި ނުވާތީ، ކުލަބުގެ އަސާސީ ގަވާއިދުގެ ދަށުން އިންތިޚާބުގައި ވާދަކުރަން ލިޔެކިޔުންތައް ހުށަހަޅަން ކަނޑައަޅާފައިވާ މުއްދަތު ހަަމަވާއިރު އެންމެ ކެންޑިޑޭޓަކު ކުރިމަތިލާފައިވާނަމަ، އަދި އެ ކެންޑިޑޭޓަކީ އެ ވަގުތުވެސް ކުލަބުގެ ރައީސް ނަމަ، އޮޓޮމެޓިކުން އެ ރައީސަކަށް އިތުރު ދައުރެއް ލިބޭނެ ކަމަށެވެ.

އެހެންކަމުން މިއީ ރެއާލުގެ ރައީސްގެ މަޤާމަށް ޕެރޭޒް އިންތިޚާބުވެވަޑައިގަތް ފަސްވަނަ ފަހަރެވެ. އެގޮތުން އެންމެ ފުރަތަމަ ރެއާލުގެ ރައީސަކަށް ޕެރޭޒް އިންތިޚާބުވީ 2000 ވަނަ އަހަރުއެވެ. އެކަމަކު ކުލަބު ހިންގުމަށް ބަދަލެއް އަންނަން ޖެހޭ ކަމަށް ވިދާޅުވެ 2006 ވަނަ އަހަރުގެ ފެބްރުއަރީ މަހު ޕެރޭޒް ވަނީ މަޤާމުން އިސްތިއުފާދެއްވާފައެވެ.

އަދި އޭގެ ފަހުން ދެވަނަ ދައުރަކަށް ރެއާލުގެ ރައީސްގެ މަޤާމާ ޕެރޭޒް ހަވާލުވެވަޑައިގެންނެވީ 2009 ވަނަ އަހަރުއެވެ. އަދި އެއަށްފަހު 2013 އަދި 2017 ވަނަ އަހަރުގެ އިންތިޚާބުވެސް ޕެރޭޒް ވަނީ ކާމިޔާބުކުރައްވާފައެވެ. އަދި އެ އިންތިޚާބުތައްވެސް ޕެރޭޒް ކާމިޔާބުކުރެއްވީ އިދިކޮޅު ކެންޑިޑޭޓަކު ނެތިއެވެ.

ޕެރޭޒްގެ ދައުރުގައި ރެއާލުން ގިނަ ކާމިޔާބީތަކެއް ހޯދާފައިވާއިރު، ޕެރޭޒްގެ މޭސްތިރިކަމުގެ ދަށުން އެ ކުލަބަށް ވަނީ ދުނިޔޭގެ މަޝްހޫރު ގިނަ ކުޅުންތެރިންތަކެއްވެސް ގެނެސްފައެވެ، އޭގެ ތެރޭގައި ބްރެޒިލުގެ ލެޖެންޑް ރޮނާލްޑޯ ނަޒާރިއޯ އާއި، ޑޭވިޑް ބެކަމާއި، ކްރިސްޓިއާނޯ ރޮނާލްޑޯ އާއި، ކަކާ އާއި ޒަބީ އެލޮންސޯވެސް ހިމެނެއެވެ. އަދި ރެއާލުގެ މިހާރުގެ ކޯޗު ޒިނެދިން ޒިދާނުވެސް ރެއާލާ ގުޅުނީ ޕެރޭޒްގެ ދައުރުގައެވެ.