ރެއާލް މެޑްރިޑުގެ ކެޕްޓަން ސާޖިއޯ ރާމޯސް ކޮވިޑް-19 އަށް ޕޮޒިޓިވްވެއްޖެއެވެ.

ރާމޯސް ކޮވިޑަށް ޕޮޒިޓިވްވެފައިވާކަން އަންގާރަ ދުވަހުގެ ވަގުތެއްގައި ރެއާލުން ވަނީ ހާމަކޮށްފައެވެ.

އުމުރުން 35 އަހަރުގެ ރާމޯސް ކޮވިޑަށް ޕޮޒިޓިވްވިއިރު، ކުޑަކަޅުވާ މަސްގަނޑަށް ލިބުނު އަނިޔާއަކާ ގުޅިގެން އޭނާ ހުރީ ކުޅުމާ ދުރުގައެވެ. ރާމޯސްގެ ކުޑަކަޅުވާ މަސްގަނޑަށް އަނިޔާވިކަން ޔަގީންވީ ފީފާ ވޯލްޑް ކަޕުގެ ޔޫރަޕް ކޮލިފައިންގައި މިދިޔަ މާޗު މަހުގައި ކޮސޯވޯ އަތުން 3-1 ގެ ނަތީޖާއަކުން ސްޕެއިން މޮޅުވި މެޗަށްފަހު ހެދި ޓެސްޓުތަކުންނެވެ. އެގޮތުން އެ މެޗުގެ ފަހުކޮޅު ރާމޯސް ކުޅެން އެރިއިރު، އެ މެޗުގެ ކުރިންވެސް ފަރިތަކުރުންތަކުގައިވެސް ކުޑަކަޅުވާ މަސްގަނޑަށް ތަދުވާކަން އިހުސާސްވި ކަމަށް ރާމޯސް ވަނީ ބުނެފައެވެ.

މި އަނިޔާއާ ގުޅިގެން ރާމޯސް ކުޅުމާ ދުރުގައި ހުންނަން ޖެހޭނެ ސީދާ މުއްދަތެއް ހާމަކޮށްފައި ނުވި ނަމަވެސް، އޭނާއަށް ވަނީ ޔުއެފާ ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި ލިވަޕޫލް އަތުން ރެއާލް މޮޅުވި މެޗު ގެއްލިފައެވެ. އަދި ބުދަ ދުވަހުގެރޭ ކުޅޭ ދެވަނަ ލެގުގައިވެސް އޭނާއަށް ނުކުޅެވޭނެއެވެ. މީގެ އިތުރުން ސްޕެނިޝް ލީގުގައި ހޮނިހިރު ދުވަހުގެރޭ ކުޅުނު އެލް ކްލަސިކޯ މެޗުގައިވެސް ރާމޯސް ކުޅެފައެއް ނުވެއެވެ. އެ މެޗުން ރެއާލް މޮޅުވީ 2-1 ގެ ނަތީޖާއަކުންނެވެ.

އަނިޔާގައި ކުޅުމާ ދުރުގައި ހުއްޓައި ރާމޯސް ކޮވިޑަށް ޕޮޒިޓިވްވިއިރު، އަނިޔާގެ ސަބަބުން މި ސީޒަނުގައި އޭނާއަށް ވަނީ ގިނަ މެޗުތަކެއް ގެއްލިފައެވެ. އެގޮތުން ކަކުލަށް ލިބުނު އަނިޔާއަކަށް ފަރުވާ ހޯދަން މިދިޔަ ފެބްރުއަރީ މަހު ރާމޯސް އޮޕަރޭޝަނެއް ކުރިއިރު، އޭނާ ކުޅުމަށް އެނބުރި އައިތާ މާގިނަ ދުވަހެއް ނުވެ އަނެއްކާވެސް މިވަނީ އަނިޔާވެފައެވެ. އެކަމަކު ކޮވިޑުން ރަނގަޅުވެ، މި މަހުގެ ފަހުކޮޅު ރާމޯސްއަށް ކުޅުމަށް އެނބުރި އާދެވޭނެ ކަމަށް ރިޕޯޓުތައް ބުނެއެވެ.

ރާމޯސް ކޮވިޑަށް ޕޮޒިޓިވްވިއިރު، މީގެ ކުރިން ރެއާލަށް ކުޅެމުން އަންނަ ފްރާންސްގެ ޑިފެންޑަރު ރަފައެލް ވަރާންވެސް ވަނީ ކޮވިޑަށް ޕޮޒިޓިވްވެފައެވެ. އަދި ވައިރަހަށް ޕޮޒިޓިވްވުމާއެކު އޭނާއަށްވެސް ވަނީ ލިވަޕޫލާ ދެކޮޅަށް ކުޅުމުގެ ފުރުޞަތު ގެއްލިފައެވެ.

މި ފަހަރުގެ ޗެމްޕިއަންސް ލީގުގެ ކުއާޓާގައި ރެއާލް ވާދަކުރާއިރު، އަމިއްލަ ދަނޑުގައި ކުޅުނު ފުރަތަމަ ލެގުގެ މެޗުން 3-1 ގެ ނަތީޖާއަކުން ލިވަޕޫލް ބަލިކޮށް، ސެމީގެ ޖާގައެއް ކަށަވަރުކުރުމާ ގާތަށް ރެއާލް ވަނީ ޖެހިލާފައެވެ. އަދި ދެވަނަ ލެގުގެ މެޗު ކުޅުމަށް އަންގާރަ ދުވަހު ރެއާލް ޓީމު އިންގްލެންޑަށް ދިޔައިރު، އެ މެޗު ކުޅޭނީ ބުދަ ދުވަހުގެރޭ ލިވަޕޫލުގެ ދަނޑުގައެވެ.