މާލެ ސިޓީގެ މެޖޯރިޓީ ނެތް ނަމަވެސް އެކަމަށް ނުބަލާ ރައްޔިތުންނަށް ޚިދުމަތް ކުރުމުގައި ދެމިހުންނާނަން - ރައީސް
12 އެޕްރީލު 2021 | ހޯމަ 10:42ޕީއެސްއައިޕީ ޕްރޮޖެކްޓުތައް ހިންގުމުގައި ވެސް ވަކި ރަށެއް އިސްތިސްނާ ކުރުމެއްނެތި މަޝްރޫއުތައް ކުރިއަށް ގެންގޮސްފައިވާނެ ކަމަށް ވިދާޅުވި
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް
މާލެ ސިޓީގެ މެޖޯރިޓީ އެމްޑީޕީއަށް ނެތް ނަމަވެސް އަދި ސަރުކާރަށް ނެތް ނަމަވެސް އެކަމަކަށް ނުބަލާ ރައްޔިތުންނަށް ކޮށްދޭންޖެހޭ ކަންކަން ކޮށްދިނުމުގައާއި ގާނޫނުގައިވާ ކަންކަން ކުރުމުގައި ސަރުކާރުން ދޭންޖެހޭ އެއްބާރުލުމާއި ފޯރުކޮށްދޭންޖެހޭ އެހީތެރިކަން ފޯރު ކޮށްދޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ހޯމަ ދުވަހު ނޫސްވެރިންނާ ބައްދަލު ކުރައްވާ ނޫސްވެރިންގެ ސުވާލަށް ޖަވާބުދެއްވަމުން ރައީސް ވިދާޅުވީ ލާމަރުކަޒީ ނިޒާމަކީ އެމްޑީޕީގެ ތަސައްވުރެއް ކަމަށެވެ. އަދި އެ ނިޒާމުގެ ދަށުން ކައުންސިލްތަކަށް ދޭންޖެހޭ އެއްބާރުލުމާއި ބާރުވެރިކަން ސަރުކާރުން ދޭނެ ކަމަށެވެ. ކޮންމެ ޕާޓީއަކަށް ނިސްބަތްވާ ކައުންސިލް މެންބަރުން ތިބި ނަމަވެސް، ކޮންމެ ޕާޓީއަކަށް އަޣުލަބިއްޔަތު އޮތް ނަމަވެސް އެ ފުރުސަތު ހަމަހަމަ ކަމާއިއެކު ދެއްވާނެ ކަމަށް ރައީސް ވިދާޅުވިއެވެ. އަދި ސަރުކާރުން ބަލާނީ ރައްޔިތުންނަށް ޚިދުމަތް ކުރުމަށްޓަކައި ބޭނުންވަނީ ކޮންކޮން ކަމެއްތޯ ކަމަށް ރައީސް ވިދާޅުވިއެވެ.
އެގޮތުން ޕީއެސްއައިޕީ ޕްރޮޖެކްޓުތައް ހިންގުމުގައި ވެސް ވަކި ރަށެއް އިސްތިސްނާ ކުރުމެއްނެތި މަޝްރޫއުތައް ކުރިއަށް ގެންގޮސްފައިވާނެ ކަމަށް ވިދާޅުވިއެވެ.
ރައީސް ވިދާޅުވީ މާލޭގެ ހުރި ކަންބޮޑުވުންތައް އެނގިވަޑައިގަންނަވާ ކަމަށެވެ. މިހާރު ދާންވީ އެ ކަންކަމުގެ ފުންމިނަށް ކަމުގައި ވިދާޅުވެ ރައީސް ވިދާޅުވީ މާލެއަށް ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަ ކަމަށެވެ. އެކަމަށް ހައްލު ހޯދުމަށްޓަކައި ސަރުކާރުގެ ސިޔާސަތުތައް މިހާރު ހާމަ ކޮށްފައިވާ ކަމަށެވެ.
އެގޮތުން އިތުރު ހައުސިންގ ޔުނިޓުތައް އެޅުމުގެ މަަސައްކަތް ކުރައްވާނެ ކަމަށާއި މާލެ ސަރަހައްދުގައި 5،000 ހައުސިންގ ޔުނިޓު އެޅުމުގެ މަސައްކަތުގެ އިތުރުން އިތުރު 13،000 ހައުސިންގ ޔުނިޓް އެޅުމަށް އަމާޒު ހިފާފައިވާ ކަމަށެވެ. ރައީސް ވިދާޅުވީ އުއްމީދު ކުރެވުނު ވަރަށް ވުރެ ރައްޔިތުންގެ މި ކަންބޮޑުވުން ބޮޑު ކަމަށެވެ.
މީގެ އިތުރުން ހިޔާ މަޝްރޫއުގެ ފްލެޓްތަކުގެ ވާހަަކަ ދައްކާއިރު އެ ފްލެޓްތައް އެޅުނު ގޮތާއި ފްލެޓުތައް ކުރިން ބަހާފައިވާ ގޮތުގެ ވާހަކަ ދެއްކިފައި ނުވާކަން ފާހަގަކުރައްވާ ރައީސް ވިދާޅުވީ ދެކެވެމުން ދަނީ މިހާރު އެ ފްލެޓުތަކާމެދު ކަން ކުރަމުން ދާ ގޮތުގެ ވާހަކަަ ކަމަށެވެ. އޭރު ވެސް ފްލެޓުތައް ބެހިފައިވަނީ އެންމެ ރަނގަޅަކަށް ނޫން ކަމަށް ވެސް ރައީސް ވިދާޅުވިއެވެ.
