ރަމަޟާންމަހުގެ ފުރަތަމަ ދުވަހަކީ އަންގާރަ ދުވަސް

ރަމަޟާން މަހުގެ ފުރަތަމަ ދުވަހަކީ 13 އޭޕްރީލް 2021 ވާ އަންގާރަ ދުވަސްކަމަށް އިސްލާމިކް މިނިސްޓްރީން ބުނެފިއެވެ.

1442 ވަނަ އަހަރުގެ ރަމަޟާންމަހުގެ ހަނދު ސާބިތުކުރުމަށް އާދިއްތަ ދުވަހުރޭ ބޭއްވި ރަސްމިއްޔާތުގައި ވާހަކަ ދައްކަވަމުން އިސްލާމިކް މިނިސްޓަރ ޑރ. އަހްމަދު ޒާހިރު އަލީ ވިދާޅުވީ، ހޯމަ ދުވަހަކީ މިއަހަރުގެ ޝައުބާން މަހުގެ 30 ވަނަ ދުވަސް ކަމަށެވެ. އަދި 13 އޭޕްރީލް 2021 ވާ އަންގާރަ ދުވަހަކީ ރަމަޟާން މަހުގެ ފުރަތަމަ ދުވަސްކަމަށް މިނިސްޓަރ ވިދާޅުވިއެވެ. މިނިސްޓަރ ވަނީ ރޯދައިގެ ފަރުޟު އަދާކުރުމަށް ފަރުވާތެރިވުމާއި، މާތްﷲ ގެ ރުއްސެވުމަށް އެދި ހެޔޮ އަމަލުތައް ގިނަކުރުމަށް ރާއްޖޭގެ ރައްޔިތުންނަށް ވަސިއްޔަތް ކުރައްވާފައެވެ.

މިއަހަރުގެ ރޯދަމަހު މާލޭގެ މިސްކިތްތަކުގައި ޖަމާއަތުގައި ތަރާވީހް ނަމާދު ކުރެވޭނެކަމަށާއި، ޖަމާއަތުގައި ނަމާދު ކުރެވޭނީ، ކޮވިޑް19 ފެތުރިފައިވާ މިންވަރަށް ބަލައި، ގައިދުރުކޮށް ސަފުހަދައިގެންކަމަށް މިނިސްޓްރީން މީގެ ކުރިން ބުނެފައިވެއެވެ.

ރަމަޟާން މަހަށް ގޭގޭގައި ދަނީ ތައްޔާރީތައް ވަމުންނެވެ. އަދި ބައެއް ވިޔަފާރިތައް ހުޅުވާ ގަޑިތަކަށް ބަދަލު ގެނެސްފައިވާއިރު، ރަމަޟާން މަހުން ފެށިގެން، ޝައްވާލްމަހުގެ ފުރަތަމަ 7 ދުވަހު، މުދާ ވިއްކާ ތަންތަން ހުޅުވާފައި ބެހެއްޓޭނެ ގަޑިއަކީ ހެނދުނު 8:00ން މެންދަމު 12:00 ކަމަށް އިކޮނޮމިކް މިނިސްޓްރީން ވަނީ ކަނޑައަޅާފައެވެ.