ރަމަޟާންމަހު އިރާނުގައި ވިޔަފާރިތަކާއި ސްކޫލުތައް ބަންދުކޮށް އެއްވެ އުޅުން މަނާވާނެކަމަށް އެގައުމުގެ ހެލްތް މިނިސްޓްރީން ހާމަކޮށްފިއެވެ.

އިރާނުގެ ވެރިރަށް ތެހްރާން ހޮނިހިރު ދުވަހުން ފެށިގެން 10 ދުވަހުގެ ލޮކްޑައުނަކަށް ގޮސްފައިވާއިރު އެގައުމަށް ކޮވިޑުގެ ހަތަރުވަނަ ރާޅެއް އައިސްފައިވާކަމަށް އެގައުމުގެ ސިއްހީ މާހިރުން ބުނެއެވެ. ބުދަ ދުވަހަކީ އިރާނުގައި ރަމަޟާންމަހުގެ ފުރަތަމަ ދުވަހުގެ ގޮތުގައި އެގައުމުގެ ސަރުކާރުން ވަނީ ކަނޑައަޅާފައެވެ.

އެގައުމުގެ ހެލްތް މިނިސްޓަރ ސައީދު ނަމާކީ ވިދާޅުވެފައިވަނީ ފިޔަވަޅުތަކަށް އަމަލު ކުރަމުން ނުދާނަމަ ގައުމުގެ ހާލަތު ނާޒުކު ހާލަތަކަށް ދާނެ ކަމަށެވެ. އިރާނުގައި ހަލުވިކަމާއިއެކު ކޮވިޑް ފެތުރެމުން އަންނައިރު އަޅަމުންދާ ފިޔަވަޅުތައް އިތުރުކޮށް ވަރުގަދަކުރުމުގެ މަސައްކަތްވެސް ކުރަމުންދާކަން އެގައުމުން ހާމަކޮށްފައިވެއެވެ.

އިރާނުން ފާއިތުވި 24 ގަޑިއިރުގެ ތެރޭގައި 258 މީހަކު މި ބަލީގައި މަރުވެފައިވާއިރު މިއީ ފާއިތުވި ޑިސެމްބަރު މަހުގެ 10 ވަނަ ދުވަހުގެ ފަހުން އެގައުމުގައި އެންމެ ގިނަ އަދަދަކަށް ކޮވިޑުގައި މީހުން މަރުވެގެން ރިޕޯޓު ކުރެވުނު ފަހަރެވެ. އިރާނުން މިހާތަނަށް 2.05 މިލިއަން މީހުންނަށް ބަލި ޖެހިގެން ރިޕޯޓުކޮށްފައިވާއިރު ކޮވިޑް ޖެހިގެން އެގައުމުން 64،232 މީހުން ވަނީ މަރުވެފައެވެ.