ވިލިމާލޭ މުހުޔިއްދީން ސުކޫލްގައި ވޯޓުލުން ކުރިއަށް ދަނިކޮށް އެ ސަރަހައްދުން މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ފުލުހުން ބުނީ ވޯޓުލުން ކުރިއަށް ދަނިކޮށް ސިކުނޑީގެ ނުކުޅެދުންދުންތެރިކަން ހުރި މީހަކު އެ ސަރަހައްދުގައި އަޑުގަދަކޮށް ހަމަނުޖެހުން ހިންގަން މަސައްކަތް ކޮށްފައިވާކަމަށެވެ. މަސްލަހަތައްޓަކައި އޭނާ ފުލުހުންގެ ބެލުމުގެ ދަށަށް މިހާރު ގެނެސްފައި ވާކަމަށް ވެސް ބުނެއެވެ.
މިކަން ހިނގާފައިވަނީ ހޮނިހިރު ދުވަހުގެ ހަވީރު 16:20 ހާއިރު ކަމަށް ފުލުހުން މައުލުމާތު ދެއެވެ.
މީގެ އިތުރުން ޣިޔާޘުއްދީން ސުކޫލްގައި ވޯޓުލުން ކުރިއަށް ދަނިކޮށް ސްކޫލް ގޯތި ތެރޭގައި އެލުވި ދޮންކެޔޮގަނޑެއްވެސް ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
ދޮންކެޔޮގަނޑު ނަގާފައިވަނީ ވޯޓުލުމާ ގުޅިގެން ކަމަށް ބެލެވިދާނޭހެން ތަކެތި ބެހުމަކީ މަނާކަމެއް ކަމުގައި ވާތީއެވެ.
