ވިލުފުއްޓަށް މާލެއިން އޮފިޝަލުން ނުފޮނުވަން ނިންމައިފި
10 އެޕްރީލު 2021 | ހޮނިހިރު 01:12ހުރިހާ ރަށެއްގައިވެސް ވޯޓުލުން ކުރިއަށް ގެންދިއުމަށް ހަމަޖެހިފައިވަނީ ހެނދުނު 7:00ން ހަވީރު 5:00ށް
އިލެކްޝަންސް ކޮމިޝަންގެ މެންބަރުން. ކައުންސިލް އިންތިޚާބު ބޭއްވުމަށް ހަމަޖެހިފައި ވަނީ އޭޕްރީލް މަހުގެ 10 ވަނަ ދުވަހު
ހޮނިހިރު ދުވަހު އޮންނަ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ އިންތިޚާބުގައި، ތ. ވިލުފުށީ ވޯޓު ފޮށީފައި ހަރަކާތްތެރިވާނެ އޮފިޝަލުން މާލޭން ނުފޮނުވާ ގޮތަށް މިހާރު ހަމަޖެހިފައިވާކަމަށް، އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވެއްޖެއެވެ.
ވިލުފުށީގައި ބަހައްޓާ ދެ ވޯޓު ފޮށީގެ ގިނަ އޮފިޝަލުންތަކެއް ކަރަންޓީނުވާން ޖެހުމާއި ގުޅިގެން، މާލެއިން އޮފިޝަލުން ފޮނުވާ ގޮތަށް އީސީން ކުރިންއޮތީ ނިންމާފައެވެ. އެގޮތަށް އީސީން ނިންމީ އެރަށުން އޮފިޝަލުން ނުލިބިގެންނެވެ. އަދި ވޯޓުލުން ފެށޭނީވެސް އޮފިޝަލުންނަށް ދެވުމުން ކަމަށް އީސީން ބުނެފައިވެއެވެ.
މިފަހަރުގެ އިންތިޚާބުގައި ހުރިހާ ރަށެއްގައި ވެސް ވޯޓުލުން ކުރިއަށް ގެންދިއުމަށް ހަމަޖެހިފައިވަނީ ހެނދުނު 7:00 ފެށިގެން ހަވީރު 5:00 އާ ދެމެދުގެ ވަގުތުގައެވެ. އެހެން ނަމަވެސް މ.ރަތްމަންދޫ އާއި ވ.ތިނަދޫގައި ވޯޓުލާން ފަށާ ގަޑި ވަނީ ލަސްކޮށްފައެވެ.
އެގޮތުން، ރަތްމަންދޫ އަދި ތިނަދޫގައި ވޯޓުލުން ފެށުމަށް ހަމަޖެހިފައިވަނީ ހެނދުނު 8:30 ގައެވެ. މިގޮތަށް ނިންމާފައިވަނީ، އެ ދެރަށުގައި ވޯޓުލުމުގައި ހަރަކާތްތެރިވާ އޮފިޝަލުން އެހެން ރަށްރަށުން އަންނަން ޖެހޭތީ ކަމަށް އީސީން މައުލޫމާތުދެއެވެ. މީގެ އިތުރުން ކަރަންޓީނުގައި ތިބި މީހުން ވޯޓުލާން ދާނެ ގަޑިތައްވެސް މިހާރު އީސީން ވަނީ ކަނޑައަޅާފައެވެ.
ކަރަންޓީނުގައި ތިބި މީހުންނަށް ވޯޓުލާން ހަމަޖެހިފައިވާ ވަގުތަކީ ހަވީރު ފަހަކުން ހަޔަކާއި ދެމެދުއެވެ. އެމީހުނަނަށް ވޯޓު ލެވޭނީ އެހެން އެންމެން ވޯޓުލާ ނިމުމުންނެވެ.
