ޓްރާންސްޕޯޓް އޮތޯރިޓީ އުވާލިޔަސް މިނިސްޓްރީގެ މައްސަލަތައް ހައްލެއް ނުވާނެ ކަމަށް ބިލަށް ބަހުސް ކުރެއްވި ބައެއް މެމްބަރުން ވިދާޅުވެއްޖެއެވެ.
ސަރުކާރުގެ ފަރާތުން، ވައިކަރަދޫ ދާއިރާގެ މެންބަރު ހުސައިން ޒިޔާދު ހުށަހަޅުއްވާފައިވާ، މޯލްޑިވްސް ޓްރާންސްޕޯޓް އޮތޯރިޓީގެ ގާނޫނު އުވާލުމުގެ ބިލުގެ ބަހުސް ނިންމާލިއިރު ސަރުކާރުން ހުށަހެޅުއްވި މިބިލަށް އަންގާރަ ދުވަހު ބަހުސް ކުރުމަށް ހުޅުވާލުމުން ވާހަކަ ދެއްކި ބައެއް މެމްބަރުންވަނީ ޓްރާންސްޕޯޓް އޮތޯރިޓީ އުވާލުމާ ދެކޮޅަށް ވާހަަކަ ދައްކަވާފައެވެ.
ވިލިފުށީ ދާއިރާގެ މެމްބަރު ހަސަން އަފީފު ވިދާޅުވީ، ޓްރާންސްޕޯޓް އޮތޯރިޓީ އުވާލިޔަސް މައްސަލަތައް ހައްލު ނުވާނެ ކަމަށާއި، އެތަން އުވާލަންޖެހޭ ސަބަބެއް ނުފެންނަ ކަމަށެވެ. އެ އޮތޯރިޓީގެ މުވައްޒަފުން ކޮރަޕްޝަންގެ އަމަލެއް ހިންގާނަމަ އެ މީހުން އިސްލާހު ކުރަން ޖެހޭ ކަމަށް ވިދާޅުވިއެވެ. އެ އިދާރާގެ މުވައްޒަފުންނާއި އެހެން ވަސީލަތްތައް ޓްރާންސްޕޯޓު މިނިސްޓްރީއަށް ބަދަލުކޮށް މިނިސްޓްރީގައި އެ މަސައްކަތްކުރުމުން މާބޮޑު ބަދަލުތަކެއް އަންނާނެ ކަމަށް ދެކެވަޑައިނުގަންނަވާކަމަށްވެސް އަފީފް ވިދާޅުވިއެވެ.
ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވީ، އެއޮތޯރިޓީގެ މައިގަނޑު މަސައްކަތްތަކުގެތެރޭގައި ކައުންސިލްތަކާ ގުޅިގެން ކުރަންޖެހޭ މަސައްކަތްތައް ހިމެނޭ ކަމަށެވެ. އޮތޯރިޓީ އުވާލައިފިނަމަ މި ބާރުތައް ޖަމާވާނީ މައި މިނިސްޓްރީތެރެއަށް ކަމަށެވެ. އެހެންވެއްޖެ ނަމަ ލާމަރުކަޒީ ގޮތުން ކައުންސިލްތަކަށް ލިބިފައި އޮތް ބާރުތައް އަނެއްކާވެސް ނެތިގެން ހިނގައިދާނެ ކަމަށެވެ.
ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ، މިގާނޫނު އުވާލުމާ ކަނޑައެޅިގެން ދެކޮޅު ކަމަށެވެ. އޭރުން ފެނިގެންފާނީ އަނެއްކާވެސް އެއް ފިޔަވަޅު ފަހަތަށް އެޅޭތަން ކަމަށާއި، ސަރުކާރަށް މިބާރުތައް ޖަމާކުރަން މަސައްކަތްކުރާނަމަ ފެނިގެނދާނީ، ރައީސް ޔާމީންގެ ސަރުކާރުގައި ފެނިގެން ދިޔަ ކަހަލަ މަންޒަރެއް ކަމަށެވެ.
ވިލިާލެ ދާއިރާގެ މެމްބަރު އަހްމަދު އުޝާމް ވިދާޅުވީ، ޓްރާންސްޕޯޓް އޮތޯރިޓީ އުވާލުމުން މިނިސްޓްރީ ތެރޭގައި ހުރި މައްސަލަތައް ހައްލުވެގެންދާނެ ކަމަށް ގަބޫލު ނުކުރައްވާ ކަމަށެވެ. އަދި މި ބިލް ހުށަހަޅުއްވާފައިއޮތީ ސީދާ ކޮންކަމަކާ ގުޅިގެންކަން ސާފު ނުވާ ކަމަށްވެސް ވިދާޅުވިއެވެ.
ޓްރާންސްޕޯޓް އޮތޯރިޓީގެ ހިންގުން ލަސްކަމަށް ވިދާޅުވެ ރައީސް އިބްރާހީމް މުހައްމަދު ސާލިހުވެސް ވަނީ ކަންބޮޑުވުން ފާޅުކުރައްވާފައެވެ.
