2022 ވަނަ އަހަރުގެ އެޕްރީލްގެ ކުރިން މުލީ އެއަރޕޯޓް ނިމޭނެ: އާޒިމް
މަޝްރޫއު ނިންމުމަށް ހަމަޖެހިފައިވަނީ 365 ދުވަހުގެ ތެރޭގައި
އެމްޓީސީސީގެ ސީއީއޯ އާދަމް އާޒިމް ވާހަކަ ދައްކަވަނީ
2022 ވަނަ އަހަރުގެ އޭޕްރިލް މަސް ނިމުމުގެ ކުރިން މ. މުލީ އެއަރޕޯޓް ނިމޭނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
މ. މުލީ އެއަރޕޯޓް ތަރައްގީ ކުރުމުގެ އަމަލީ މަސައްކަތް ފެށުމަށް އެ ރަށުގައި އަންގާރަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުން އާދަމް އާޒިމް ވިދާޅުވީ ރަންވޭ އެކަނި އެޅުމަށްފަހު މުލީގެ ރައްޔިތުންނަށް އެއަރޕޯޓް ދޫކޮށްނުލާނެ ކަމަށާއި އެމްޓީސީސީން ބުނާ ދުވަހާއި ގަޑި ދިމާ ކުރާނެ ކަަމަށެވެ. ގައުމަށް ޚިދުމަތް ކޮށްދޭން ލިބިފައިވާ ފުރުސަތުގައި ރައްޔިތުންނަށް ފުރިހަމައަށް ޚިދުމަތް ފޯރުކޮށްދޭން ޖެހޭނެ ކަމަށް ވެސް އާޒިމް ވިދާޅުވިއެވެ.
ރައީސް ބޭނުންފުޅުވަނީ އަވަސް ތަރައްގީ ގެންނަންކަން ފާހަގަކުރައްވަމުން އާޒިމް ވިދާޅުވީ ރައްޔިތުން ޓެކްސް ފައިސާ ދޭ ކަމަށާއި އެހެންކަމުން އެ ރައްޔިތުން ބޭނުންވާ މަޝްރޫއުތައް ކުރިއަށް ގެންގޮސްދޭން ޖެހޭނެ ކަމަށެވެ. އެމްޓީސީސީ އަކީ މޫސުމީ ކުންފުންޏެއް ނޫން ކަމަށާއި މިދިޔަ އަހަރު އެކަނިވެސް 38 ޕްރޮޖެކްޓްގެ މަސައްކަތް ކުންފުނިން ނިންމާފައިވާ ކަމަށް އާޒިމް ވިދާޅުވިއެވެ.
މ. މުލީ އެއަރޕޯޓް ތަރައްގީ ކުރުމުގެ މަޝްރޫއު އެމްޓީސީސީއާ ޕްލޭނިން މިނިސްޓްރީން ހަވާލުކޮށްފައިވަނީ މިއަހަރުގެ ފެބްރުއަރީ މަހުގެ 28 ވަނަ ދުވަހުއެވެ. މި މަޝްރޫއުގެ ދަށުން 14 ހެކްޓަރުގެ ބިން ހިއްކުމާއި 1812 މީޓަރުގެ ސަރަހައްދެއްގެ ގޮނޑުދޮށް ހިމާޔަތް ކުރުމާއި 1200 މީޓަރު ދިގު 30 މީޓަރު ފުޅާ ރަންވޭއެއް ގާއިމުކުރުމާއި ޓެކްސީވޭއަކާއި އޭޕްރަންއެއް އެޅުމުގެ މަސައްކަތް ކުރާނެ ކަމަށް އެމްޓީސީސީން ބުންޏެވެ.
މި މަޝްރޫއަކީ 221.733 މިލިއަން ރުފިޔާގެ މަޝްރޫއެކެވެ. މަޝްރޫއު ނިންމުމަށް ހަމަޖެހިފައިވަނީ 365 ދުވަހުގެ ތެރޭގައެވެ.
