ދާއިރާތަކަށް މެންބަރުން ކުރާ ދަތުރަކީ ރަސްމީ ދަތުރެއް
ދަތުުރުގެ ތަފްސީލާއެކު ހުއްދައަށް އެދި ލިޔުމުން މަޖިލީހުގެ އިދާރާއަށް އަންގަންވާނެ
ހައުސިން މިނިސްޓަރ އަސްލަމް | ރައްޔިތުންގެ މަޖިލިސް
ރައްޔިތުންގެ މަޖިލީހުގެ މެންބަރުން އެ މެންބަރެއްގެ ދާއިރާއަށް ކުރާ ދަތުރަކީ ރަސްމީ ދަތުރެއް ކަމަށް ކަނޑައަޅައިފިއެވެ.
އާންމު ކޮމިޓީން ނިންމާފައިވާ މި ނިންމުން އިއްވަވައި ދެއްވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ، މެންބަރުން ދާއިރާތަކަށް ކުރައްވާ ދަތުރުތަކަކީ ރަސްމީ ދަތުރުކަމަށް ކަނޑައެޅިދާނެ ކަމަށް އާއްމު ކޮމިޓީން ނިންމާފައިވާ ކަމަށެވެ. އެހެންކަމުން ދަތުރަށް އެދިވަޑައިގަންނަވާއިރު، ދަތުުރުގެ ތަފްސީލާއެކު ހުއްދައަށް އެދި ލިޔުމުން މަޖިލީހުގެ އިދާރާއަށް އަންގަންވާނެ ކަމަށެވެ. ރަސްމީ ދަތުރެއްކަމުގައި ބަލައިގަންނާނީ، މަޖިލީހުގެ އަމީންއާއްމު އެކަމަށް ހުއްދަދެއްވުމުން ކަމަށްވެސް ވިދާޅުވިއެވެ.
ހުއްދައަށް އެދިވަޑައިގަންނަވާއިރު، ދަތުރުގައި ކުރައްވާނެ މަސައްކަތްތަކުގެ ތަފްސީލު ހިމަނައި ލިޔުމުން ހުށަހަޅަން ޖެހެއެވެ.
މެންބަރު ދަތުރުގައި އުޅޭއިރު، މަޖިލީހުގެ ހާޒިރީގައި ބަލާނީ، އެެއީ އެމެންްބަރަކު ރަސްމީ ދަތުރެއްގައި އުޅޭ ދުވަހެއްގެ ގޮތުގައި ކަމަށާއި، އެދުވަސްތަކުގައި ކޮމިޓީ ބައްދަލުވުމެއްގައި ބައިވެރިވާން ބޭނުންނަމަ، ވީޑިއޯގެ ޒަރިއްޔާއިން ބައިވެރި ވެވޭނެ އިންތިޒާމް ހަމަޖެހިގެންދާނެ ކަމަށްވެސް ވިދާޅުވިއެވެ.
މަޖިލީހުގެ މެންބަރުން ކެމްޕެއިނަށް ދަތުރުކުރުމަކީ ކޮންމެހެން ކުރަންޖެހޭ ކަމެއް ކަމަށް މީގެ ކުރިންވެސް މަޖިލީހުގެ ރައީސް ވަނީ ވިދާޅުވެފައެވެ.
ކޮމިޓީގެ ނިންމުން ރަސްމީވެ، އެއަށް އަމަލުކުރާނީ މަޖިލީހުގެ ތަޅުމުން ފާސްވެގެންނެވެ.
މިއީ މަޖިލީހުގެ މެންބަރުން ދާއިރާތަކަށް ކުރާ ދަތުރުތަކަކީ މަޖިލީހުގެ ރަަސްމީ ދަތުރުތަކެއް ކަމަށް ހަދަން ފާސްކުރާ ފުރަތަމަ ފަހަރެވެ.
