ހާއްސަ ބަލިތަކަށް ބޭސްކުރާ ކުޑަކުދިންނާއި މީހުންނަށް ފައިޒާ ވެކްސިން ޖަހަން ހުޅުވާލައިފި
ފައިޒާ ވެކްސިން ދިނުމަށް ހަމަޖެހިފައި ވަނީ މާލޭގައި
ފައިޒަރ ވެކްސިން
ބައެއް ނުރައްކާތެރިބަލިތަކަށް ފަރުވާ ހޯދާ ކުޑަކުދިންނާއި ބޮޑެތި މީހުންނަށް ފައިޒާ ވެކްސިން ޖަހަން ހުޅުވާލައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާން ޑރ. ނަޒްލާ ރަފީގް ވިދާޅުވީ އެޕޮއިންޓްމަންޓް އުސޫލުން ބައެއް މީހުންނަށް ފައިޒާ ވެކްސިން ޖަހަން ފަށާފައިވާ ކަމަށެވެ. އެގޮތުން ވެކްސިން ޖަހަނީ ހަށިގަނޑުގެ ގުނަވަނެއް ބަދަލުކޮށްފައިވާ މީހުންނާއި، ޑައިލަސިސް ހަދަމުން އަންނަ މީހުންނާއި، ކެންސަރު ބަލީގެ ފަރުވާއަށް ކީމޯތެރަޕީ ހޯދަމުން އަންނަ މީހުންގެ އިތުރަށް ހަށިގަނޑުގެ ދިފާއީ ނިޒާމު ބަލިކަށި ކޮށްލާ ފަދަ ބޭހެއް ބޭނުންކުރަމުން އަންނަ މީހުން ކަމަށް ވިދާޅުވިއެވެ.
ޑރ. ނަޒްލާ ވިދާޅުވީ ފައިޒާ ވެކްސިން އަކީ އަދި 18 އަހަރުން ދަށުގެ ކުދިންނަށް ޖަހަން ރާއްޖޭގައި އާންމު ހާލަތްތަކުގައި ހުއްދަ ދީފައިވާ ވެކްސިން އަކަށް ނުވި ނަމަވެސް، އެ ހާލަތުގައި ތިބި އުމުރުން 16 އަހަރާއި 17 އަހަރުގެ ކުދިންނަށް ވެސް ވެކްސިން ޖެހުމުގެ ފުރުސަތު ހުޅުވާލާފައިވާ ކަމަށެވެ. އަދި އޭގެ އިތުރަށް އެ އުމުރު ފުރާގެ ކުދިންގެ ތެރެއިން ހަކުރު ބަލި އަދި ސިކްލް ސެލް އެނީމިއާ ހުންނަ ކުދިންނާއި، ޑައުން ސިންޑްރޯމް ސިސްޓިކް ފައިބްރޯސިސް އާއި ބައެއް އެހެން ފުއްޕާމޭގެ ބަލިތައް ހުންނަ ކުދިންނަށް ވެސް ވެކްސިން ޖެހުމުގެ ފުރުސަތު ހުޅުވާލާފައިވާ ކަމަށް ވިދާޅުވިއެވެ. އަދި މީގެ އިތުރަށް އުފެދުމުގައި ހިތުގެ ބައްޔެއް ހުރެ އެކަން ރަނގަޅުކުރަން ސަރޖަރީއެއް ހަދާފައިވާ ކުދިންގެ ތެރެއިން ރަނގަޅު ނުވާ އެ އުމުރުފުރައިގެ ކުދިންނަށް ފައިޒަރ ވެކްސިން ޖެހޭނެ ކަމަށް ވެސް ވިދާޅުވިއެވެ.
ކޮވެކްސް ފެސިލިޓީގެ ދަށުން ރާއްޖެއަށް މިހާރު ފައިޒާ ވެކްސިންގެ 5500 ޑޯޒް ލިބިފައިވާއިރު ފައިޒާ ވެކްސިނަކީ 70- ޑިގްރީގައި ބަހައްޓަން ޖެހޭ ވެކްސިނަކަށް ވާތީ ފައިޒާ ވެކްސިން ދިނުމަށް ހަމަޖެހިފައި ވަނީ މާލޭގައެވެ.
ރާއްޖޭގައި މިހާރު އާންމު އުސޫލުން ބޭނުންކުރަމުން އަންނަނީ އިންޑިއާގެ ކޮވިޝީލްޑް ވެކްސިންއާއި ޗައިނާގެ ސިނޮފާމް ވެކްސިންއެވެ. އޭގެ ތެރެއިން މިހާތަނަށް ދެ ލައްކަ އަށް ވުރެ ގިނަ މީހުން ކޮވިޝީލްޑް ވެކްސިންްގެ ފުރަތަމަ ޑޯޒު ޖަހާފައިވާއިރު މިދިޔަ މަހުގެ 15ން ފެށިގެން ޖަހަމުން އަންނަނީ ސިނޮފާމް ވެކްސިންގެ ފުރަތަމަ ޑޯޒެވެ. އަދި ކޮވިޝީލްޑް ވެކްސިންގެ ދެވަނަ ޑޯޒު ޖެހުން މިހާރު ވަނީ ފަށާފައެވެ. މިހާރު ވެކްސިން ޖަހާ މީހުންގެ ތަފާސްހިސާބުތަކަށް ބަލާއިރު ވެސް ގިނައީ ދެވަނަ ޑޯޒު ޖަހާ މީހުންނެވެ. މިހާތަނަށް ރާއްޖެއިން 246،896 މީހުން ވެކްސިން ޖަހާފައިވާއިރު އޭގެ ތެރެއިން 3،737 މީހުންނަކީ ދެވަނަ ޑޯޒު ޖަހާފައިވާ މީހުންނެވެ.
ރާއްޖޭގައި މިވަގުތު ބޭނުންކުރުމަށް ހުއްދަ ދީފައި ވަނީ ކޮވިޝީލްޑް ވެކްސިން އާއި، ސިނޮފާމް އަދި ފައިޒާ ވެކްސިންއެވެ.
