ޕްރޮޑަކްޝަން މަޑުޖައްސާލަފައި އޮތް ނަމަވެސް މަސްވެރިންނަށް އެއްވެސް ދައްޗަކާއި ކުރިމަތިލާކަށް ނުޖެހޭނެ: މިފްކޯ
އެސެސްމެންޓްގެ މަސައްކަތް ނިމުނުހާ އަވަހަކަށް ޕްރޮޑަކްޝަންގެ މަސައްކަތް ފަށާނެ
ފެލިވަރު މަސް ފެކްޓަރީ، ކޮވިޑަށް ގިނަ މުވައްޒަފުންތަކެއް ޕޮޒިޓިވްވުމާއި ގުޅިގެން ޕްރޮޑަކްޝަންގެ މަސައްކަތް ވަނީ ހުއްޓާލާފައި
ކޮވިޑް-19ގެ ކޭސްތަކާއި ގުޅިގެން ފެލިވަރުގައި ޕްރޮޑަކްޝަން މިވަގުތަށް މަޑުޖައްސާލަފައި އޮތް ނަމަވެސް މަސްވެރިންނަށް އެއްވެސް ދައްޗަކާއި ކުރިމަތިލާން ނުޖެހޭނެ ކަމަށް މިފްކޯއިން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މިފްކޯގެ ޖެނަރަލް މެނޭޖަރު އަހުމަދު ނަވާޒު ވިދާޅުވީ ކޮވިޑް-19ގެ ކޭސްތައް ފެނުމާއި ގުޅިގެން މިހާރު ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ޓީމްއާއެކު ބަލަންޖެހޭ ކަންކަން ބެލުމުގެ މަސައްކަތްތައް ކުރިއަށްދާ ކަމަށެވެ. އެގޮތުން މިހާރު ހާލަތު ދެނެގަތުމުގެ މަސައްކަތްތައް ކުރިއަށްދާ ކަމަށާއި، އެސެސްމެންޓް ހަދަމުންދާ ކަމަށް ނަވާޒު ވިދާޅުވިއެވެ.
މިވަގުތު ފެލިވަރުގައި ޕްރޮޑަކްޝަންގެ މަސައްކަތްތައް ކުރިއަށް ނުދާކަން ފާހަގަކުރައްވައި ނަވާޒު ވިދާޅުވީ އެސެސްމެންޓް ހަދާ ނިމުމުން މަސައްކަތް ފެށޭނެ ކަމަށް އުންމީދުކުރާ ކަމަށެވެ. އަދި ވިދާޅުވީ ޕްރޮޑަކްޝަންގެ މަސައްކަތްތައް ކުރިއަށް ނުދިޔަ ނަމަވެސް މަސްވެރިންނަށް ދޭން ޖެހޭ ޚިދުމަތްތައް ދެމުންދާ ކަމަށާއި، ބަނދަރުގައި ހުރި ބޯޓު ފަހަރު ފުލް ކެޕޭސިޓީ ހަމަވަންދެން މަސްގަތުމުގެ މަސައްކަތް ކުރިއަށް ގެންދާނެ ކަމަށެވެ. އެގޮތުން މަސްކިރުމާއި، އައިސްގެ އިތުރުން ތެޔޮ ވިއްކަމުންދާ ކަމަށް އޭނާ ވިދާޅުވިއެވެ.
ކޮވިޑް-19އާ ގުޅިގެން މިފްކޯ ވަނީ ވަރަށް ބޮޑަށް އެހާލަތަށް ތައްޔާރުވެފައެވެ. މިފަދަ ހާލަތެއް ކުރިމަތިވެދާނެކަމަށް ލަފާކޮށް ޚާއްސަ އެސްއޯޕީއެއް ނެރިފައިވެއެވެ. މިއެސްއޯޕީއާ އެއްގޮތަށް ކުރީބައިގައި ޕްރޮޑަކްޝަން ވަނީ ނިންމާފައިވާތީ ކުރިއަށް އޮތް ތިން މަހުގެ ތެރޭގައި ވެސް އެއްވެސް ދައްޗަކާއި ނުލާ ޕްރޮޑަކްޓްތައް ނެރެވޭނެކަން ނަވާޒު ފާހަގަކުރެއްވިއެވެ.
މާރިޗް 24ވަނަ ދުވަހުން ފެށިގެން ފެލިވަރު މޮނިޓަރިން ހާލަތަށް ގެނެސްފައިވާއިރު، ޕޮޒިޓިވްވި މީހުންނަށް ފެލިވަރު އައިސޮލޭޝަން ފެސިލިޓީގައި ފަރުވާ ދެމުން އަންނަ ކަމަށާއި، ހުރިހާ އެންމެންގެ ހާލުވެސް ރަނގަޅު ކަމަށް މިފްކޯއިން މައުލޫމާތުދެއެވެ.
މިފްކޯއިން ބުނީ އެ ކުންފުނީގެ ހުރިހާ ސައިޓްތަކެއްގައިވެސް އެޗްޕީއޭގެ ގައިޑްލައިނާ އެއްގޮތަށް އަމަލުކުރަމުން އަންނަ ކަމަށެވެ.
