އާދިއްތަ ދުވަހު ވެކްސިން ޖަހާނީ ފެބްރުއަރީ 1ން 7ށް ފުރަތަމަ ޑޯޒް ޖެހި މީހުން

އާދިއްތަ ދުވަހު ދެވަނަ ޑޯޒްގެ ވެކްސިން ޖަހައިދޭނީ ފެބްރުއަރީ 1ން 7ށް ފުރަތަމަ ޑޯޒް ޖެހި މީހުންނަށް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

ކޮވިޑް-19 އާއި ގުޅިގެން ރާއްޖެއަށް އިންޑިއާއިން ހަދިޔާކުރި ކޮވިޝީލްޑް ވެކްސިން ފެބްރުއަރީ މަހުގެ 1 ވަނަ ދުވަހު ޖަހަން ފަށާފައިވާއިރު، އެ ވެކްސިންގެ ދެވަނަ ޑޯޒް ހޮނިހިރު ދުވަހުން ފެށިގެން ވަނީ ޖަހަން ފަށާފައެވެ. އެގޮތުން ހޮނިހިރު ދުވަހު ވެކްސިންގެ ދެވަނަ ޑޯޒް މާލެ ސަރަހައްދުގައި ޖަހަން ފަށާފައިވާ އިރު، އެ ދުވަހު ޖަހާފައިވަނީ ފެބްރުއަރީ މަހުގެ 1 ވަނަ ދުވަހާއި 3 ވަނަ ދުވަހާއި ދެމެދު ވެކްސިން ޖެހި މީހުންނަށެވެ.

އެޗްޕީއޭއިން ހޮނިހިރު ދުވަހުގެރޭ އެ އެޖެންސީގެ ކޮމިއުނިޓީ ވައިބަރ ގްރޫޕުގައި އާންމު ކުރި މެސެޖުގައި  ބުނެފައިވަނީ ދެވަނަ ޑޯޒް ޖެހުމުގެ ޕްރޮގްރާމުގެ ތެރެއިން އާދީއްތަ ދުވަހު ވެކްސިން ޖަހާނީ ފެބްރުއަރީ މަހުގެ 1 ވަނަ ދުވަހާއި 7 ވަނަ ދުވަހާއި ދެމެދު ވެކްސިން ޖެހި މީހުންނަށް ކަމަށެވެ.

ފެބްރުއަރީ މަހުގެ 1ން 7 ވަނަ ދުވަހާ ހަމައަށް މުޅި ރާއްޖެއިން 9752 މީހުން ކޮވިޝީލްޑްގެ ފުރަތަމަ ޑޯޒްގެ ވެކްސިން ޖަހާފައިވެއެވެ. މީގެ ތެރޭގައި ހިމެނެނީ މާލެ ސަރަހައްދުން ވެކްސިން ޖެހި 7963 މީހުންނާއި، އަތޮޅު ތެރެއިން ވެކްސިން ޖެހި 1789 މީހުންނެވެ.

ޑަބްލިއުއެޗްއޯގެ ގައިޑްލައިންގައި ބުނާ ގޮތުން، ކޮވިޝީލްޑް ވެކްސިންގެ ފުރަތަމަ ޑޯޒް ޖަހާ ފަހުން އެ ވެކްސިންގެ ދެވަނަ ޑޯޒް ޖެހުން އެންމެ ރަނގަޅީ ފުރަތަމަ ޑޯޒް ޖަހާފަހުން 8 ހަފްތާއާއި 12 ހަފްތާއާއި ދެމެދުގެ މުއްދަތުގެ ތެރޭގައެވެ.

ދެވަނަ ޑޯޒް ދިނުން ކުރިއަށް ދާނީ ސޯޝަލް ސެންޓަރ، ނެޝެނަލް އާޓް ގެލެރީ، ހުޅުމާލެ ވެކްސިނޭޝަން ސެންޓަރ (ކުރީގެ ފްލޫ ކްލިނިކް) އަދި ސެނަހިޔާގައި ހެނދުނު 10:00ން ފެށިގެން މެންދުރުފަހު 3:00ށެވެ. ވިލިމާލެ ޒުވާނުންގެ މަރުކަޒުގައި ވެކްސިންގެ ދެވަނަ ޑޯޒް ދޭނީ ހެންދުނު 10:00ން ފެށިގެން މެންދުރު 2:00ށެވެ.

މާލެ ސަރަހައްދުގައި ދޭން ފަށާފައިވަނީ ކޮވިޑްޝީލްޑް ވެކްސިންގެ ދެވަނަ ޑޯޒެެވެ.

އެޗްޕީއޭއިން ވަނީ ވެކްސިން ޖަހަން އަންނައިރު ވެކްސިން ކާޑާއެކު އައި.ޑީ ކާޑު ނުވަތަ ޕާސްޕޯޓް ނުވަތަ ލައިސަންސް ކާޑު ގެންނަން ވާނެކަމަށް ބުނެފައެވެ. ކޮވިޑް-19 އިން ދިފާއުވުމަށް ޖަހާ ވެކްސިންގެ ފުރަތަމަ ޑޯޒް ދިނުން މާލެ ސަރަހައްދުގައި، ހޮނިހިރު ދުވަހުން ފެށިގެން ދެން ކުރިއަށްދާނީ ރައްޔިތުންގެ މަޖިލީހާއި ޓްރީ ޓޮޕް ހޮސްޕިޓަލުގައި ހެންދުނު 10:00 ފެށިގެން މެންދުރުފަހު 3:00ށެވެ.

ރަމަޟާން މަސް ފެށުމުގެ ކުރިން ވެކްސިން ޖެހޭ އުމުރުފުރައިގެ ހުރިހާ އެންމެނެވެސް ފުރަތަމަ ޑޯޒް ޖެހުމަށް އެޗްޕީއޭއިން ވަނީ އިލްތިމާސް ކޮށްފައެވެ.