އިޓާލިއަން ލީގުގައި ހޮނިހިރު ދުވަހުގެ ހަވީރު ކުޅުނު މެޗުން ސަމްޕްޑޯރިއާ އަތުން ފަހު ވަގުތު އޭސީ މިލާން ބަލިނުވެ ސަލާމަތްވެއްޖެއެވެ.

މިލާނުގެ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން 12 ވަނަ މިނެޓުގައި ސަމްޕްޑޯރިއާއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ފަބިއޯ ކުއާގްލިއަރެއްލާއެވެ. އެކަމަކު މި މެޗުގައި ސަމްޕްޑޯރިއަށް މައްސަލަތަކެއް ކުރިމަތިވީ އޭގެ ދެ މިނެޓު ފަހުން އެ ޓީމުގެ އޭޑްރިއަން ސިލްވާއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ.

އެއާއެކު މިލާނުން ކުޅުން ރަނގަޅުކުރިއިރު، އެ ޓީމުން ނަތީޖާ އެއްވަރުކޮށްފައިވަނީ މެޗު ނިމެން ތިން މިނެޓަށް ވެފައި ވަނިކޮށެވެ. މި ލަނޑު މިލާނަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޔެންސް ޕެޓާ ހޫގާއެވެ.

މި ނަތީޖާއާއެކު މިލާން އޮތީ ތާވަލުގެ ދެވަނައިގައި ކުޅުނު 29 މެޗުން ލިބުނު 60 ޕޮއިންޓާއެކުއެވެ. ތާވަލުގެ އެއްވަނައިގައި އޮތް އިންޓަ މިލާނަށް 27 މެޗުން 65 ޕޮއިންޓް ލިބިފައިވާއިރު، ތިންވަނައިގައި އޮތް އެޓަލާންޓާއަށް 29 މެޗުން ވަނީ 58 ޕޮއިންޓް ލިބިފައެވެ. އަދި މިލާނާ އެއްވަރުކުރި ސަމްޕްޑޯރިއާ އޮތީ ތާވަލުގެ 10 ވަނައިގައި 29 މެޗުން 36 ޕޮއިންޓާއެކުއެވެ.