ތިންހާސް އަހަރު ކުރިން މަރުވެފައިވާ ރަސްރަނިންގެ ޕެރޭޑެއް

މީގެ 3000 އެތައް އަހަރެއް ކުރިން މަރުވެފައިވާ ރަސްރަނިންގެ ޕެރޭޑެއް މިސްރުގައި ބޭއްވުމުގެ ފަހުގެ ތައްޔާރީތައް ނިމިއްޖެއެވެ.

ހޮނިހިރުދުވަހުގެ ރޭ މިސްރުގެ ވެރިރަށް ގާހިރާގެ މަގުތަކުގައި ބޭއްވޭ ޕެރޭޑުގައި ކުނިނުވާގޮތަށް ހަދާފައިވާ ޖުމްލަ 22 ރަސްރަސްކަލުންނާއި ރަނިންގެ ގަބުރު ބައިވެރިކޮށްފައިވެއެވެ. މި ޕެރޭޑަކީ ފުސްތާތުގެ އާ ދާރުލްއާސާރަށް ގަބުރުތައް އުފުލުމަށް ބޭއްވޭ ޕެރޭޑެކެވެ.

މިސްރުގެ ތަހުރީރު މައިދާނުގައި ހުންނަ ދާރުލްއާސާރުން، ޕެރޭޑަށް މި ގަބުރުތައް ނެރޭނީ ރަސްމީ އިއްޒަތުގައެވެ. ކޮންމެ ގަބުރެއް ވެސް އުފުލާނީ ޖަރީކޮށްފައިވާ އުޅަނދެއްގައެވެ. އެއިން ކޮންމެ އުޅަނދެއްގެ ވަށައިގެން ތަފާތު ހަރަކާތްތަކެއް ފެނިގެންދާނެއެވެ. އެގޮތުން ޒާތްޒާތުގެ ހެދުން އަޅައިގެން ތިބޭ މީހުނާއި، އަސްތަކާއި، މިއުޒިކީ ހަރަކާތްތައް ކޮންމެ އުޅަނދެއްގެ ވަށައިގެން ފެނިގެންދާނެކަމަށް މިސްރުގެ ކަމާބެހޭ އިދާރާތަކުން ބުނެއެވެ.

"ފެރޯސް ގޯލްޑެން ޕެރޭޑް" ގެ ނަމުން ނަންދެވިފައިވާ މި ޕެރޭޑުގައި ނީލަކޯރުގެ އައްސޭރިފަށުން ކުރީގެ ވެރިރަށް އަލްފުސްތާތުގައި އަލަށް ބިނާކުރި ގައުމީ ދާރުލްއާސާރަށް، ގަބުރުތައް އުފުލޭނެއެވެ.

މި ޕެރޭޑުގައި އުފުލޭނީ، 17 ވަނަ ގަރުނާއި 20 ވަނަ ގަރުނާއި ދެމެދު ވެރިކަންކުރި 18 ރަސްކަލުންނާއި، ހަތަރު ރަނިންގެ ގަބުރެވެ. މިތަނުން ގިނަ ގަބުރު ފެނިފައިވަނީ، 1800ގެ އަހަރުތަކުގެ ފަހުކޮޅުގައެވެ.

ޕެރޭޑުގައި އުފުލޭ ގަބުރުތަކުގެ ތެރޭގައި، ރަމްސީސް-2 (19 ވަނަ ސުލާލަތުގެ ތިންވަނަ ފިރްއައުނު) އާއި، އަހްމަސު ނިފްތާރީ (18 ވަނަ ސުލާލަތުގެ ދެވަނަ ފިރްއައުނުގެ މަންމަ) އާއި، ރަމްސީސް 5 ( 12 ވަނަ ސުލާލަތުގެ ހަތަރުވަނަ ފިރްއައުނު) ގެ ގަބުރު ފާހަގަކޮށްލެވެއެވެ.

ތާރީޚީ މި ހަރަކާތަކީ، ކޮވިޑް ބަލިމަޑުކަމާ ގުޅިގެން މިސްރުގެ ފަތުރުވެރިކަމަށް ލިބުނު ހީނަރުކަމުން އަރައިގަތުމަށް ސަރުކާރުން ހިންގާ ޚާއްސަ ހަރަކާތެކެވެ. މީގެ ސަބަބުން، މިސްރުގެ ފަތުރުވެރިކަމުގެ ސިނާއަތަށް ބޮޑެތި ކުރިއެރުންތަކެއް ލިބޭނެ ކަމަށް މާހިރުން ލަފާކުރެއެވެ.