ވެލާނާ އިންޓަރނޭޝަނަލް އެއާރޕޯޓްގެ ޓާރމިނަލްގެ މަސައްކަތުގައި އުޅޭ ބިދޭސީންތަކެއްގެ މެދުގައި ބޮޑު މާރާމާރީއެއް ހިނގައިފި އެވެ.

ފުލުހުން ބުނީ މި މާރާމާރީ ހިނގާފައި ވާކަމުގެ މައުލޫމާތު ލިބިފައި ވަނީ ބުދަ ދުވަހުގެ ހަވީރު 16:49 ކަންހާއިރުގައި ކަމަށާއި މި މާރާމާރީ ހިނގާފައި ވަނީ ވީއައިއޭގެ ޓާރމިނަލްގެ މަސައްކަތުގައި އުޅުނު ބިދޭސީންތަކެއްގެ މެދުގައި ޖެހުނު މައްސަލައަކާއި ގުޅިގެން ކަމަށެވެ. ނަމަވެސް ޖެހުނީ ކޮން މައްސަލައެއް ކަމެއް ހާމައެއް ނުކުރެއެވެ.

ފުލުހުން ވިދާޅުވީ މި މާރާމާރީގައި ތިން ބިދޭސީއަކަށް އަނިޔާވެފައިވާ ކަމަށާއި އަނިޔާވެފައި ވަނީ މިސްރުގެ ދެ މީހަކާއި ބަނގްލަދޭޝް މީހަކަށް ކަމަށެވެ. ނަމަވެސް މީގެން އެއްވެސް މީހަކަށް ސީރިއަސް އަނިޔާއެއް ވެފައި ނުވާކަމަށް ފުލުހުން ވިދާޅުވިއެވެ.

ފުލުހުން ވިދާޅުވި ގޮތުގައި މާރާމާރީގައި އަނިޔާވި އެއް ބަޔަކަށް ފަރުވާ ދެމުން ދަނީ ހުޅުމާލެ ހޮސްޕިޓަލުންނެވެ. އަނެއް ބަޔަކަށް ޓްރީޓޮޕް ހޮސްޕިޓަލުންނެވެ.

ޓާރމިނަލްގެ މަސައްކަތް ކުރަމުން ދަނީ ސައުދީ ބިންލާދިން ގްރޫޕާއި، ސަބް ކޮންޓްރެކްޓަރެއްގެ ގޮތުގައި މަސައްކަތް ކުރާ ޗައިނާ ކޮމިއުނިކޭޝަން ކޮންޓްރަކްޝަން ކޮމްޕެނީ (ސީސީސީސީ) އިންނެވެ. މި މާރާމާރީ ހިނގަން މެދުވެރިވި ސަބަބެއް ވެސް އަދި ސާފެއް ނުވެ އެވެ.

ފުލުހުންގެ ޚިދުމަތުން ދަނީ މި މައްސަލަ ބަލައި ތަހުގީގު ކުރަމުން ނެވެ.

ރާއްޖޭގައި ދިރިއުޅޭ ބިދޭސީންގެ މެދުގައި މީގެ ކުރިން ވެސް ނުރައްކާތެރި މާރާމާރީތައް ހިނގައި، ބައެއް މީހުންގެ ފުރާނަ ގެއްލިފައިވެސްވެއެވެ.