މީގެ ކުރިން ކޮވިޑް-19 އަށް ޕޮޒިޓިވްވިކަން ހާމަކޮށްފައިވާ އިންޑިއާގައި މިހާތަނަށް އުފެދުނު އެންމެ މޮޅު ކްރިކެޓް ކުޅުންތެރިޔާ ސަޗިން ޓެންޑުލްކާ ހޮސްޕިޓަލުގައި އެޑްމިޓްކޮށްފިއެވެ.
ކޮވިޑަށް ޕޮޒިޓިވްވިކަން އުމުރުން 47 އަހަރުގެ ސަޗިން ހާމަކޮށްފައިވަނީ މިދިޔަ ފެބްރުއަރީ މަހުގެ 27 ވަނަ ދުވަހުއެވެ. އެ ފަހަރު ސަޗިން ބުނެފައިވާ ގޮތުން ކޮވިޑުގެ އަލާމަތްތައް ކޮންމެވެސް ވަރަކަށް ހަށިގަނޑުން ފެންނަށް އެބަހުއްޓެވެ. އެހެންކަމުން ޑޮކްޓަރުގެ އިރުޝާދުގެ ދަށުން، އޭނާ ވަނީ އަމިއްލައަށް ގޭގައި އެ ފަހަރު ކަރަންޓީނުވެފައެވެ.
އެކަމަކު ހާލަތު ގޯސްވެ ސަޗިން ވަނީ ހުކުރު ދުވަހު މުމްބާއީގެ ހޮސްޕިޓަލެއްގައި އެޑްމިޓްކޮށްފައެެވެ. ސަޗިން ކުރި ޓުވީޓެއްގައި ބުނެފައިވަނީ ހޮސްޕިޓަލަށް ދިޔައީ "ޑޮކްޓަރުގެ ލަފާގެ މަތިން" ރައްކާތެރިކަމުގެ ފިޔަވަޅެއްގެ ގޮތުގައި ކަމަށެވެ.
ކޮވިޑާ ގުޅިގެން ސަޗިން ހޮސްޕިޓަލުގައި އެޑްމިޓްކުރިއިރު، ފާއިތުވެދިޔަ އެއް އަހަރު ދުވަހު ދޭތެރެ ދޭތެރެއިން އަމިއްލައަށް ކޮވިޑަށް ޓެސްޓުކުރަމުން ގެންގޮސްފައިވާ ކަމަށް ސަޗިން މީގެ ކުރިން ވަނީ ބުނެފައިވެއެވެ.
ސަޗިންނަކީ އިންޑިއާގެ ޤައުމީ ކުރިކެޓް ޓީމުގެ ކައްޕިކަން ކޮށް، ގިނަ ކާމިޔާބީތަކެއް ހޯދާފައިވާ ކުޅުންތެރިއެެވެ. އަދި "އިންޑިއާ ލެޖެންޑްސް" ޓީމުގެ ކައްޕިކަމުގައި ދާދިފަހުން ރައިޕޫރުގައި އޮތް ރޯޑް ސޭފްޓީ ވޯލްޑް ސީރީޒްވެސް ކާމިޔާބުކޮށްފައިވެއެވެ. މި މުބާރާތް އެ ޓީމުން ކާމިޔާބުކޮށްފައިވަނީ، ފައިނަލުގައި ސްރީލަންކާ ލެޖެންޑްސްއާ ވާދަކޮށް، ކުރި ހޯދައިގެންނެވެ.
އަދި ކްރިކެޓުގެ ތާރީޚުގައި މިހާތަނަށް އުފެދުނު އެންމެ މޮޅު ބެޓްސްމަނުންގެ ތެރޭގައި ހިމެނޭ ސަޗިން ރަސްމީ ގޮތުން ކްރިކެޓް ކުޅުން ހުއްޓާލާފައިވަނީ 2013 ވަނަ އަހަރުއެވެ.
