އެންމެ ފަހުން ނޭމާގެ ޓްރާންސްފާއާ ގުޅިގެން ބާސާ އާއި ޕީއެސްޖީ އެއްބަސްވުމަކަށް

އެންމެ ފަހުން ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ބްރެޒިލްގެ ފޯވާޑް ނޭމާގެ ޓްރާންސްފާއާ ގުޅިގެން ބާސެލޯނާ އާއި ޕީއެސްޖީ އެއްބަސްވުމަކަށް އައިސްފައިވާ ކަމަށް ރިޕޯޓްތައް ބުނެފިއެވެ.

ސްކައި އިޓަލީން ބުނީ، ނޭމާގެ ޓްރާންސްފާގެ އެންމެ ފަހުގެ ކަންކަން މިހާރު ފުރިހަމަކުރަމުން އަންނަ ކަމަށާއި، އޭނާގެ ޓްރާންސްފާއާ ގުޅިގެން ބާސާ އާއި ޕީއެސްޖީ އެއްބަސްވުމަކަށް އައިސްފައިވާ ކަމަށެވެ.

ނަމަވެސް ނޭމާ ބާސާއަށް އަނބުރާ ބަދަލުވާ އެއްބަސްވުމުގައި ހިމެނެނީ ކޮން ކޮން ކަމެއްކަން އަދި ކަށަވަރެއް ނުވެއެއެވެ. ނަމަވެސް ރިޕޯޓްތައް ބުނާގޮތުން އެ އެއްބަސްވުމުގައި ބާސާގެ ދެ ކުޅުންތެރިޔެއްގެ އިތުރުން 175 މިލިއަން ޔުރޯ ހިމެނެއެވެ.

ބްރެޒިލްގެ ސަންޓޯސްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާއަށް ބަދަލުވީ 2013 ވަނަ އަހަރެވެ.

އެގޮތުން އޭނާ ވަނީ އެޓީމަށް ކުޅުނު 186 މެޗުގައި 105 ލަނޑު ކާމިޔާބުކޮށް އެޓީމާއެކު ސްޕެނިޝް ލީގު ދެފަހަރު، ކޮޕާ ޑެލްރޭ ދެފަހަރު، ސްޕެނިޝް ސުޕަރކަޕް ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕް ވެސް ކާމިޔާބު ކޮށްފައެވެ.

ނޭމާ އަންނަނީ ޕީއެސްޖީއަށް ބަދަލުވެ، އެ ކްލަބުގައި މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ އެ ކްލަބަށް މިހާތަނަށް ކުޅުނު 58 މެޗުގައި 51 ލަނޑު ކާމިޔާބު ކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް މިދިޔަ އަހަރު ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 97 މެޗުގައި 60 ލަނޑު ކާމިޔާބު ކޮށްފައެވެ. މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު ކާމިޔާބު ކޮށްފައެވެ.