ކުޑަކަޅުވާ މަސްގަނޑަށް ލިބުނު އަނިޔާގެ ސަބަބުން ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި ލިވަޕޫލާ ދެކޮޅަށް ރެއާލް މެޑްރިޑުން ކުޅޭ މެޗުގައި އެ ޓީމުގެ ކެޕްޓަން ސާޖިއޯ ރާމޯސްއަށް ނުކުޅެވޭނެކަން ޔަގީންވެއްޖެއެވެ.
އުމުރުން 35 އަހަރުގެ ރާމޯސްގެ ކުޑަކަޅުވާ މަސްގަނޑަށް އަނިޔާވެފައިވާކަން ޔަގީންވީ ފީފާ ވޯލްޑް ކަޕުގެ ޔޫރަޕް ކޮލިފައިންގައި ބުދަ ދުވަހުގެރޭ ކޮސޯވޯ އަތުން 3-1 ގެ ނަތީޖާއަކުން ސްޕެއިން މޮޅުވި މެޗަށްފަހު ހެދި ޓެސްޓުތަކުންނެވެ. އެގޮތުން އެ މެޗުގެ ފަހުކޮޅު ރާމޯސް ކުޅެން އެރިއިރު، އެ މެޗުގެ ކުރިންވެސް ފަރިތަކުރުންތަކުގައިވެސް ކުޑަކަޅުވާ މަސްގަނޑަށް ތަދުވާކަން އިހުސާސްވި ކަމަށް ރާމޯސް ވަނީ ބުނެފައެވެ.
މި އަނިޔާއާ ގުޅިގެން ރާމޯސް ކުޅުމާ ދުރުގައި ހުންނަން ޖެހޭނެ ސީދާ މުއްދަތެއް ހާމަކޮށްފައި ނުވި ނަމަވެސް، ރިޕޯޓުތައް ބުނާ ގޮތުން ލިވަޕޫލާ ދެކޮޅަށް ކުޅޭ ކުއާޓާގެ ދެ ލެގުގައިވެސް ރާމޯސްއަށް ނުކުޅެވޭނެއެވެ. މީގެ އިތުރުން މި މަހުގެ 10 ވަނަ ދުވަހު ކުޅޭ އެލް ކްލަސިކޯ މެޗުގައިވެސް ރާމޯސްއަށް ނުކުޅެވޭނެ ކަމަށް ރިޕޯޓުތައް ބުނެއެވެ.
ރާމޯސްއަށް އަނިޔާވިއިރު، ކުއާޓާގެ ފުރަތަމަ ލެގުގައި ރެއާލާއި ލިވަޕޫލް ބައްދަލުކުރާ މެޗު ސްޕެއިނުގައި ކުޅެން ތާވަލުކޮށްފައި އޮތީ އަންނަ އޭޕްރީލް މަހުގެ ހަވަނަ ދުވަހުއެވެ. އަދި ކުއާޓާގެ ދެވަނަ ލެގު ކުޅޭނީ އޭޕްރީލް މަހުގެ 14 ވަނަ ދުވަހު އިންގްލެންޑުގައެވެ.
މި ފަހަރުގެ ޗެމްޕިއަންސް ލީގުގައި ލިވަޕޫލާއި ރެއާލް ބައްދަލުކުރާއިރު، މި ދެ ޓީމު އެންމެ ފަހުން ބައްދަލުކޮށްފައިވަނީ 2017-2018 ވަނަ އަހަރުގެ ސީޒަނުގެ ޗެމްޕިއަންސް ލީގުގެ ފައިނަލުގައެވެ. އެ ފަހަރު ރެއާލުން ވަނީ 3-1 ގެ ނަތީޖާއަކުން ލިވަޕޫލް ބަލިކޮށް ޗެމްޕިއަންކަން ހޯދާފައެވެ. އަދި އެ މެޗުގައި ލިވަޕޫލުގެ މިސްރު ފޯވާޑް މުޙައްމަދު ސަލާހަށް ރާމޯސް ކުރި ފައުލުގެ ވާހަކަ ވަރަށް ގިނަ ދުވަސްތަކެއް ވަންދެން މީޑިއާގައި ދެކެވުނެވެ. އަދި އެ ވާހަކަތަކުގެ ތެރެއިން ރެއާލާއި ލިވަޕޫލުގެ ކުރީގެ ކުޅުންތެރިންނާއި ކޯޗުންވެސް ވަރަށް ބޮޑަށް ބަހުގެ ހަމަލާ ބަދަލުކުރިއެވެ.
މީގެ އިތުރުން ޗެމްޕިއަންސް ލީގުގެ ތާރީޚުގައި ރެއާލާއި ލިވަޕޫލް ވަނީ މިހާތަނަށް ޖުމްލަ ހަ ފަހަރު ބައްދަލުކޮށްފައެވެ. އެގޮތުން މި ކުރިމަތިލުންތަކުގައި ކޮންމެ ޓީމެއް ވަނީ ތިން މެޗުން މޮޅުވެފައެވެ.
