މާލޭގެ ބޯހިޔާވަހިކަމުގެ މައްސަލައަށް އޮތް ހައްލަކީ ރާއްޖޭގެ އެކި ހިސާބުތަކުން ގޯތި ދޫކުރުން: އަސްލަމް

މާލޭ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް އޮތް ހައްލަކީ، ރާއްޖޭގެ ހުރިހާ ހިސާބަކުން ހުޅުވާލެވިގެން ގޯތި ދޫކުރެވޭނެ އިންތިޒާމެއް ހަމަޖެއްސުންކަމަށް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މިނިސްޓަރު މުޙައްމަދު އަސްލަމް ވިދާޅުވެއްޖެއެވެ.

މަލޭ ރައްޔިތުންގެ ބޯހިޔާވަހިކަމުގެ މައްސަލައަށް ހައްލެއް ގެނެސް ދިނުމަށް، ސަރުކާރުން ވިސްނާފައިވަނީ، ގުޅީ ފަޅުން ގޯތި ދޫކުރުމަށެވެ. އެހެންނަމަވެސް، ހައުސިން މިނިސްޓަރު ވިދާޅުވީ، މިއީ ދާއިމީ ހައްލެއް ނޫން ކަމަށާއި، ގުޅީ ފަޅުގައި މާލޭގެ އެންމެންނަށް ބޭނުންވާ މިންވަރަށް ބިން ނެތް ކަމަށެވެ.

ރާއްޖެޓީވީގެ 'ފަށާއިރު' ޕްރޮގްރާމްގައި ވާހަކަފުޅު ދައްކަވަމުން އަސްލަމް ވިދާޅުވީ، މާލޭ ރައްޔިތުންނަށް ގޯތި ދޫކުރުމުގެ މައްސަލަ ދިމާވެފައިވަނީ، ގިނަ ބަޔަކު އެއްތަނަކަށް ފުނިޖެހުމުން ކަމަށެވެ. އެމީހަކު ބޭނުން ހިސާބަކުން ގޯތިދެވޭނެ އުސޫލެއް ހަމަޖެހިއްޖެނަމަ އެ މައްސަލައަށް ހައްލެއް ލިބިގެންދާނެކަމަށެވެ.

އެކަމަކު މިގޮތަށް މިކަން ކުރިއަށްގެން ދިއުމަށް ދިމާވެފައިވާ، ދަތިކަމަކީ، ރަށްރަށުގެ ކައުންސިލްތަކުން އެކަމަށް އެއްބާރުލުން ދޭން ބޭނުން ނުވުން ކަމަށް އަސްލަމް ވިދާޅުވިއެވެ. މިނިސްޓަރު ވިދާޅުވީ، ރަށު މީހަކަށް ނޫނީ، ރަށުން ގޯތި ދޭން އެއްވެސް ރަށެއްގެ ކައުންސިލުން ބޭނުން ނުވާކަމަށެވެ. އެހެންނަމަވެސް މިއަށްވުރެ ހުޅުވާލައިގެން، ގޯތި ދޫކުރުމުގެ މަސައްކަތް ކުރިއަށް ގެންދެވިއްޖެނަމަ، ގޯތި ގެދޮރުގެ މައްސަލައަށް ބޮޑު ހައްލެއް ލިބިގެން ދާނެ ކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ، އެހެން ރަށްރަށުން ބަދަލުވާން އެދޭ މީހުންނަށް މަރުހަބާ ކިޔުމުގެ ވިސްނުމެއް ރަށްރަށުގެ މީހުންވެސް ގެންގުޅެން ޖެހިފައިވާކަމަށެވެ. އެކަން އެހެން ކުރުމުން ރަށުގެ ތަރައްގީއަށް ވެސް ބޮޑެތި ފައިދާތަކެއް ލިބިގެން ދާނެކަމަށެވެ. މާފުށީގެ ތަރައްގީއަށް މިސާލު ޖައްސަވަމުން، އަސްލަމް ވިދާޅުވީ، އެރަށަށް މިހާރު ލިބިފައިވާ ކުރިއެރުމުގައި ރަށުން ބޭރު މީހުންގެ ހިއްސާ ބޮޑުކަމަށެވެ.