ޗެލްސީ އާއި ޕޯޓޯގެ ދެ ލެގުވެސް ސްޕެއިނުގައި

ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި ޗެލްސީ އާއި ޕޯޓޯ ބައްދަލުކުރާ ދެ ލެގުވެސް ސްޕެއިނުގެ ސެވިލުގައި ކުޅެން ނިންމައިފިއެވެ.

މީގެ ކުރިން ޔުއެފާއިން ތާވަލުކޮށްފައި އޮތް ގޮތުން ކުއާޓާގެ ފުރަތަމަ ލެގު ޕޯޓޯގެ ދަނޑުގައި ކުޅޭނީ އަންނަ އޭޕްރީލް މަހުގެ ހަތްވަނަ ދުވަހުއެވެ. އަދި ދެވަނަ ލެގު ޗެލްސީގެ ދަނޑުގައި ކުޅެން ތާވަލުކޮށްފައި އޮތީ އޭޕްރީލް މަހުގެ 13 ވަނަ ދުވަހުއެވެ.

އެކަމަކު ކޮވިޑް-19 އާ ގުޅިގެން ޕޯޗުގަލުގެ ސަރުކާރުން އަޅާފައިވާ ފިޔަވަޅުތަކާ ގުޅިގެން، ފުރަތަމަ ލެގުގެ މެޗު ޕޯޗުގަލުގައި ނުކުޅެވޭނެއެވެ. އެހެންކަމުން ޔުއެފާއިން މިހާރު ވަނީ ދެ ލެގުވެސް ނިއުޓްރަލް ދަނޑެއްގައި ކުޅެން ނިންމާފައެވެ. އެގޮތުން ކުއާޓާގައި ޗެލްސީ އާއި ޕޯޓޯ ބައްދަލުކުރާ ދެ ލެގުވެސް މިހާރު ކުޅެން ހަމަޖެހިފައިވަނީ ސްޕެއިނުގެ ސެވިލުގައި ހުންނަ ސެވިއްޔާގެ ދަނޑުގައެވެ.

ޗެމްޕިއަންސް ލީގުގެ ކުއާޓާގައި ޗެލްސީ އާއި ޕޯޓޯ ބައްދަލުކުރާ ދެ ލެގުވެސް ސްޕެއިނުގައި ކުޅޭއިރު، މީގެ ކުރިން މި މުބާރާތުގެ ދެވަނަ ބުރުގައި ޗެލްސީއާ ދެކޮޅަށް އެތުލެޓިކޯ މެޑްރިޑުގެ ހޯމް މެޗު ވަނީ ރޯމޭނިއާގެ ބުކަރެސްޓުގައި ކުޅެފައެވެ. އެ މެޗު ރޯމޭނިއާގައި ކުޅުނީ ސްޕެއިނުގެ ސަރުކާރުން މީގެ ކުރިން ކަނޑައަޅާފައިވާ އުސޫލުގެ ސަބަބުން، އިންގްލެންޑުން އަންނަ މީހުންނަށް ޒަރޫރީ ބޭނުމެއްގައި ނޫން ގޮތަކަށް ސްޕެއިނަށް އެތެރެނުވެވުމުންނެވެ.

މި ފަހަރުގެ ޗެމްޕިއަންސް ލީގުގެ ކުއާޓާގެ މެޗުތައް އޭޕްރީލް މަހު ކުޅޭއިރު، އެއަށްފަހު މުބާރާތުގެ ސެމީ ފައިނަލް ފުރަތަމަ ލެގުގެ މެޗުތައް ކުޅޭނީ އޭޕްރީލް މަހުގެ 27 ވަނަ ދުވަހާއި 28 ވަނަ ދުވަހުއެވެ. އަދި ދެވަނަ ލެގުގެ މެޗުތައް ކުޅޭނީ މެއި މަހުގެ ހަތަރެއް އަދި ފަސްވަނަ ދުވަހުއެވެ. މީގެ އިތުރުން މި މުބާރާތުގެ ފައިނަލް މެޗު ކުޅުމަށް ތާވަލުކޮށްފައިވަނީ މެއި މަހުގެ 29 ވަނަ ދުވަހު އިސްތަންބޫލުގައެވެ.