ސިވިލް ސަރވިސް ކޮމިޝަންގެ ގާނޫނަށް އައްޑޫ މީދޫ ދާއިރާގެ މެމްބަރ ރޮޒައިނާ އާދަމް ހުށަހެޅުއްވި އިސްލާހުގެ ބިލް ބަލައިގަނެ އިތުރަށް ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށް ފޮނުވައިފިއެވެ.

އަންގާރަ ދުވަހުގެ ޖަލްސާގައި މިބިލް ބަލައިގަތުމަށް ނެގި ވޯޓުގައި ބައިވެރިވެވަޑައިގެންނެވި 34 މެމްބަރުންވެސް ވަނީ ބިލް ބަލައިގަތުމަށް ވޯޓު ދެއްވާފައެވެ. ބިލް ހުށަހަޅުއްވަމުން ރޮޒައިނާ ވިދާޅުވީ ބިލްގައި ހުރި އިސްލާހުތަކަކީ ސިވިލް ސަރވިސް ހިންގުމުގައި މިހާރު ދިމާވަމުންދާ ދަތިތައް ހައްލުކުރުމަށް ސިވިލް ސަރވިސް ކޮމިޝަނުން އެދިފައިވާ ކަންކަންކަމަށެވެ.

ސިވިލް ސަރވިސް ކޮމިޝަނުގައި އަންހެން ދެ މެމްބަރުން ތިބުމަށް ލާޒިމްކޮށް ހުށަހަޅާފައިވަނީ ކޮމިޝަންތައް އެކުލަވާލުން އެއްގޮތް ކުރުމުގެ ގޮތުން ކަމަށާއި ކުރިޔަށް އޮތްތަނުގައި މިބަދަލުތައް ދެން ހުރި ކޮމިޝަންތަކަށްވެސް ގެނައުމުގެ މަސައްކަތްކުރައްވަމުން ގެންދަވާކަމަށް ރޮޒައިނާ ވިދާޅުވިއެވެ.

ރޮޒައިނާ ހުށަހަޅުއްވާފައިވާ ބިލްގެ 10 ވަނަ މާއްދާގެ ހ ގައި ވަނީ ކޮމިޝަންގެ މެމްބަރުންގެ ގޮތުގައި މަދުވެގެން 2 އަންހެން މެމްބަރުން ތިއްބަވަން ވާނެއެވެ.

މީގެއިތުރުން ކޮމިޝަންގެ މެމްބަރުންގެ ކިބައިގައި ހުރުން ލާޒިމްވާ ސިފަތަކުގެ ތެރޭގައި ފުރަތަމަ ޑިގްރީ ހާސިލްކުރުމަށްފަހު ހިންގުމުގެ ދާއިރާއިން މަދުވެގެން 10 އަހަރު ދުވަހުގެ ތަޖުރިބާ ލިބިފައިވާންޖެހޭނެކަމަށް ވެސް ވަނީ ހުށަހަޅާފައެވެ.

އަދި ކޮމިޝަންގެ ރައީސާއި ނާއިބުރައީސް އައްޔަނުކުރާނީ ރައީސުލްޖުމްހޫރިއްޔާކަމަށްވެސް މިބިލަށް ވަނީ އިސްލާހު ގެނެސްފައެވެ.

އެގޮތުން 17 ވަނަ މާއްދާއަށް ހުށަހަޅާފައިވާ އިސްލާހުގައި ބުނެފައިވަނީ ކޮމިޝަންގެ ރައީސަކު ނުވަތަ ނާއިބުރައީސަކު އައްޔަނުކުރުމަށް ބޭނުންވާ ކޮންމެ ފަހަރަކު، ކޮމިޝަނަށް އައްޔަނުކޮށްފައިވާ މެމްބަރުންގެ ތެރެއިން މީހެއްގެ ނުވަތަ މީހުންގެ ނަން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަންވާނެއެވެ.

އަދި ރައްޔިތުންގެ މަޖިލީހަށް ރައީސް ހުށަހަޅާ ނަންތަކުގެ ތެރެއިން ރައްޔިތުންގެ މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވެ މެމްބަރުންގެ އަޣްލަބިއްޔަތުން ފާސްކުރާ މީހަކު ކޮމިޝަނުގެ ރައީސްކަމުގެ މަގާމަށް ނުވަތަ ނާއިބުރައީސްކަމުގެ މަގާމަށް ރައީސުލްޖުމްހޫރިއްޔާ އައްޔަނުކުރަންވާނެކަމަށް 17 ވަނަ މާއްދާގެ ރ އަށް ހުށަހަޅާފައިވާ އިސްލާހުގައިވެއެވެ.

އެހެންނަމަވެސް މި ގާނޫނަށް އަމަލުކުރަން ފަށާއިރު ކޮމިޝަންގެ ރައީސާއި ނާއިބުރައީސްކަމުގެ މަގާމަށް އައްޔަނުކޮށްފައިވާ މެމްބަރުން ގާނޫނުގައިވާ ގޮތުގެމަތިން މަގާމުން ވަކިވަންދެން ތިބޭނެކަމަށް މިބިލްގައިވެއެވެ.

މީގެއިތުރުން މިބިލަށް ގިނަ އިސްލާހުތަކެއް ހުށަހަޅުއްވާފައިވާއިރު ބަހުސްގެ މަރުހަލާގައި މިބިލާމެދު މެމްބަރުންގެ މެދުގައި ވަނީ ޚިޔާލު ތަފާތުވުންތައް އުފެދިފައެވެ.