ނާސިހު ހިމެނޭހެން ސީއެސްސީއަށް 3 މެންބަރުން އައްޔަންކުރައްވައިފި
7 ސެޕްޓެމްބަރު 2025 | އާދީއްތަ 07:51ތިން ބޭފުޅުން މެންބަރުކަމުގެ ހުވައި،ފަނޑިޔާރު އަލްއުސްތާޒު އަލީ ރަޝީދު ހުސައިންގެ ކުރިފުޅުމަތީގައި ކުރެއްވި
ސީއެސްސީއަށް 3 މެންބަރުން އައްޔަން ކުރެއްވި ރަސްމިއްޔާތުގެ ތެރެއިން
ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ސިވިލް ސަރވިސް ކޮމިޝަން (ސީއެސްސީ)އަށް ތިން ބޭފުޅަކު އައްޔަން ކުރައްވައިފި އެވެ.
އާދިއްތަ ދުވަހު ރައީސް އޮފީހުން ބުނީ، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 180 ވަނަ މާއްދާގެ (ށ) އާއި، ގާނޫނު ނަންބަރު 5/2007 (ދިވެހި ސިވިލް ސަރވިސްގެ ގާނޫނު) ގެ 13 ވަނަ މާއްދާގައިވާ ގޮތުގެމަތީން، ސީއެސްސީ މެންބަރުކަމަށް ތިން ބޭފުޅަކު ރައީސް އައްޔަން ކުރައްވާފައިވާ ކަމަށެވެ.
ރައީސް އޮފީހުގައި ބޭއްވެވި ޚާއްސަ ރަސްމިއްޔާތެއްގައި ސީއެސްސީއަށް އައްޔަން ކުރައްވާފައިވާ ތިން ބޭފުޅުންނަކީ މ. ފަލްކަންގެ، މުހައްމަދު ނާސިހާއި، ދަފްތަރު. ނަންބަރު 1325، ޑރ.ހުސައިން ފާއިޒް އަދި މ. ވައިޓްބެލް، ޑރ. ދީބާ މޫސާ އެވެ.
ސީއެސްސީގެ މެންބަރުކަމަށް އައްޔަންކުރެއްވުމުގެ ކުރިން، ތިން ބޭފުޅުން ކޮމިޝަންގެ މެންބަރުކަމުގެ ހުވައި، ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އަލްއުސްތާޒު އަލީ ރަޝީދު ހުސައިންގެ ކުރިފުޅުމަތީގައި ކުރެއްވި އެވެ.
ތިން ބޭފުޅުންނަށް ހުވައި ލައިދެއްވީ، ފަނޑިޔާރު އޮނަރަބަލް އަލްއުސްތާޒު އަލީ ރަޝީދު ހުސައިނެވެ. އަދި، މި ރަސްމިއްޔާތުގައި ރައީސް ވަނީ ސިވިލް ސަރވިސް ކޮމިޝަނަށް އަލަށް އައްޔަންކުރެއްވި ތިން މެންބަރުންނާ، އެ މަގާމަށް އައްޔަންކުރެއްވި ކަމުގެ ލިޔުން ހަވާލުކުރައްވާފަ އެވެ.
ނާސިހު ހިމެނޭހެން ތިން ބޭފުޅަކު ސީއެސްސީއަށް އައްޔަން ކުރެއްވިއިރު، މިސަރުކާރުން ފުރަތަމަ ނާސިހު އެމަގާމުން ވަކި ކުރެއްވުމަށް މަސައްކަތް ކުރެއްވިއެވެ. ނަމަވެސް ސީއެސްސީގެ ރައީސްކަމަށް ދެވަނަ ދައުރަކަށް ނާސިހު އައްޔަނުކުރުމަށް ރައްޔިތުން މަޖިލީހުން 52 މެންބަރުން ވޯޓު ދެއްވިއެވެ. ހަތަރު މެންބަރަކު ދެކޮޅަށް ވޯޓު ދެއްވި އެވެ.
މީގެ އިތުރުން ޑރ. ދީބާ މޫސާ އަދި ޑރ. ހުސައިން ފާއިޒަށް ރުހުން ދީފައި ވަނީ މެންބަރުންގެ އިއްތިފާގުންނެވެ.
