ސީއެސްސީ އަށް ހުށަހެޅި ވަޒީފާގެ މައްސަލަތަކުގެ 87 އިންސައްތަ ވަނީ ނިންމާފައި
23 ޖުލައި 2024 | އަންގާރަ 13:13ސީއެސްސީގެ ވިއުގަ މެދުވެރިކޮށް ޚިދުމަތްތައް އަވަހަށް ފޯރުކޮށްދިނުމަށް މަސައްކަތް ކޮށްފައިވޭ
ސިވިލް ސަރވިސް ކޮމިޝަންގެ ރައީސް މުހައްމަދު ނާސިހު
ވަޒީފާގެ މައްސަލަތަކުގެ ނިންމުން އަވަސްކުރުމަށް ދަނީ މަސައްކަތް ކުރަމުން ކަމަށާއި 2023 ވަނަ އަހަރު ހުށަހެޅި މައްސަލަތަކުގެ 86% ނިމިފައިވާ ކަމަށް ސިވިލް ސަރވިސް ކޮމިޝަންގެ ރައީސް މުހައްމަދު ނާސިހު ވިދާޅުވެއްޖެއެވެ.
އޭނާ އެފަދައިން ވިދާޅުވީ ސިވިލް ސަރވިސް ކޮމިޝަންގެ މަސައްކަތްތަކާއި ގުޅޭގޮތުން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަދައްކަވަމުންނެވެ.
މައްސަލަ ހުށަހެޅިތާ 3 ދުވަހުގެ ތެރޭގައި 2021ގައި ނިމިފައި ވަނީ 1027ގަ ކަމަށާއި، 2022ގައި މައްސަލަ ހުށަހެޅިތ 3 ދުވަހުގެ ތެރޭގައި 1494 މައްސަލަ އަދި 2023ގައި މައްސަލަ ހުށަހެޅި 3 ދުވަހުގެ ތެރޭގައި 2837 މައްސަލަ ނިމިފައިވާ ކަމަށް އޭނާ ވިދާޅުވިއެވެ. އެހެންކަމުން 3 ދުވަހުގެ ތެރޭގައި މައްސަލަތައް ނިންމޭ އަދަދު އަހަރަކަށް ވުރެ އަހަރެއް އިތުރުވަމުން އަންނަކަން އޭނާ ވަނީ ފާހަގަކުރައްވާފައެވެ.
އޭނާ ވިދާޅުވީ ސިވިލް ސަރވިސް ކޮމިޝަންގެ މައިގަނޑު ވިސްނުމަކީ ސިވިލް ސަރވިސްގެ ހިންގުން ހަރުދަނާކޮށް ރަނގަޅުކުރުން ކަމަށެވެ. އަދި އިދާރާތަކާއި މުއާމަލާތުކުރުމުގައި ވިހާވެސް ބޮޑަށް ޓެކްނޮލޮޖީ ބޭނުންކުރުމަކީ އެ އިދާރާގެ ވިސްނުމެއް ކަމަށް އޭނާ ވަނީ ވިދާޅުވެފައެވެ. ސީއެސްސީގެ ވިއުގަ މެދުވެރިކޮށް ޚިދުމަތްތައް އަވަހަށް ފޯރުކޮށްދިނުމަށް މަސައްކަތް ކޮށްފައިވާ ކަމަށާއި އެ ވިއުގަ ފުޅާކުރުމަށް ގިނަ މަސައްކަތްތަކެއް ނިމިދިޔަ 3 އަހަރުކޮށްފައިވާ ކަަމަށް އޭނާ ވިދާޅުވިއެވެ. އެގޮތުން މުވައްޒަފުން ޓްރެއިންކުރުމާއި، އިދާރާތަކުގެ ހިންގުން އޮންލައިން ނިޒާމަކަށް ބަދަލުކުރުމަށް މަސައްކަތްތަކެއް ކޮށްފައިވާނެ ކަމަށް އޭނާ ވިދާޅުވިއެވެ. މިހާރު މުވައްޒަފުންގެ މަސައްކަތުގެ ފެންވަރު ވަޒަންކުރުން ވެސް ކުރިއަށް ދަނީ އޮންލައިންކޮށް ކަމަށް ނާސިހު ވަނީ ވިދާޅުވެފައެވެ. އެ ނިޒާމްގެ ތެރެއިން މުވައްޒަފުން ރަނގަޅުކުރަންވީ ކަންކަމާއި، މުވައްޒަފު މަސައްކަތުގައި ހޭދަކުރާ ވަގުތުވެސް ވަގުތުން އެނގޭނެ ކަމަށް އޭނާ ވަނީ ވިދާޅުވެފައެވެ.
ސިވިލް ސަރވިސް އިދާރާތަކުން ދޭ ޚިދުމަތް ރަނގަޅުކުރުމަށް ސަރވިސް ޗަރޓަރެއް ވެސް ޤާއިމްކޮށްފައިވާ ކަމަށާއި އެ ޗާޓު މެދުވެރިކޮށް ޚިދުމަތް ލިބޭނެ ގޮތާއި، ޚިދުމަތް ލިބޭނެ އަވަސްމިން އެނގެން އޮންނަ ކަމަށް އޭނާ ވިދާޅުވިއެވެ. އަދި އެ ކޮމިޝަނުން ބާރު އަޅަނީ އެ ޗާޓަރާއި އެއްގޮތަށް މަސައްކަތް ނިންމުމަށް ކަމަށް ވެސް އޭނާ ވިދާޅުވިއެވެ. މީގެ އިތުރުން ޚިދުމަތާއި ގުޅޭ ގޮތުން ފީޑްބެކް ދެވޭނެ ނިޒާމެއް ވެސް އެކުލަވާލާފައިވާ ކަމަށާއި އެކަމުގެ މަޤްސަދަކީ ރައްޔިތުންގެ ފަރާތުން ލިބޭ ޝަކުވާތައް މަދުކޮށް ޚިދުމަތްތައް ހަރުދަނާކުރުން ކަަމަށް އޭނާ ވަނީ ވިދާޅުވެފައެވެ. ހަމައެހެންމެ އިދާރާތަކަށް މީހުން އައްޔަންކުރުމުގެ ބާރު ޕަރމަނަންޓް ސެކޭޓްރީންނަށް ދީފައިވާ ކަމަށާއި އެކަން އެގޮތަށް ކުރީ މުވައްޒަފުން އައްޔަންކުރުމުގެ މަރުހަލާ ލާމަރުކަޒުކޮށް އަވަސްކުރުމަށް ކަމަށް އޭނާ ވިދާޅުވިއެވެ.
މިވަގުތު ސިވިލްސަރވިސްގައި 676 އިދާރާ މަސައްކަތްކުރަމުންދާއިރު، 30،000 މުވައްޒަފުން ސިވިލް ސަރވިސް މުވައްޒަފުންގެ ގޮތުގައި އެބަތިއްބެވެ. އަދި ސިވިލް ސަރވިސް ކޮމިޝަންގެ އިދާރާގައި 84 މުވައްޒަފުންނެވެ. ޕްރޮފެޝަނަލް ޑިވެލޮޕްމެންޓަށް މަސައްކަތް ކުރާ ސިވިލް ސަރވިސް އިންސްޓިޓިއުޓް އިން ރާއްޖޭގެ އެކި ދާއިރާތަކުގައި މަސައްކަތް ކުރާ 200 މުވައްޒަފުންނަށް ޚާއްސަކޮށްގެން އަބަދުވެސް ތަމްރީން ޕްރޮގްރާމްތައް ކުރިއަށްގެންދާ ކަމަށް އެ ކޮމިޝަނުން ވަނީ މައުލޫމާތުދީފައެވެ. އެ ކޮމިޝަނުން ކޮންމެ ދުވަހަކު ވެސް ތަފާތު އެކި މައްސަލަތަކާއި މެދު މަޝްވަރާކޮށް ބަލަމުންދާ ކަމަށް އެ ކޮމިޝަނުން ވަނީ ބުނެފައެވެ.
