މީޑިއާތައް ކޮންޓްރޯލްކޮށް ދޮގު ހަބަރާއި ތެދު ހަބަރު ކަނޑައަޅާ ކޮމިޝަނުގެ ވަގުތީ ކޮމެޓީ އެކުލަވާލައިފި

ސަރުކާރަށް މީޑިއާތައް ކޮންޓްރޯލްކުރެވޭ ގޮތަށް ގާއިމުކުރި 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން' ވަގުތީ ގޮތުން ހިންގާ ސިވިލް ސާވިސް ކޮމިޝަން (ސީއެސްސީ)ގެ ފަސް މެންބަރުންގެ ކޮމިޓީ މިއަދު އެކުލަވާލައިފި އެވެ.

މިދިޔަ ބުރާސްފަތި ދުވަހު އަމަލުކުރަން ފެށި މީޑިއާ އެންޑް ބްރޯޑްކާސްޓިން ރެގިއުލޭޝަން ގާނޫނުގައި ބުނާ ގޮތުން އާ ކޮމިޝަނަށް މެންބަރުން ކަނޑައެޅެންދެން ކޮމިޝަން ހިންގާނީ ސީއެސްސީން އެކުލަވާލާ ކޮމިޓީއަކުންނެވެ. އަދި މި ކޮމިޓީއަށް ކުރެވޭނެ ކަމަށް ގާނޫނުގައި ބަޔާންކުރާ ކަންކަމަކީ ކޮމިޝަނުގެ އިދާރީ މަސައްކަތްތައް ހިންގުމާއި މީޑިއާ ރަޖިސްޓްރީކުރުމަށް އަންނަ ހުށަހެޅުންތަކާ މެދު ގޮތެއް ނިންމުމެވެ.

އެހެން ނަމަވެސް މީޑިއާތަކުގެ މައްސަލަތައް ބަލައި ފިޔަވަޅު އެޅުމާ ގުޅޭ އެއްވެސް ކަމެއް އިންތިގާލީ ކޮމިޓީއަކަށް ނުކުރެވޭނެ އެވެ.ގާނޫނުގައިވާ ގޮތުން ކޮމިޝަންގެ ވަގުތީ ކޮމިޓީގެ ރައީސާއި ނައިބު ރައީސް ކަނޑައަޅާނީ އެ ފަސް މެމްބަރުންގެ ތެރޭގައި ނަގާ ސިއްރު ވޯޓަކުންނެވެ.

އިންތިގާލީ ކޮމިޓީއަށް ސީއެސްސީން ނިންމި މެންބަރުންނަކީ:

• އަލީ ޒަކީ، ޑިރެކްޓަ ޖެނެރަލް/ ސްޕޯޓްސް މިނިސްޓްރީ
• އިމާދު މުހައްމަދު، ޗީފް ކޯޕަރޭޓް އެގްޒެކެޓިވް (ގައުމީ އަރުޝީފު، ޔޫތު މިނިސްޓްރީ)
• އާމިނަތު ނަސީރު، ޑިރެކްޓަ ޖެނެރަލް/ އިސްލާމިކް މިނިސްޓްރީ
• އާމިނަތު ޝާހިދާ، ޑިރެކްޓަ ޖެނެރަލް/ އިކޮނޮމިކް މިނިސްޓްރީ
• އަހުމަދު މައުސޫމް، ޑިރެކްޓަ ޖެނެރަލް/ ސިޓީސް މިނިސްޓްރީ

މީޑިއާ ކޮންޓްރޯލް ކުރާ ބިލު ތަސްދީގުކޮށް މީޑިއާ ކައުންސިލްއާއި ބްރޯޑްކާސްޓިން ކޮމިޝަން އުވާލުމަށް ފަހު މި އުފައްދާ އާ ކޮމިޝަނުގެ ފުރިހަމަ ކޮންޓްރޯލް މި ވަގުތަށް ސަރުކާރަށް ލިބޭނެ އެވެ.

މީޑިއާ ރެގިއުލޭޓް ކުރާ ކޮމިޝަންގެ ދާއިމީ ހަތް މެމްބަރުންގެ ތެރެއިން ތިން މެމްބަރުން އައްޔަން ކުރަން ޖެހެނީ ގާނޫނުގައިވާ ގޮތުން ރައްޔިތުންގެ މަޖިލިހުންނެވެ. ބާކީ ހަތަރު މެމްބަރުން އިންތިހާބު ކުރަނީ މީޑިއާތަކުގެ މެދުގައި ނަގާ ސިއްރު ވޯޓަކުންނެވެ. އަދި ކޮމިޝަންގެ ހުރިހާ މެމްބަރުން ވެސް ވަކި ކުރުމުގެ ބާރު ގާނޫނުން ދީފައި ވަނީ ރައްޔިތުންގެ މަޖިލިހަށެވެ. އޭގެ އިތުރުން ކޮމިޝަންގެ ރައީސް އައްޔަން ކުރަން ގާނޫނުގައި ކަނޑައަޅާފައި ވަނީ ރައްޔިތުންގެ މަޖިލިހުންނެވެ.

މީޑިއާ ކޮމިޝަންގެ ގާނޫނުގެ ދަށުން އުފައްދާ ކޮމިޝަނަށް ސޯޝަލް މީޑިއާ ރެގިއުލޭޓު ކުރުމުގެ ބާރު އޮވެ އެވެ. އަދި ބޮޑެތި އަދަދުތަކުން ނޫސްތަކާއި ޓީވީ ޗެނަލްތައް ޖޫރިމަނާ ވެސް ކުރެވެ އެވެ. މި ގާނޫނަށް އަމަލު ނުކުރަން ނޫސްވެރިންނާއި ރާއްޖެއާއި ބޭރުގެ ޖަމިއްޔާޖަމާއަތްތަކުން އަންނަނީ ގޮވާލަމުން ނެވެ.