ރައީސް ޑރ.މުހައްމަދު މުއިއްޒު ގެ ސަރުކާރުން މުސާރައި ގެ އޮނިގަނޑަށް ގެނައި ބަދަލާ ގުޅިގެން ލީގަލް ގިނަ އޮފިސަރުން މުސާރަ ބޮޑުތަނުން ކުޑަވި މައްސަލާ ގައި ހުށަހެޅި ޕެޓިޝަނެއް ޖަވާބެއް ނުދިނުމުން ކަންބޮޑުވުންފާޅު ކޮށް ނޭޝަނަލް ޕޭ ކޮމިޝަނަށް ސިޓީއެއް ފޮނުވައިފި އެވެ.
ރައީސް މުހައްމަދު މުއިއްޒު ގެ ސަރުކާރުން ބޮޑު ކުރި މުސާރަ އާ އެކު ލީގަލް އޮފިސަރުން ގެ މުސާރަ އާއި އިނަޔާތްތައް ކުޑަވެފައިވާތީ ކަންބޮޑުވުން ފާޅުކޮށް 10 ތަނަކަށް ޕެޓިޝަނެއް ހުށަހަޅާފައިވަނީ 9 ނޮވެންބަރު 2025 ގަ އެވެ. މި ޕެޓިޝަނުގައި 81 މުވައްޒަފުން ސޮއި ކޮށްފައިވެ އެވެ.
ޕެޓިޝަން ހުށަހެޅި އިދާރާތަކުގެ ތެރޭގައި ރައީސް އޮފީސް، މަޖިލިސް، މަޖިލީހުގެ މާލިއްޔަތު ކޮމިޓީ، ޕޭ ކޮމިޝަން، ލޭބަރ ރިލޭޝަންސް އޮތޯރިޓީ، ލޯކަލް ގަވަރމަންޓް އޮތޯރިޓީ، ފިނޭންސް މިނިސްޓްރީ، ސިވިލް ސަރވިސް ކޮމިޝަން، ސިޓީސް މިނިސްޓްރީ އަދި ބާ ކައުންސިލް ހިމެނެ އެވެ.
ނަމަވެސް މިއަދާ ހަމައަށް މި ޕެޓިޝަންއާ ހުށަހެޅި އެއްވެސް ސިޓީއަކަށް ޖަވާބެއް ލިބިފައިނުވެ އެވެ. މި މައްސަލާގެ ބޮޑެތި ކަންބޮޑުވުން ތަކެއް ހުރުމާ ގުޅިގެން މިމަހުގެ 27 ވަނަ ދުވަހު ޕޭ ކޮމިޝަނަށް ވަނީ ސިޓީ އެއް ފޮނުވާފަ އެވެ. އަދި މުވައްޒަފުން ގެ ކަންބޮޑުވުން ތަކަށް އަވަސް ހައްލެއް ހޯދައިދިނުމަށް އެދިފައިވެ އެވެ.
ރާއްޖެއެމްވީ އަށް މައުލޫމާތު ދިން ލީގަލް އޮފިސަރެއް ވިދާޅުވީ މުސާރައި ގެ އޮނިގަނޑަށް ގެނައި ބަދަލާއެކު ވަރަށް ބޮޑަށް މުސާރަ ކުޑަ ވެފައިވާ ކަމަށާއި، މީގެ ކުރިން ގެއަށް ގެންދިއުމަށް ލިބޭ މުސާރަ އިން ގާތްގަނޑަކަށް 7000 ރުފިޔާ އާއި 5000 ރުފިޔާ މަދުވެފައިވާ ކަމަށެވެ. އަދި މިކަމުގެ ސަބަބުން މަސައްކަތަށް ވެސް ބުރޫ އަރާ ކަމަށާއި، ލީގަލް އޮފިސަރުން ހިމެނޭ ތިން ރޭންކުން ވެސް މުސާރަ ކުޑަ ވެފައިވާ ކަމަށެވެ.
މީގެ އިތުރުން އެ އޮފިސަރު ވިދާޅުވީ ގާނޫނުގައިވާ ގޮތުން މުސާރަ ދޭން ވާނީ މުސާރަ ދޭ ފަރާތުން ކަމަށާއި، މުސާރަ ދޭން ވާނީ ސިވިލް ސަރވިސްއިން ކަމަށެވެ. ނޭޝަނަލް ޕޭ ކޮމިޝަނުން މުސާރަ ނުދެވޭނެ ކަމަށާއި، އެއީ ގާނޫނުން ތަންދޭ ކަމެއް ނޫން ކަމަށް އޭނާ ވިދާޅުވި އެވެ.
ނަމަވެސް މިހާރު ސިވިލް ސަރވިސް ކޮމިޝަނަށް ގުޅުމުން އަބަދުވެސް ޕޭ ކޮމިޝަނުން މުސާރަގެ ކަންކަން ކުރަމުންދާ ކަމަށް އަންގާ ކަމަށާއި، މިއީ ގާނޫނީ ގޮތުން ކުރެވޭނެ ކަމެއް ނޫން ކަމަށް އޮފިސަރު ވިދާޅުވި އެވެ.