ވެންޓިލޭޓަރު މައްސަލައިގެ ތަހުގީގަށް އޭސީސީއަށް ފުލުހުންގެ އެހީ ހޯދަން ޕީޖީން އިރުޝާދު ދެނީ
29 މާރިޗު 2021 | ހޯމަ 17:33ޕީޖީ އޮފީހުން ވަނީ އެ މައްސަލަ އަލުން ދިރާސާ ކުރުމަށް ނިންމާފައި
ޕްރޮސެކިއުޓަރ ޖެނެރަލް ހުސައިން ޝަމީމް- ޕީޖީ ވަނީ މި މައްސަލައިގައި ޖިނާއީ ދައުވާއެއްކޮށް ކުށް ސާބިތުވާ މިންވަރަށް ހެކި ނެތްކަމަށް މީގެ ކުރިން ފާހަގަ ކުރައްވާފައި
ވެންޓިލޭޓަރުތައް ގެނައުމުގައި ކޮރަޕްޝަން އެކުލެވޭކަމަށް ތުހުމަތުކޮށް އެންޓި ކޮރަޕްޝަން ކޮމިޝަން (އޭސީސީން) ތަހުގީގު ކުރަމުންދާ މައްސަލައިގައި ފުލުހުންގެ އެހީތެރިކަން ހޯދުމަށް އިރުޝާދު ދިނުމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ނިންމައިފިއެވެ.
މި މައްސަލައިގައި އޭސީސީން ކުރި ތަހުގީގަށްފަހު މީހެއްގެ މައްޗަށް ޖިނާއީ ކުށެއް ސާބިތުވާ މިންވަރަށް ހެކި ނެތްކަމަށް ބުނެ މައްސަލައިގައި ދައުވާ ނުކުރުމަށް ނިންމި ނިންމުން ޕީޖީ އޮފީހުން ދަމަހައްޓާފައިވާއިރު، އެ މައްސަލައާ ގުޅިގެން އޭސީސީން ފާހަގަކުރި ކަންކަމާއި، ރައްޔިތުންގެ ކަންބޮޑުވުންތަކަށް ބަލައި ޕީޖީ އޮފީހުން ވަނީ އެ މައްސަލަ އަލުން ދިރާސާ ކުރުމަށް ނިންމާފައެވެ. އަދި މައްސަލަ އަލުން ދިރާސާ ކުރާއިރު، މި މައްސަލައިގައި ފުލުހުންނާ ގުޅިގެން ހޯދާފައިވާ ހެކިތައް ވަކިން ގެނެސް އިތުރަށް ތަހުގީގު ކުރަންޖެހޭ ކަމެއް އޮތްނަމަ އެކަން ފުލުހުންގެ އެހީތެރިކަމާއެކު ތަހުގީގު ކުރުމަށް އޭސީސީއަށް އިރުޝާދު ދިނުމަށް ޕީޖީ އޮފީހުން ވަނީ ނިންމާފައެވެ. އަދި އެކަމުގައި އޭސީސީއަށް އެހީތެރިކަން ދިނުމަށް ފުލުހުންނަށް އެންގުމަށްވެސް ޕީޖީ އޮފީހުން ވަނީ ނިންމާފައެވެ.
މި މައްސަލައިގައި ޖިނާއީ ދައުވާއެއްކޮށް ކުށް ސާބިތުވާ މިންވަރަށް ހެކި ހުރިތޯ ސުވާލު އުފެދިފައިވާކަން ފާހަގަކޮށް ޕީޖީ އޮފީހުން ބުނީ، ދައުވާކުރާއިރު، ޚިޔާލީ ވާހަކައެއް ނުދެއްކޭނެ ކަމަށާއި، ދައުވާގެ ކޮންމެ އިބާރާތެއް ހެއްކާއެކު ސާބިތުކޮށްދޭން ޖެހޭނެ ކަމަށެވެ. އަދި އެކަމުގައި ޕީޖީ އޮފީހުން ބަރޯސާ ވަނީ ތަހުގީގީ އިދާރާތަކުން ހޯދާ ހެކިތަކުގެ މައްޗަށްކަން ބަޔާންކޮށް ޕީޖީ އޮފީހުން ބުނީ، އެ ހެކިތަކުގެ މައްޗަށް ޝަރުއީ ކޯޓެއްގައި ކުށް ސާބިތު ކުރެވިދާނެތޯވެސް ބަލަން ޖެހޭ ކަމަށެވެ.
ޕީޖީ އޮފީހުން ބުނީ، މި މައްސަލަ އަލުން ދިރާސާ ކުރުމަށްފަހު، ހޯދޭ އިތުރު ހެކިތަކުގެ އަލީގައި މި މައްސަލައިގައި ޕީޖީ އޮފީހުން ނިންމާފައިވާ ނިންމުން އަލުން މުރާޖައާ ކުރާނެ ކަމަށެވެ.
ވެންޓިލޭޓަރުތަކާ ބެހޭ މައްސަލައިގައި އެންޓި ކޮރަޕްޝަން ކޮމިޝަނުން ޕީޖީ އޮފީހަށް ހުށަހެޅި އިތުރު މަޢުލޫމާތުތަކާ ގުޅިގެން، ޕީޖީ އޮފީހުން އޭރު މި މައްސަލަ އަލުން ރިވިއުކޮށް ބަލާފައިވެއެވެ. އަދި އައު މަޢުލޫމާތާއި، މައްސަލައިގައި ކުރިން ހޯދިފައިވާ ހެއްކާޢި ޤަރީނާގެ މައްޗަށް ބަލައި، ޖިނާއީ ކުށެއްގައި ސާބިތުކޮށްދޭންޖެހޭ އުންޞުރުތައް ސާބިތު ކޮށްދެވިދާނެކަމަށް ނުފެންނަކަން ބަޔާންކޮށް ޕީޖީ އޮފީހުން ވަނީ ދައުވާ ނުކުރަން ނިންމި ނިންމުން ދަމަހައްޓާފައެވެ. ނަމަވެސް އޭސީސީން ވަނީ އެ ނިންމުން ގަބޫލު ނުކުރެވޭކަމަށް ތަކުރާރުކޮށް ބުނެފައެވެ.
