މާވަށުގައި މީހަކު މަރާލުން: މުހައްމަދު އިބްރާހިމަށް ގަސްދުގައި މީހަކު މެރުމުގެ ދައުވާކޮށްފި
މި މައްސަލައިގައި ދައުވާ ކުރެވިފައިވަނީ ލ. މާވަށް، ނަލަހިޔާ، މޫސާ އިބްރާހިމް ތޫނު އެއްޗަކުން ހަމަލާދީ މަރާލި މައްސަލައިގައި
ތޫނު އެއްޗަކުން ހަމަލާދީ މަރާލި ކަމަށް ބުނާ ލ. މާވަށު އުމުރުން 29 އަހަރުގެ މޫސަ (ވ) އަދި އޭނާއަށް ވަޅިން ހަމަލާދިން ކަމަށް ބުނާ ހދ. ނޮޅިވަރަންފަރު އުމުރުން 29 އަހަރުގެ މުހައްމަދު އިބްރާހިމް (ކ)
ލ. މާވަށުގައި ހިނގި މަރުގެ މައްސަލައިގައި ހދ. ނޮޅިވަރަންފަރު، އަސަރީމަންޒިލް، މުހައްމަދު އިބްރާހިމްގެ މައްޗަށް ގަސްދުގައި މީހަކު މެރުމުގެ ކުށުގެ ދައުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހުގެ ފަރާތުން ކްރިމިނަލް ކޯޓަށް ފޮނުވައިފިއެވެ.
މި މައްސަލައިގައި ދައުވާ ކުރެވިފައިވަނީ މިއަހަރުގެ ޖުލައި 28 ވަނަ ދުވަހުގެ ހެނދުނުގެ ވަގުތެއްގައި، ލ. މާވަށް، ނަލަހިޔާ، މޫސާ އިބްރާހިމް ތޫނު އެއްޗަކުން ހަމަލާދީ މަރާލި މައްސަލައިގައެވެ. މި މައްސަލައިގެ ދައުވާ ކްރިމިނަލް ކޯޓަށް ހުށަހަޅާފައިވަނީ 25 ސެޕްޓެމްބަރު 2025 ވަނަ ދުވަހުއެވެ.
މުހައްމަދު އިބްރާހިމްގެ މައްޗަށް ކުރެވުނު ފުރަތަމަ ދައުވާއަކީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއެވެ. ދެވަނަ ދައުވާއަކީ މަޤްބޫލު ސަބަބެއް ނެތި އާންމު ތަނެއްގައި ތޫނު އެއްޗެއް ގެންގުޅުމުގެ ކުށުގެ ދައުވާއެވެ.
ޕްރޮސެކިއުޓަރ ޖެނެރަލްގެ އޮފީހުން މައުލޫމާތު ދެއްވި ގޮތުގައި، މި މައްސަލައަކީ ޖިނާއީ ބޮޑެތި ކުށްތަކުގެ ތަޙްޤީޤާއި ޕްރޮސެކިއުޓް ކުރުމުގެ މަރުޙަލާ އަވަސްކުރުމަށް ކުރެވޭ މަސައްކަތުގެ ތެރެއިން ބެލުނު މައްސަލައެކެވެ. މި މައްސަލައިގެ ތަޙްޤީޤުގެ ފުރަތަމަ މަރުޙަލާއިން ފެށިގެން ދިވެހި ފުލުހުންގެ ޚިދުމަތާއި ޕްރޮސެކިއުޓަރ ޖެނެރަލްގެ އޮފީހާ ދެމެދު ފުޅާ ދާއިރާއެއްގައި މަޝްވަރާކުރެވި، ތަޙްޤީޤުގެ ކަންކަން ކުރިއަށް ގެންދެވިފައިވާ ކަމަށްވެސް އެ އޮފީހުން ފާހަގަ ކޮށްފައިވެއެވެ.
މޫސާ އިބުރާހީމުގެ ކަރަށް ވަޅިން ހަމަލާދީ މަރާލި މި ހާދިސާ ހިނގާފައި ވަނީ މިދިއަ ޖުލައި މަހުގެ 28 ވީ ހޯމަ ދުވަހުގެ ހެނދުނު ލ. މާށު ވޮލީކޯޓު ކައިރީގަ އެވެ.
އޭނާ މަރާލުމަށްޓަކައި ވަޅިން ހަމަލާދީފައިވަނީ އެވަގުތު އެރަށަށް ގޮސް އުޅުނު ހދ. ނޮޅިވަރަންފަރު، އަސަރީމަންޒިލް، އުމުރުން 29 އަހަރުގެ މުހައްމަދު އިބްރާހީމެވެ. ފުލުހުން ވަނީ ހަމަލާދިނުމަށް ބޭނުންކުރި ވަޅި ހޯދާފައެވެ. ވަޅި ހޯދާފައިވަނީ މޫދުންނެވެ.
މަރުގެ މި މައްސަލާގައި ގާތިލްކަމަށް ތުހުމަތުކުރެވޭ މުހައްމަދު އިބްރާހީމް މިހާރު ހުރީ ޝަރީއަތް ނިމެންދެން ބަންދުކޮށްފައެވެ.
މިހާތަނަށް ލިބުނު މައުލޫމާތަށް ބަލާއިރު ވަޅިހެރުމުގެ ހާދިސާ ހިނގާފައިވަނީ، މަސްތުވާތަކެތީގެ މުއާމަލާތެއްގެ ތެރެއިންނެވެ.
