ޕީޖީ ޝަމީމްގެ އިތުބާރު ނެތްކަމުގެ މައްސަލަ އިދިކޮޅު ކޯލިޝަނުން މަޖިލީހަށް ވައްދަނީ
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އިތުބާރު ނެތްކަމުގެ މައްސަލަ އެމްޑީޕީގެ ފަރާތުން މަޖިލީހަށް ވެއްދުމަށް ވެސް އަބްދުއްރަހީމް ގޮވާލެއްވި
ޕްރޮސެކިއުޓަރ ޖެނެރަލް ހުސައިން ޝަމީމް
ޕްރޮސެކިއުޓަރ ޖެނެރަލް ހުސައިން ޝަމީމްގެ އިތުބާރު ނެތްކަމުގެ މައްސަލަ އިދިކޮޅު ކޯލިޝަންގައި ހިމެނޭ ޕީޕީއެމާއި ޕީއެންސީން ހޯމަ ދުވަހުގެ ރައްޔިތުންގެ މަޖިލީހަށް ވެއްދުމަށް ނިންމާފައިވާ ކަމަށް އެ ކޯލިޝަނުން ބުނެފިއެވެ.
އާދީއްތަ ދުވަހު އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ވެންޓިލޭޓަރުތަކާ ބެހޭ މައްސަލައިގައި، އެންޓި ކޮރަޕްޝަން ކޮމިޝަނުން ޕީޖީ އޮފީހަށް ހުށަހެޅި މައްސަލަ އަލުން މުރާޖައާ ކުރުމަށްފަހު، ދައުވާ ނުކުރުމަަށް ކުރިން ޕީޖީން ނިންމި ނިންމުން ދަމަހައްޓާފައިވާތީ ޕީޖީގެ އިތުބާރު ނެތްކަމުގެ މައްސަލަ މަޖިލީހަށް ވައްދަން ނިންމާފައިވާ ކަމަށެވެ.
އަދި ވައްކަންކުރާ ސަރުކާރަކާ އެކީ އޮންނަން އެމްޑީޕީ ނޭދޭ ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެފައިވާއިރު އެއީ އިޚުލާސްތެރިކަމާއެކު ވިދާޅުވި ބަހެއް ނަމަ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އިތުބާރު ނެތްކަމުގެ މައްސަލަ އެމްޑީޕީގެ ފަރާތުން މަޖިލީހަށް ވެއްދުމަށް ވެސް އަބްދުއްރަހީމް ގޮވާލެއްވިއެވެ.
މީގެ އިތުރުން އޭޕްރިލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބަށް ކެމްޕެއިން ކުރުމުގެ ނަމުގައި ހިޔާ ފްލެޓާއި ގުޅުވައިގެން ރައްޔިތުން ބިރުދައްކަމުންދާ ކަމަށް ވެސް އަބްދުއްރަހީމް ވަނީ ތުހުމަތުކުރައްވާފައެވެ. އެގޮތުން ފްލެޓް ދޭނީ އިންތިޚާބަށް ފަހުގައި ކަމަށް ބުނެ ރައްޔިތުންނަށް އެމްޑީޕީއަށް ވޯޓު ލުމަށް މަޖުބޫރު ކުރަމުންދާ ކަމަށް އަބްދުއްރަހީމް ތުހުމަތު ކުރެއްވިއެވެ. އަދި ކެމްޕެއިން ކުރުމުގައި ހަމަހަމަ ފުރުސަތެއް ނެތްކަން ފާހަގަކުރައްވައި އަބްދުއްރަހީމް ވިދާޅުވީ ރާއްޖޭގެ އެކި ކަންކޮޅުތަކަށް ސިއްރާ ފާޅުގައި ކޯލިޝަނަށް ނިސްބަތްވާ ސަރުކާރުގެ އިސްވެރިން ކެމްޕެއިނަށް ދިއުމުގެ ނަތީޖާއަކަށް ވެގެންދިޔައީ މުޅި ރާއްޖޭގެ އެކި ކަންކޮޅުތަކަށް ކޮވިޑް ފެތުރުން ކަމަށެވެ.
